سونىڭ ىشىندە 100 ەلدى مەكەنگە دەنەشىنىقتىرۋ جانە سپورتتىق ساۋىقتىرۋ كەشەندەرىن سالۋ, سپورتتىق ينفراقۇرىلىمداردىڭ تيىمدىلىگىن ارتتىرۋ جانە ولاردىڭ بارلىق بالاعا قولجەتىمدىلىگى تۋرالى ايتىلدى.
وتىرىستى سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا اشىپ, ءجۇرگىزىپ وتىردى. ءوزىنىڭ سوزىندە ول تۇڭعىش پرەزيدەنت – ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن ءومىر ساپاسىن ارتتىرۋ» اتتى جولداۋىندا بەرىلگەن تاپسىرمالاردى ەسكە سالىپ, سوعان بايلانىستى اتقارىلىپ جاتقان جۇمىستارعا شولۋ جاسادى. سونىمەن بىرگە قازاقستان رەسپۋبليكاسىندا دەنەشىنىقتىرۋ مەن سپورتتىڭ 2025 جىلعا دەيىنگى دامۋ تۇجىرىمى بەكىتىلگەنىن جەتكىزدى. وندا سپورتتى جوعارى ناتيجە كورسەتۋ ءۇشىن عانا ەمەس, جاپپاي اينالىسىپ, دەنساۋلىقتىڭ جاقسارۋىنا پايدالانۋ جولدارى كورسەتىلگەنى اتاپ كورسەتىلدى.
مادەنيەت جانە سپورت ءمينيسترىنىڭ ورىنباسارى ەلدوس رامازانوۆ ەلباسىنىڭ تاپسىرمالارىن ۆەدومستۆونىڭ قالاي ورىنداپ جاتقانى تۋرالى تولىمدى مالىمەت بەردى. سونىڭ ىشىندە سالانىڭ نورماتيۆتىك-قۇقىقتىق بازاسىن كۇشەيتۋ بويىنشا 2018-2019 جىلدارى كوپتەگەن جۇمىس اتقارىلعانى ايتىلدى.
«وسى ۋاقىت ارالىعىندا 23 نورماتيۆتىك-قۇقىقتىق اكت قابىلداندى, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنەشىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەندى», دەدى ول. ۆيتسە-مينيستر ءوزىنىڭ سوزىندە ەلباسىنىڭ تاپسىرمالارىن ورىنداۋ ماقساتىندا 2019 جىلى – 22, 2020 جىلى – 37, 2021 جىلى 41 دەنە شىنىقتىرۋ جانە سپورتتىق-ساۋىقتىرۋ كەشەندەرى جوسپارلانعانىن ايتتى.
ۇكىمەت ساعاتىندا كوتەرىلگەن ماسەلەلەرگە بايلانىستى سەناتور د.نوكەتاەۆا, نۇر-سۇلتان قالاسى اكىمىنىڭ ورىنباسارى ە.قانالىموۆ, ۇلتتىق وليمپيادا كوميتەتى ديرەكتسياسىنىڭ ديرەكتورى ە.قاناعاتوۆ جانە ت.ب. وي-پىكىرلەرىمەن ءبولىستى.
ۇكىمەت ساعاتىنىڭ قورىتىندىسى بويىنشا ۇسىنىمدار ازىرلەنىپ, ول ۇكىمەتكە جولداناتىن بولدى.