– الەۋمەتتىك ادىلەتتىلىكتى تۋ ەتىپ, ءوزىن قوعامنىڭ ەشكىمنەن كەم ەمەس ءبىر مۇشەسىندەي سەزىنۋىنە جاعداي جاسالۋىن ماقسات تۇتقان بۇل جوبانىڭ ىسكە اسىرىلۋىنا ىقپال ەتۋ ءبىزدىڭ پارىزىمىز, – دەپ باستادى ءوز ءسوزىن پارتيانىڭ بوستاندىق اۋداندىق فيليالى توراعاسىنىڭ ءبىرىنشى ورىنباسارى بايمۇرات جامبىلوۆ.
«مۇگەدەكتەر قوعامى» قوعامدىق ءبىرلەستىگىنىڭ توراعاسى ۇلان ىڭكاربەكوۆ كەمباعال ازاماتتارعا جاسالىپ جاتقان جاعدايدى تىلگە تيەك ەتسە, بوستاندىق اۋدانى الەۋمەتتىك ءبولىمىنىڭ وكىلدەرى ءا.امانوۆا مەن ا.احمەتوۆا مۇگەدەكتەرگە تيەسىلى ءتولەماقىلار تۇرلەرى مەن جەڭىلدىكتەر تۋرالى جان-جاقتى مالىمەت بەردى. ال اۋدانداعى مەديتسينالىق مەكەمەنىڭ باس دارىگەرى زۋحرا وماروۆا ساياجايلارعا جولدامالار مەن ەمدەلۋگە كۆوتا الۋ ماسەلەلەرىنە توقتالدى.
ەندىگى كەزەكتە مۇگەدەك بالا اسىراۋشى وتباسىلار مەن مۇمكىندىگى شەكتەۋلى ازاماتتار, جەتىم بالالار مەن جالعىز باستى انالار ماسەلەلەرى بىرتىندەپ قولعا الىنباق.
بۇل اۋداندا بارلىعى 1 602 مۇگەدەك بار, ونىڭ 1 018-ءى 1 جانە 2-توپتاعى مۇگەدەكتەر بولسا, 594 ادام 3-توپتاعى مۇگەدەكتەر. مۇمكىندىگى شەكتەۋلى ازاماتتاردى ماماندىقتارى بويىنشا نەمەسە باسقالاي دا ءارتۇرلى جۇمىستارمەن قامتۋ قاجەت.
كەزدەسۋگە كەلگەن ءوزى دە مۇگەدەك, قىزى دا مۇگەدەك زەينەتكەر قاريانىڭ قالاداعى شيپاجايلاردىڭ بىرىنە جولداما الۋعا كومەك سۇراعان ءوتىنىشى وڭ شەشىلدى. كوپ بالالى جەسىر انانىڭ 3 بىردەي بالاسى اۋتيزم اۋرۋىمەن اۋىرادى, ولاردىڭ ءبىرىنىڭ ەمى 250 مىڭ (بارلىعى 750 مىڭ) تەڭگە تۇرادى. نۇر-سۇلتان قالاسىنداعى انا مەن بالا ورتالىعىنا, رەسپۋبليكالىق بالالاردى وڭالتۋ ورتالىعىنا جولداما الۋعا سۇراعان ءوتىنىشى دە جەردە قالماي, قالالىق قوعامدىق دەنساۋلىق ساقتاۋ باسقارماسىنا حات جولداندى.
التى بالاسى بار, ونىڭ ىشىندە 1 قىزى كىشكەنتاي كەزىنەن مۇگەدەك, ال ءوزى 2-توپتاعى مۇگەدەك ازامات تۇراقتى تىركەۋى بار بولسا دا, تۇرىپ جاتقان جەرىنە ۋاقىتشا تىركەۋگە مۇمكىندىك بولماعاندىقتان ءتيىستى تولەماقىعا قولى جەتپەي جۇرگەنىن ايتىپ, كومەكتەسۋدى سۇرادى. ودان باسقا 2 پايىزبەن بەرىلەتىن جەڭىلدەتىلگەن «باقىتتى وتباسى» باعدارلاماسىنا ىلىكپەي وتىرعانىن ايتا كەتتى.
سونداي-اق 3 بالاسى بار جالعىز باستى انانىڭ 2 جاسقا كەلىپ قالعان بالاسىنىڭ ءالى جۇرە المايتىنىن, وعان ارنايى ورتوپەديالىق اياق كيىم مەن بالالارىنا ارنايى الەۋمەتتىك جاردەماقى الۋعا كومەكتەسۋدى سۇراعان وتىنىشتەرى دە اياقاستى قالمادى. ورتوپەديالىق ورتالىق ارقىلى ارنايى اياق كيىم ماسەلەسى شەشىلەتىن بولسا, ال اۋداندىق الەۋمەتتىك ءال-اۋقات ءبولىمىنىڭ ماماندارى ءوتىنىش يەسىنىڭ ەكىنشى ماسەلەسىن تاياۋ ۋاقىتتا قاراستىرماق.
ساپارباي پارمانقۇل, «Egemen Qazaqstan»
الماتى