– ەلباسىنىڭ «ءبىر قىزدى تاربيەلەۋ – ءبىر ۇلتتى تاربيەلەۋمەن تەڭ» دەگەن ءسوزىن ناقتى ءىس ءجۇزىندە قولدانا وتىرىپ, ەلىمىزدەگى جوعارى وقۋ ورىندارىنداعى قىزدار ۇيىمدارىمەن بىرلەسىپ جۇمىس ىستەۋ, ءوزارا تاجىريبە الماسۋ باسقوسۋدىڭ باستى مىندەتى. بۇگىنگى قىز – ەرتەڭگى يبالى جار, سىپايى كەلىن, قامقور انا. جالپى, قىز بالاسى – ۇرپاق ءتاربيەسى مەن ساباقتاستىعىنىڭ مىزعىماس ۇيىتقىسى. وسىناۋ جولدا «قىز جىبەك» كلۋبىنىڭ اتقاراتىن وزىندىك ۇلەسى وتە زور. «قىز جىبەك» كلۋبى – اياۋلى ارۋلارىمىزدىڭ ءتاربيەلى, پاراساتتى, جان-جاقتى بولىپ وسۋىنە ىقپالىن تيگىزىپ جۇرگەن بىردەن-ءبىر كلۋب دەسەم ارتىق ايتقانىم ەمەس. الداعى ۋاقىتتا دا اتالمىش كلۋب كوپتەگەن يگىلىكتى ءىستەرگە ۇيىتقى بولادى, – دەيدى قىزدار ۋنيۆەرسيتەتىنىڭ تاربيە جانە الەۋمەتتىك ماسەلەلەر جونىندەگى دەپارتامەنتىنىڭ ديرەكتورى جاڭاگۇل سۇلتانوۆا.
فورۋم بارىسىندا قوعام قايراتكەرى, قىزدار ۋنيۆەرسيتەتىنىڭ تۇلەگى اسىلى وسمانقىزى «قىز تاربيەسى – ۇلت تاربيەسى» تاقىرىبىندا اڭگىمە ءوربىتتى. ال جالپى پەداگوگيكا كافەدراسىنىڭ قاۋىمداستىرىلعان پروفەسسورى, پەداگوگيكا عىلىمدارىنىڭ كانديداتى ساراش قوڭىرباەۆا قازاق قىزىنىڭ جاڭا عاسىرداعى بەينەسى تۋرالى بايانداپ, ۋنيۆەرسيتەتتىڭ وقۋ ۇردىسىنە ەنگىزىلگەن «قازاق ارۋى» ءپانى تۋرالى باياندادى. قازاق ءتىل ءبىلىمىنىڭ تەورياسى مەن ادىستەمەسى كافەدراسىنىڭ مەڭگەرۋشىسى, فيلولوگيا عىلىمدارىنىڭ دوكتورى تىنىشتىق ەرمەكوۆا «قىزىم ساعان ايتام...» تاقىرىبىنداعى بەينەدارىستەر سەرياسىن تانىستىردى. سونداي-اق جيىندا قىزدار ۋنيۆەرسيتەتىنىڭ PHD دوكتورانتى, «قىز ءجىبەك» كلۋبىنىڭ بۇرىنعى ءتورايىمى مارجان اقتاەۆا ۇيىمنىڭ تاريحىنا شولۋ جاساسا, كلۋبتىڭ بەلسەندى مۇشەسى سالتانات سەرىكقىزى ونىڭ باستى بەس باعىتىن اتاپ ءوتتى.
فورۋمدا ءال-فارابي اتىنداعى قازاق ۇلتتىق ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, اباي اتىنداعى قازاق ۇلتتىق پەداگوگيكالىق ۋنيۆەرسيتەتى, قازاق ۇلتتىق اگرارلىق ۋنيۆەرسيتەتى, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى, س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى جانە م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى قىزدار كلۋبتارىنىڭ مۇشەلەرى ونلاين بايلانىسقا شىعىپ, ۇلتتىق سالت-ءداستۇر, قىزدار تاربيەسى توڭىرەگىندە اتقارىپ جاتقان جۇمىستارىمەن, قولعا العان جوبالارىمەن تانىستىردى.
ايناش ەسالي,
«Egemen Qazaqstan»
الماتى