كەلەشەكتە حالىقارالىق ارەنادا ەل نامىسىن قورعايتىن مىقتى سپورتشى بولۋدى ارمانداعان شىڭعىس 2003 جىلى الماتىعا كەلىپ, قازاقتىڭ كولىك جانە كوممۋنيكاتسيا اكادەمياسىنا وقۋعا تۇسەدى. سول جەردە ءجۇرىپ, اۋەلدە مۋاي-تايمەن شۇعىلداندى. ودان كەيىن دجيۋ-دجيتسۋعا اڭسارى اۋدى. وزىنە تاڭسىق ونەر ۇيىرمەسىنىڭ تابالدىرىعىن اتتاعانىنا نەبارى ەكى اپتا بولعانىنا قاراماستان, ەل قۇراماسىن جاتتىقتىرىپ جۇرگەن قانات تىلەۋىمبەتوۆ پەن مەيىرجان قاشاعانوۆ سىندى مايتالمان ماماندار بويىنا كۇش-قۋاتى سىيماي, جالىنداپ تۇرعان تۇلعالى جىگىتتى قازاقستان چەمپيوناتىنا قاتىستىرۋدى قۇپ كوردى.
– بوكس پەن مۋاي-تاي مەكتەبىنەن وتكەندىكتەن اياق جانە قولمەن جاقسى سوققىلار جاساۋ ماعان ەش قيىندىق تۋعىزعان جوق, – دەپ باستادى ءوز اڭگىمەسىن شىڭعىس قاسىموۆ. – تەك كۇرەس جاعى عانا اقساپ تۇردى. سوعان قاراماستان پاۆلودارداعى جارىستا قوس قارسىلاسىمدى جەڭىپ, جارتىلاي فينالدا ۇتىلدىم. ناتيجەسىندە ەل بىرىنشىلىگىندە قولا مەدالدى يەلەندىم. قىسقا عانا مەرزىم ارالىعىندا قول جەتكىزگەن بۇل تابىس مەنى قاناتتاندىردى. دجيۋ-دجيتسۋعا دەگەن قۇشتارلىعىمدى وياتتى. وسى سپورت ءتۇرىنىڭ قىر-سىرىنا ابدەن قانىعىپ, شەبەرلىگىمدى شارىقتاۋ شەگىنە جەتكەنشە شىڭداۋ ءۇشىن جاتتىعۋ زالىندا ايانباي تەر توكتىم. ەرەن ەڭبەك ەش كەتكەن جوق. بىرتە-بىرتە بيىك بەلەستەردى بىرىنەن كەيىن ءبىرىن باعىندىرا باستادىم.
راسىندا دا, سودان كەيىنگى كەزەڭدەر شىڭعىس ءۇشىن تولاعاي تابىستارعا تولى بولدى. اتاپ ايتساق, قازاقتىڭ قايسار ۇلى 2005-2013 جىلدار ارالىعىندا وتكەن ەلىشىلىك جارىستاردا التىن تۇعىردان تومەندەگەن جوق. اۋىر جانە اسا اۋىر سالماق دارەجەسىندە كۇش سىناسقان ول قازاقستان چەمپيوناتىندا بارلىعى 8 رەت توپ جارىپ, ەل كۋبوگىن سان مارتە ولجالادى. ءۇش رەتتەن الەم جانە ازيا چەمپيونى اتانىپ, الەم كۋبوگىندا ەكى مارتە توپ جاردى. قارت قۇرلىقتا وتكەن ءدۇبىرلى دودالاردىڭ بارلىعىن تەگىستەي ۇتىپ شىقتى. وسى جەڭىستەرىنىڭ ارقاسىندا ول جاۋىنگەرلىك دجيۋ-دجيتسۋدان قازاقستانعا ەڭبەك سىڭىرگەن سپورت شەبەرى اتاندى. قاسىموۆقا دەيىن ونداي اتاق وسى سپورت ءتۇرىن سەرىك ەتكەن بىردە-ءبىر وتانداسىمىزعا بۇيىرعان جوق ەدى.
– جاۋىنگەرلىك دجيۋ-دجيتسۋ وليمپيادا باعدارلاماسىنا ەنبەگەندىكتەن, بىزدەر ءۇشىن ەڭ ۇلكەن مانساپ – الەم چەمپيونى اتانۋ. اللانىڭ قالاۋىمەن ايتۋلى جارىستا ءۇش مارتە توپ جارۋ باقىتى بۇيىردى. 2011 جىلى دنەپروپەتروۆسكىدە ءۇش كەزدەسۋدە دە ايقىن باسىمدىقپەن جەڭىسكە قول جەتكىزىپ, قازاقستان سپورتشىلارى اراسىنان ەرەسەكتەر دۋىندا العاشقى بولىپ الەم چەمپيونى اتاندىم. 2012 جىلعى جارىس كيەۆتە ۇيىمداستىرىلدى. دۇنيەجۇزىلىك جاۋىنگەرلىك ونەر فەستيۆالى اياسىندا وتكەن ءدۇبىرلى دودادا دا اسىعىم الشىسىنان ءتۇسىپ, ايدارىمنان جەل ەستى. سوڭعى رەت 2013 جىلى پولشانىڭ كراكوۆ قالاسىندا جالاۋى جەلبىرەگەن جارىستا دا بابىم مەن باعىم قاتار شاۋىپ, ءۇشىنشى رەت تورتكۇل دۇنيەنىڭ تەڭدەسسىزى اتاندىم. وسى جەڭىستەرىمنىڭ ارقايسىسى مەن ءۇشىن ەرەكشە قىمبات. سەبەبى سول تابىستاردىڭ بارلىعى دا ماڭداي تەر جانە ەرەن ەڭبەك ارقىلى كەلدى, – دەيدى كەيىپكەرىمىز.
جاۋىنگەرلىك دجيۋ-دجيتسۋدان بولەك شىڭعىس قاسىموۆ جەكپە-جەك ونەرىنىڭ باسقا دا تۇرلەرىنەن ەلەۋلى تابىستارعا قول جەتكىزدى. ماسەلەن, قويان-قولتىق ايقاستان ەل چەمپيونى اتانىپ, سپورت شەبەرىنىڭ كۇمىس بەلگىسىن كەۋدەسىنە تاقتى. قۇقىققورعاۋشىلار اراسىندا ۇزدىكسىز ءوتىپ تۇراتىن ءداستۇرلى جارىستاردا وسى ءور مىنەزدى, سوققىسى اۋىر, رۋحى بيىك ءجىگىتتىڭ جاسىنداي جارقىراعانىن جانكۇيەرلەر ۇمىتا قويعان جوق.2009 جىلى پرەزيدەنتتىڭ كۇزەت قىزمەتكەرلەرى اراسىندا اقتوبەدە وتكەن ەل بىرىنشىلىگىنىڭ اقتىق سايىسىندا ساقا سپورتشى انتون امانباەۆتان 0:4 ەسەبىمەن ۇتىلىپ جاتىپ, اقىرىندا ايقىن باسىمدىقپەن جەڭىسكە جەتكەنى دە ەسىمىزدە. سول كەزدە سپورت كەشەنىنە جينالعان بارشا كورەرمەن قاسىموۆتىڭ قايسارلىعىنا ءسۇيسىنگەن ەدى. سونىمەن قاتار ءبىزدىڭ كەيىپكەرىمىزدىڭ جولى ەلىمىزدىڭ تانىمال سپورتشىسى, ەرەجەسىز جەكپە-جەكتەن بىرقاتار حالىقارالىق تۋرنيرلەردە توپ جارعان ءاپايتوس شاحمارال جەتپىسوۆپەن ءتۇرلى جارىستاردا ەكى مارتە قيىسقان ەكەن. بۇل باسەكەنىڭ ەكەۋى دە شىڭعىستىڭ كۇمانسىز جەڭىسىمەن اياقتالدى.
27 جاستان اسقان شاعىندا دجيۋ-دجيتسۋمەن قوش ايتىسقان شىڭعىس قاسىموۆ ءبارىبىر دە ۇلكەن سپورتتان الىستاپ كەتە المادى. الماتىداعى ەكى بىردەي ىرگەلى وقۋ ورىندارىن ويداعىداي ءتامامداپ, ينجەنەر جانە زاڭگەر ماماندىعىنىڭ ديپلومىن الدى. ۇيلەنىپ, وتباسىلى بولدى. بۇل كۇندەرى قازاقتىڭ نار تۇلعالى ازاماتى برازيليالىق دجيۋ-دجيتسۋعا مىقتاپ دەن قويدى. ەندى ول وسى سپورت ءتۇرى بويىنشا بيىك بەلەستەردى باعىندىرىپ, الەمدىك دودالاردا توپ جارۋدى كوزدەيدى.