ەڭ اۋەلى, ساكەن سەيفۋللين مۇراجايىندا ساكەن, ءىلياس, بەيىمبەتكە ارنالعان «ءۇش ارىس» بۇرىشىنىڭ اشىلۋ سالتاناتى بولدى. وندا اياۋلى تۇلعالاردىڭ فورفوردان جاسالعان ءمۇسىندەرى ورنالاسقان. ءبىر جىلدا دۇنيە ەسىگىن اشىپ, ونەردە دە, ومىردە دە ۇزەڭگى قاعىسىپ قاتار جۇرگەن, ۇلت ءۇشىن كۇرەستە ءبىر توبەدەن تابىلعان ارىستاردىڭ ادەمى مۇسىندەرى بۇدان بىلاي ساكەن سەيفۋللين مۋزەيىندە جارقىراپ تۇرا بەرمەك.
ايتۋلى شارا «ءۇش بايتەرەك» كىتابىنىڭ تۇساۋكەسەرىمەن جالعاسىن تاپتى. الىپ تۇلعالاردىڭ تاڭدامالى شىعارمالارىنان قۇراستىرىلعان بۇل جيناق اياۋلى اعالارىمىزدىڭ بيىلعى تاريحي مەرەيتويلارىنا تاماشا تارتۋ بولماق.
مەرەيتوي «ساكەن مۇراسى – حالىق قازىناسى» اتتى عىلىمي-پراكتيكالىق كونفەرەنتسيامەن جالعاستى. مەملەكەت جانە قوعام قايراتكەرى ورالباي ءابدىكارىم اقىن تويى ەلىمىزدىڭ ءار وڭىرىندە اتاپ وتىلەتىنىن جەتكىزدى. ساكەنتانۋشى عالىم كۇلاش احمەتوۆا ارداقتى تۇلعانىڭ ەسىمى ماڭگىلىك ەل جۇرەگىندە ساقتالاتىندىعىن, ءوزىنىڭ بار عۇمىرىن ساكەنگە ارناعان ايگىلى عالىم تۇرسىنبەك كاكىشەۆتىڭ ەرەن ەڭبەگىن تىلگە تيەك ەتتى. ساكەنتانۋشى عالىم امانتاي كاكەن بولسا ارداقتى تۇلعانىڭ ەل ءۇشىن ىستەگەن ەلەۋلى ەڭبەكتەرىنە ايرىقشا توقتالدى.
جالپى, «قازاقتىڭ ىرىلەرى, ابايدىڭ ىنىلەرى» اتانعان ءۇش ارىستىڭ ەسىمىن ارداقتاۋ, ساكەن مۇراسىنا ساكەنتانۋشىلاردىڭ ەڭبەگىن قوسۋ, تالداۋ ماقساتىندا وتكەن مەرەيتوي كوپتەگەن اۋقىمدى ءىس-شارانى قامتىدى. اتالعان مەرەيتويعا وراي نۇر-سۇلتان قالاسى جاستار تەاترىندا ەلىمىزگە تانىمال ونەر جۇلدىزدارىنىڭ قاتىسۋىمەن «ساكەننىڭ سىرلى سازدارى» اتتى مۋزىكالىق كونتسەرت تە ءوتتى. جالىندى جاستار ارداقتى تۇلعانىڭ وتتى جىرلارىن جاتقا وقىدى. ەلىمىزگە تانىمال ونەر جۇلدىزدارى ساكەن سەيفۋلليننىڭ اسەم اندەرىن تەبىرەنىسپەن شىرقادى. كوڭىلدى تولقىتار كۇي ورىندالدى.
الاش تۇرسىءنالى,
ساكەن سەيفۋللين مۋزەيى ەكسكۋرسيا جانە تاريحي تانىم ءبولىمىنىڭ قىزمەتكەرى