وسىلايشا, ەلىمىزدىڭ ەكى مەگاپوليسىندە ەرەكشە كورەرمەندەر ءۇشىن ەكى جاڭا شىعارماشىلىق جوبا ساتىمەن اتقارىلدى. الماتىداعى «Cinemax» كينوتەاترىندا «off-line كانيكۋلدارى» قازاقستاندىق وتباسىلىق كومەدياسىنىڭ وسى ساناتتاعى بالاقايلارعا بەيىمدەلگەن كورسەتىلىمى وتسە, ەلوردادا «جانۋارلار كارناۆالى» مۋزىكالىق-پوەتيكالىق كونتسەرتى قويىلدى.
اۋتيزمگە شالدىققان بالالارعا ارنالعان مۇنداي شارالاردا بارلىعى قاراستىرىلادى: اشىق ەسىكتەر, جارىق شامدار, دىبىستىڭ باسەڭ بولۋى, بىلايشا ايتقاندا, سەنسورلىق ايماقتىڭ بالالارعا جاقىن ورناتىلۋى, سونداي-اق كينوزال مەن تەاتر قىزمەتكەرلەرىنە بالالارمەن ءتيىستى قارىم-قاتىناس جاساۋى ەسكەرتىلەدى. قور ديرەكتورى دينارا چايجۋنۋسوۆا مۇنداي باستامالاردىڭ ۇلكەن قوعامي-الەۋمەتتىك ماڭىزعا يە ەكەنىن اتاپ ءوتتى. بالالاردىڭ ءبارى قانداي جاعدايدا دا الەۋمەتتىك ورتادا تەڭ بولۋى كەرەك.
نۇر-سۇلتان قالاسىنداعى «جانۋارلار كارناۆالى» بەيىمدەلگەن قويىلىمىن «بولاشاق» كورپوراتيۆتىك قورى مەن «استانا-وپەرا» وپەرا جانە بالەت تەاترى بىرلەسىپ ۇيىمداستىردى.
«مۇنداي بەيىمدەلگەن كونتسەرت بالالارىمىزعا شاتتىق پەن قۋانىش سىيلادى. ءبىز ءۇشىن ەرەكشە كۇتىمدى قاجەت ەتەتىن بالالاردىڭ ءبىلىم سالاسىندا عانا ەمەس, مادەني تۇرعىدا ءوزدەرىن ەركىن ۇستاپ, باسقا بالدىرعاندارمەن تەڭ بولعانى ماڭىزدى. «استانا-وپەرامەن» ءبىرلەسكەن باستامامىز ەرەكشە قاجەتتىلىكتەرى بار بالالارعا تاعى ءبىر ۇلكەن مەرەكە سىيلادى», دەدى «بولاشاق» كورپوراتيۆتىك قورىنىڭ ديرەكتورى.
بالالارعا ارنالعان كونتسەرت جانۋارلارسىز وتكىزىلسە دە, كىشكەنتاي كورەرمەندەر سيمفونيالىق وركەستردىڭ كومەگىمەن ءتۇرلى حايۋاناتتاردىڭ دىبىستارى مەن داۋىستارىن ەستىپ, تاني الدى. «جانۋارلار كارناۆالى» فرانتسۋز كومپوزيتورى شارل-كاميل سەن-سانستىڭ تانىمال تۋىندىسى ەكەنىن ەسكە سالا كەتەيىك. بۇل سيۋيتا العاش 1886 جىلدىڭ 9 ناۋرىزىندا ورىندالعان. اتالعان جۇمىستى مۋزىكالىق ءازىل دەپ ەسەپتەگەندىكتەن, سەن-سانس «شالاعاي» مۋزىكانىڭ اۆتورى بولعىسى كەلمەيتىنىن ايتىپ, ءتىرى كەزىندە سيۋيتانى جاريالاۋعا تىيىم سالادى. وسىلايشا, كومپوزيتور 1921 جىلى باقيلىق بولعانىنا دەيىن «جانۋارلار كارناۆالى» تەك جەكە ۇيلەر مەن سالونداردا قويىلاتىن بولعان.بىراق «جانۋارلار كارناۆالى» ازىلگە تولى, ونىڭ كەيبىر بولىكتەرىندە تانىمال مۋزىكالىق ەلىكتەۋلەر, ياكي دايەكسوزدەرىن ەستۋگە بولادى.
جوبا Nur Otan پارتياسىنىڭ «كەدەرگىسىز كەلەشەك» جوباسىنىڭ «ينكليۋزيۆتىك ءبىلىم بەرۋدى دامىتۋعا ءجاردەمدەسۋ» باعىتى اياسىندا ىسكە اسىرىلۋدا. سونداي-اق بيىل اقمولا, اقتوبە, شىعىس قازاقستان, جامبىل, قاراعاندى, پاۆلودار, سولتۇستىك قازاقستان, تۇركىستان وبلىستارىندا اۋتيزمگە ۇشىراعان بالالارعا ارنالعان 20 قولداۋ كابينەتى اشىلادى.
الماتى