قدياعو ارت-نىسان قۇرۋ جونىندەگى يدەيالار كونكۋرسىن جاريالاپ, بارلىق مۇددەلى ادامدارعا ءوز ۇسىنىستارى مەن ەسكيزدەرىن 2019 جىلعى 1 قاراشاعا دەيىن info@kncdiz.kz پوشتاسىنا «كونكۋرس» بەلگىسىمەن جىبەرۋدى ۇسىنىپ وتىر. كونكۋرس جەڭىمپازىنىڭ جوباسى الماتى قالاسىندا جۇزەگە اسىرىلادى. كونكۋرس تۇجىرىمداماسى مەن جانە شارتتارى http://www.rcaids.kz سايتىندا ەگجەي-تەگجەيلى باياندالعان.
– جيتس بۇكىل الەمدە ميلليونداعان ادامنىڭ ءومىرىن جالمادى. ولاردى ۇمىتۋ مۇمكىن ەمەس. ايتۆ-ينفەكتسياسى ەمدەلمەيتىن كەزدە, قايعىلى ەستەلىكتەر ءجيى جاڭارىپ تۇراتىن ەدى. ول كەزدە ناۋقاستاردىڭ ەشقانداي تاڭداۋى بولماعاندىقتان, كوز جۇمىپ جاتتى. انتيرەتروۆيرۋستىق تەراپيانىڭ پايدا بولۋىمەن ايتۆ-احۋالدى ادامداردىڭ ءومىرى ۇزاردى. سول ومىردەن وزعانداردى ەسكە الا وتىرىپ, ەندى ءبارىمىز بىرىگىپ, تىرىلەر تۋرالى ويلاۋىمىز قاجەت, – دەيدى قدياعو ديرەكتورى باۋىرجان بايسەركين.
بيىل جيتس-تەن قايتىس بولعانداردى ەسكە الۋدىڭ حالىقارالىق كۇنىن الەم 19 مامىر كۇنى اتاپ وتەدى. بۇل كۇنى ءتۇرلى ەلدە, سونداي-اق, قازاقستاندا دا دوڭگەلەك ۇستەلدەر, فلەش-موبتار, ترەنينگتەر جانە باسقا دا ءىس-شارالار بولىپ ۇيىمداستىرىلادى. بۇل شاراعا بولىسۋ جيتس-تەن قايتىس بولعانداردى ەسكە الىپ قويماي, ايتۆ ىندەتىنە كىم تاپ بولعاندارعا دەگەن تۇسىنىستىك نيەتتى بىلدىرەدى. ءبىزدىڭ ەلىمىزدە بۇل شارالار «ءومىر ءسۇرۋ ءۇشىن, ەستە ۇستايمىز!» ۇرانىمەن وتەدى.
جيتس-تان كوز جۇمعانداردى ەسكە الۋ كۇنى قارساڭىندا قازاقستاندىق بەلسەندىلەر وسى شاراعا بولىسۋعا نيەت بىلدىرگەندەرگە تاقىرىپقا كوڭىل ءبولىپ, فەيسبۋك جەلىسىندە ءوز سۋرەتىن ارنايى ەسكە الۋ شەڭبەرىن قولدانا وتىرىپ, جيتس-تەن قايتىس بولعانداردى ەسكە الۋدى ۇسىنىپ وتىر.
العاش رەت حالىقارالىق جيتس-تەن قايتىس بولعانداردى ەسكە الۋ كۇنى (World Remembrance Day of AIDS Victims) 1983 جىلى امەريكالىق سان-فرانتسيسكودا اتالىپ وتىلگەن. سودان كەيىن بىرنەشە جىلدان سوڭ وسى اۋرۋعا قارسى قوزعالىستىڭ نىشانى پايدا بولدى. ول كيىمگە تاعىلعان قىزىل باۋ, سونداي-اق, ءتۇرلى-ءتۇستى ماتا – ومىردەن وتكەن كوپتەگەن ادامداردىڭ بەلگىسى رەتىندە ماتا كەسىندىلەرىنەن تىگىلگەن قۇراقتار. بۇل اتريبۋتتاردى 1991 جىلى سۋرەتشى فرەنك مۋر ويلاپ تاپقان. قازىرگى ۋاقىتتا جيتس-تەن قايتىس بولعانداردى ەسكە الۋدىڭ حالىقارالىق كۇنىندە اتالمىش ناۋقان بەلسەندىلەرى مەن بەي-جاي قارامايتىن ادامدار وزدەرىنىڭ كيىمدەرىنە قىزىل باۋ تاعادى.
الماتى