مادەني شارانىڭ اشىلۋ سالتاناتىندا وبلىس اكىمىنىڭ ورىنباسارى رۋسلان الىشەۆ تۇڭعىش پرەزيدەنتىمىزدىڭ باستاماسىمەن بۇگىندە داستۇرگە اينالىپ, جاس ۇرپاق ءۇشىن ونەگە-تاعىلىمى مول كونكۋرستىڭ تاربيەلىك ماڭىزدىلىعىن اتاپ ءوتتى.
«ەل دەپ كەلگەن باۋىرلار», «انا جۇرەگىنىڭ جىلۋى», «ۇرپاق ساباقتاستىعى», «شەبەردىڭ قولى ورتاق», «تۋعان جەرگە تۋىڭدى تىك» اتالىمدارىنا نۇرسەيىت, ءنۇسىپوۆ, ەسكەندىروۆ, قاسىموۆ, توپاەۆ وتباسىلارى يە بولدى.
ءبىرىنشى ورىندى ايىرتاۋ اۋدانىنىڭ نامىسىن قورعاعان ۋشاكوۆ, ال ەكىنشى, ءۇشىنشى ورىنداردى ماشيكوۆ پەن شاتارباي وتباسىلارى جەڭىپ الدى.
گران-پري باس جۇلدەسى ۋاليحانوۆتىق مۇحامەدياروۆتار وتباسىنا تاپسىرىلدى. وتاعاسى بولات قازى ۇلى ەنەرگەتيكا سالاسىندا 31 جىل ەڭبەك ەتكەن. ول قۇداي قوسقان قوساعى مافرۋزا ەكەۋى التى ۇل تاربيەلەپ وسىرگەن. ءبىر ۇلى «شابىت» حالىقارالىق فەستيۆالىنىڭ لاۋرەاتى. ءبىر ۇلى ءبىرجان سال اتىنداعى مۋزىكالىق كوللەدجدىڭ ديرەكتورى. قالعان ۇلدارى مەن نەمەرەلەرى دە شەتىنەن ونەرلى, ءانشى, ءبيشى, كۇيشى.
«وتباسىلاردىڭ قاي-قايسىسى بولسىن قۇرمەتتەۋگە ابدەن لايىق. مەنى باسقا ۇلتتىڭ ەكى بالاسىن باۋىرىنا باسقان توپاەۆتار وتباسىنىڭ ىسمەرلىكپەن اينالىساتىنى, ۇلتتىق بۇيىمدار جاسايتىنى قاتتى قىزىقتىردى. ءبىر شاڭىراق استىندا شيرەك عاسىرعا جۋىق ءتۇتىن تۇتەتىپ كەلە جاتقان قانافيندەر ءتورت جەتىم بالانى تاربيەلەپ وتىر. وڭتۇستىكتەن كوشىپ كەلگەن نۇرسەيىتتەر وتباسى ورىس مەكتەبىندە قازاق سىنىپتارىنىڭ اشىلۋىنا ۇيىتقى بولعان. ەرلى-زايىپتىلار ۇستاز بولسا دا, قوسالقى شارۋاشىلىقپەن اينالىسادى», دەيدى ىسكەر ايەلدەر اسسوتسياتسياسىنىڭ ءتورايىمى, قازىلار القاسىنىڭ مۇشەسى باقىتجان ساميەۆا.
جەڭىمپازدار مەن جۇلدەگەرلەرگە باعالى سىيلىقتار تارتۋ ەتىلدى.