اتاۋى مەن فورماتىن بىرنەشە مارتە وزگەرتكەن ايتۋلى دودا 2002 جىلدان بەرى ۇزدىكسىز ۇيىمداستىرىلىپ كەلەدى. العاشقى جارىستىڭ جالاۋى پورتۋگاليانىڭ استاناسى – ليسسابوندا جەلبىرەگەن ەدى. سول ارالىقتا وتكەن 17 جارىستىڭ توعىزىندا يسپانيالىق كوماندالاردىڭ مىسى باسىم بولدى. تارقاتىپ ايتساق, الكالا-دە-ەنارەس دەپ اتالاتىن شاعىن عانا شاھاردا جاساقتالعان «ينتەر موۆيستار» (بۇرىنعى اتاۋى – «بۋمەرانگ ينتەرۆيۋ») كلۋبى بەس مارتە باس جۇلدەنى ولجالادى. بۇل اتاققا ولار 2004, 2006, 2009, 2017 جانە 2018 جىلدارى قول جەتكىزدى.
كاستەلون-دە-لا-پلانانىڭ «پلاياس دە كاستەلونى» (2002, 2003) مەن كاتالونيانىڭ «بارسەلوناسى» (2012, 2014) ەكى رەتتەن توپ جاردى. الماتىنىڭ «قايراتى» دا ءدال سونداي كورسەتكىشكە قول جەتكىزىپ وتىر. جەرلەستەرىمىز 2013 ءجانە 2015 جىلعى جارىستاردا جەڭىمپازى اتاندى. سونداي-اق بەلگيانىڭ «اكسون 21» (2005), پورتۋگاليانىڭ «بەنفيكا» (2010), يتاليانىڭ «مونتەزيلۆانو» (2011) جانە رەسەيلىك «دينامو ماسكەۋ» (2007), «ۆيز-سينارا» (2008), «گازپروم-يۋگرا» (2016) فۋتزالشىلارى ءبىر-ءبىر رەتتەن دارا شىقتى. مىنە, وسى ساناۋلى عانا كوماندالاردىڭ «تورتتىك فينالىندا» دارالانۋعا شاما-شارقىسى جەتتى.
ايتۋلى جارىستىڭ شەشۋشى سايىستارى الماتىدا بۇعان دەيىن ەكى مارتە ۇيىمداستىرىلعان ەدى. 2011 جىلى بالۋان شولاق اتىنداعى سپورت سارايىندا وتكەن باسەكەدە «مونتەزيلۆانونىڭ» مەرەيى ۇستەم بولدى. اپەننين تۇبەگىنەن كەلگەن تۇلەكتەر فينالدا «سپورتينگتى» 5:2 ەسەبىمەن ۇتتى. بۇل جارىستى «قايرات» قولا مەدالمەن قورىتىندىلادى. جارتىلاي فينالدا «سپورتينگتەن» 2:3 ەسەبىمەن جەڭىلگەن جەرلەستەرىمىز ءۇشىنشى ورىن ءۇشىن تارتىستا «بەنفيكادان» پەنالتي سوعۋ بارىسىندا باسىم ءتۇستى – 5:3.ءدۇبىرلى دوپ دوداسى اراعا التى جىل سالىپ, قايتا الاتاۋ باۋرايىنا ورالدى. جاڭادان بوي كوتەرىپ, زامان تالابىنا ساي جابدىقتالعان «الماتى ارەنادا» وتكەن جارىستا «قايراتقا» تاعى دا قولا جۇلدە بۇيىردى. جارتىلاي فينالدا «ينتەر موۆيستارعا» 2:3 ەسەبىمەن ەسە جىبەرگەن قازاقستاندىق كوماندا ءۇشىنشى ورىن ءۇشىن ايقاستا «گازپروم-يۋگرانى» جەڭدى. بۇل باسەكەنىڭ دە تاعدىرى پەنالتي سوعۋ ارقىلى شەشىلدى.
مىنە, ەندى وسى بەدەلى زور جارىستى الماتى ءۇشىنشى مارتە قابىلداعالى وتىر. الداعى كۇندەرى الاش توپىراعىنا تابانى تيگەلى وتىرعان كوماندالاردىڭ بارلىعى دا وتە ازۋلى ەكەنى ەش داۋ تۋعىزباسا كەرەك. قاي-قايسىسىنىڭ دا باس جۇلدەنى ولجالاۋعا مۇمكىندىگى بار.
بيىلعى جارىستىڭ جارتىلاي فينالدا «قايرات» پەن «بارسەلونا» كۇش سىناسادى. بۇل ءباسەكە 26 ساۋىردە ساعات 21.30-دا «الماتى ارەنادا» وتەدى. كەلەسى ويىن ءدال سول جەردە, سول كۇنى «سپورتينگ» پەن «ينتەر موۆيستار» اراسىندا ءوربيدى. جارتىلاي فينالدا جەڭىلگەن كوماندالار 28 ساۋىردە قولا مەدال ءۇشىن تالاسسا, جەڭگەندەرى اقتىق سىندا ايقاسادى.
ال وسى ۇجىمداردى جەكە-جەكە تانىستىراتىن بولساق, ولاردىڭ قول جەتكىزگەن تابىستارى تومەندەگىدەي: