سول سۇراپىل سوعىستىڭ قاسىرەتىن كورگەندەر دە سيرەدى. بەسىكتەن بەلى شىقپاي جاتىپ تىلدا اۋىر ەڭبەك ەتكەن ۇرپاقتىڭ ءوزى دە ازايدى. سوندىقتان قانشاما تاۋقىمەت پەن قايعى اكەلگەن وسى جەڭىستىڭ قادىرىنە جەتپەيتىن, 9 مامىر مەرەكەسىنە جايباراقات قارايتىن جاستارعا بۇل كۇننىڭ ءمانىن اۋىق-اۋىق ەسكە سالىپ تۇرۋ پارىز. كەيدە سوزبەن ايتىپ جەتكىزە المايتىندى ءبىر عانا سۋرەت سويلەتە الادى. ال مىنا بەينە وسىدان 40 جىل بۇرىن ءتۇسىرىلىپتى.
– مىنا سۋرەتتى 1979 جىلى قىزىلوردا وبلىسى شيەلى اۋدانى سۇلۋتوبە, قازىرگى مۇستافا شوقاي اۋىلىندا ءتۇسىردىم. بىردە تۋعان اۋىلىما جولىم ءتۇسىپ, سۇلۋتوبەگە بارسام, ەسكەرتكىشكە تەسىلە قاراپ, ءبىر ايەل جىلاپ تۇر ەكەن. ەكى كادر تۇسىرۋگە زورعا ۇلگەردىم. ءبىر جاعىنان بىرەۋ جىلاپ تۇرعاندا, مەنىڭ سۋرەتكە ءتۇسىرىپ جاتقانىم دا ىڭعايسىز كورىندى. الايدا بۇل كورىنىستى كورگەندە تولقىماۋ مۇمكىن ەمەس ەدى. ول كەزدە سوعىس جەسىرلەرىنىڭ كوبىنىڭ كوزى ءتىرى ەدى.
وسى فوتودان سوڭ «سوعىس جەسىرلەرى» دەگەن سەريامەن سۋرەتتەر تۇسىرە باستادىم. ەكى جىل بويى مايداننان ازاماتى ورالماعان شەشەلەرىمىزدى ءتۇسىردىم. سوندا دەيمىن-اۋ, جەسىرلەر جىلاسا مەنىڭ دە قوسا جىلاعان ۋاقىتتارىم بولدى. ول جەردە شىداۋ مۇمكىن ەمەس.
كەيىن 1983 جىلى بۇل سۋرەت ماسكەۋدە وتكەن قازاقستان فوتوونەرى شەبەرلەرىنىڭ كورمەسىنە قويىلدى. بىراق ءوزىم ول كورمەگە بارا العان جوقپىن. سۋرەتتىڭ قىپ-قىزىل بولىپ تۇرعانى, سول كەزدەگى ءتۇرلى-ءتۇستى ءۇلدىرمەن ءتۇسىرىلدى, – دەيدى قىزىلوردالىق تانىمال فوتوتىلشى بولات وماراليەۆ.
بولات وماراليەۆ الەۋمەتتىك جەلىدە ءوزىنىڭ جەرلەستەرى, سۇلۋتوبەنىڭ ادامدارى بارشىلىق ەكەنىن, ءبىرەۋ بولماسا, بىرەۋى وسى سۋرەتتىڭ كەيىپكەرىن تانىر دەپ ۇمىتتەنىپ, بۇل فوتونى الەۋمەتتىك جەلىگە سالعان ەدى.
تالاي ادامدى تولقىتىپ, تالاي ادامنىڭ كوزىنە جاس ۇيىرگەن وسىناۋ ءساتتى سۋرەت اسەرلى ەستەلىكتەردىڭ تيەگىن اعىتقانىمەن, فوتوداعى انا تابىلمادى. ول ۇلىن كۇتكەن انا ما الدە جارىن ساعىنعان شەرمەندە شەشەلەرىمىزدىڭ ءبىرى مە؟ الايدا, ءبىراز ادام ۇلى وتان سوعىسى قالدىرعان قاسىرەتتى كەيىنگى ۇرپاققا ءتۇسىندىرۋ ءۇشىن ءدال وسىنداي فوتولاردى كورسەتۋدىڭ ءوزى جەتكىلىكتى ەكەنىن جازىپتى.
ەندى بىرەۋلەر بالا كەزىندە ۇيىندە جۇرەتىن 4 بىردەي سۇلۋ كەلىنشەكتىڭ سوعىستان ورالماعان اعالارىنىڭ جارلارى ەكەنىن ايتادى. سول سياقتى بەس ءبىردەي ۇلىنان ايىرىلىپ, بوزداپ وتكەن انالاردىڭ كوز جاسىن جازادى...
الماتى