سوناۋ 1956 جىلى يتاليانىڭ كورتينا-د'امپەتستسو قالاسىندا الاۋى تۇتانعان وليمپيا ويىندارىنا قازاقستاننان العاشقى بولىپ قاتىسقان ايگىلى سپورتشى, كسرو مەن قازاقستاننىڭ سان دۇركىن چەمپيونى ءارى رەكوردشىسى الەكساندر ارتەمەنكونى ەسكە تۇسىرۋگە ارنالعان ءدۇبىرلى دودادا الماتى قالاسى, الماتى مەن شىعىس قازاقستان وبلىستارى جانە قىرعىزستان مەن رەسەيدەن كەلگەن 100-دەن اسا ءتۇرلى جاستاعى تاۋ شاڭعىشىلار باق سىنادى.
قازاقستاننىڭ شاڭعى سپورتى تۇرلەرىنىڭ باس حاتشىسى اسقار ۆاليەۆ: «كوكتەمنىڭ وسىنداي كەرەمەت كەزىندە, «شىمبۇلاقتىڭ» توبەسىندە كۇننىڭ ك ۇلىمدەپ تۇرعان شاعىندا «ارتەمەنكو مەموريالىنىڭ» ءوتۋى جاقسى ءبىر داستۇرگە اينالدى. وسى دوداعا جاس تا, كارى دە قاتىسا الادى. سوندىقتان دا بىزدەر ءۇشىن بۇل ۇلكەن سپورتتىق مەرەكە», – دەپ اقتارىلا سويلەدى.
جارىستىڭ سوڭعى كۇنى 2009-2010 جىلدارى تۋعان ۇلدار مەن قىزداردىڭ الپالىق كومبيناتسيا سايىسىندا دالەل تولقىنوۆا, الەنا وۆسياننيكوۆا, نايليا گايسا, تيموفەي كوستروۆ, بوگدان يۆانيحين جانە سانات ايتقازىنوۆ جەڭىس تۇعىرىنا كوتەرىلدى. 2011-2013 جىلدارى تۋعانداردىڭ توبىندا ۆيكتوريا گانجا, ەليزاۆەتا پاسەچنيكوۆا, ادام اليكەەۆ, بوگدان گۆوزدەتسكي جانە ارسەني شاپوشنيكوۆ ۇزدىكتەر قاتارىنان كورىندى. 2007-2013 جىلدارى تۋعان بالالار اراسىندا روستيسلاۆ حوحلوۆ, كيريلل مەششەرياكوۆ جانە الەكسەي كۋلاكوۆتىڭ باعى جاندى.
ال «ارتەمەنكو مەموريالىنىڭ» جەڭىمپازى, كسرو سپورت شەبەرى, كسرو مەن قازاقستاننىڭ چەمپيونى, كسرو قارۋلى كۇشتەرى بىرىنشىلىگىنىڭ جۇلدەگەرى ۆلاديمير كۋچين ءوز ويىن بىلاي دەپ تۇيىندەدى: «وسى جارىسقا قاتىسقان سايىن ءوزىمنىڭ بۇكىل سپورتتىق عۇمىرىم كوز الدىما ەلەستەيدى. ەرەكشە ءبىر ساعىنىش پايدا بولادى. مەن وسىنداي باسەكەلەر بارىسىندا بۇگىنگىدەن دە كوپ سپورتشىلاردى كورگىم كەلەدى. كەزىندە الماتىنىڭ وزىندە عانا تسسكا, «دينامو», «قايرات», «ەڭبەك», «لوكوموتيۆ», «بۋرەۆەستنيك» كلۋبتارى جەمىستى ەڭبەك ەتتى. تالعاردا شتاتتىق كوماندا جاساقتالدى. ايتۋلى ۇيىمداردىڭ قاتارىندا كسرو سپورت شەبەرلەرى, كسرو مەن رەسپۋبليكا بىرىنشىلىگىنىڭ جەڭىمپازدارى مەن جۇلدەگەرلەرى بولدى. ال قازاقستان قۇراما كومانداسىنا الەكساندرا يۆانوۆنا ارتەمەنكو جەتەكشىلىك ەتتى. سول كەزدەرى كسرو-نىڭ كەزەڭدىك سايىستارى قازاندا تەرىسكولدە باستالىپ, كوكتەمدە كيروۆسكىدە اياقتالاتىن. بۇل باسەكەلەر بارلىق مىقتى تاۋ شاڭعىشىلارىنىڭ باسىن قوساتىن. سونداي-اق, كەڭەس وداعىنىڭ جەكەلەگەن چەمپيوناتى ۇزدىكسىز ۇيىمداستىرىلىپ تۇردى. ايتۋلى دودادا تەك 30 ۇزدىكتىڭ قاتارىنا ەنگەن سپورتشىلار عانا قاتىساتىن. نەگىزى ءبىزدىڭ سپورتتىق ءومىرىمىز قىزىققا تولى بولاتىن. سوندىقتان دا تاۋ شاڭعىسى مەنىڭ نەگىزگى كاسىبىمە اينالدى. ال الەكساندار ارتەمەنكو بارلىعىمىزدىڭ ۇلكەن ۇستازىمىز».