قازاق ۇلتتىق قىزدار پەداگوگيكالىق ۋنيۆەرسيتەتىندە «قىز جىبەك ارۋى» بايقاۋى ءوتتى. ۇلتتىق ءداستۇردى ۇلىقتاعان سۇلۋلار سايىسى جاستار جىلى قارساڭىندا ارۋلار ورداسىندا تۇڭعىش رەت ۇيىمداستىرىلدى.
قىزدار ۋنيۆەرسيتەتىنىڭ تاربيە جانە الەۋمەتتىك جۇمىستار جونىندەگى دەپارتامەنتى مۇرىندىق بولعان بايقاۋعا 7 بويجەتكەن باپتارى مەن باقتارىن سىنادى. شارا ۇيىمداستىرۋشىلارىنىڭ ايتۋىنشا, سايىسقا قاتىسۋعا وقۋ ورنىنىڭ 6 فاكۋلتەتىنەن بارلىعى 71 ۇمىتكەر ءوتىنىش بىلدىرگەن. الدىن-الا ىرىكتەۋ بويىنشا جارتىلاي فينالعا 15 قىز وتسە, اقتىق كەزەڭگە قاتىسۋعا 7 بويجەتكەن مۇمكىندىك العان.
بايقاۋعا دايىندىق بارىسىندا بويجەتكەندەر ءتۇرلى مادەني باعدارلامالارعا قاتىسىپ, ءسان اگەنتتىكتەرىندە ءوز شەبەرلىكتەرىن ارتتىرعان. سونداي-اق قازاق حالقىنىڭ تاريحى, سالت-ءداستۇرى باعىتىنداعى تىڭ دەرەكتەرمەن تانىسىپ, بىلىمدەرى مەن بىلىكتىلىگىن ارتتىرۋعا ارنالعان ارنايى شارالارعا اتسالىستى.
– سايىستا قىزدار وزدەرىن تانىستىرىپ, ورەسىنىڭ بيىكتىگىن تانىتۋعا ۇمتىلدى. ارتىنشا شىعارماشىلىق شەبەرلىكتەرىن سىناتتى. اركىمنىڭ قابىلەتى ءارتۇرلى. تاڭداعان سالالارى دا ءار الۋان. دەسە دە شاما-شارقىنشا ءوز ونەرلەرىن پاش ەتتى. جارىستا وي ۇشقىرلىعى سىنالىپ, ءبىلىم دەڭگەيلەرى تەكسەرىلدى. قىزدارعا قويىلعان ساۋالدارعا جان-جاقتى, دالىرەك ايتقاندا ساۋاتتى جاۋاپ بەرۋ تالاپ ەتىلدى. سانقويلىق سىناققا دا ءورىس اشىلدى. بۇل كەزەڭدە وتاندىق ديزاينەرلەردىڭ قولىنان شىققان ءساندى كويلەك ۇلگىلەرى كوپشىلىك نازارىنا ۇسىنىلدى. سىرتقى سىمبات سىنالىپ, ساحناداعى ءجۇرىس-تۇرىسقا دا ءمان بەرىلەتىن تۋر وسى, – دەيدى تاربيە جانە الەۋمەتتىك جۇمىستار جونىندەگى دەپارتامەنتىنىڭ ديرەكتورى جاڭاگۇل سۇلتانوۆا.
بايقاۋعا قاتىسۋشىلارعا بەلگىلى مادەنيەت جانە ونەر مايتالماندارى, ۇكىمەتتىك ەمەس ۇيىم وكىلدەرىنىڭ جەتەكشىلەرى قازىلىق جاسادى. ولاردىڭ قاتارىندا قازاقستاننىڭ مادەنيەت قايراتكەرى بانۋ تۇرعىنباەۆا, تەاتر جانە كينو اكتريساسى ايدا جانتىلەۋوۆا, «Monro» مودەلدىك اگەنتتىگىنىڭ ديرەكتورى ءمادي ەرسەيىت, ءانشى, اكرتيسا ءلايلا تەمىرحان سىندى ازاماتتار بار.
جيناعان ۇپاي قورىتىندىسى بويىنشا ونەر جانە مادەنيەت فاكۋلتەتىنىڭ ستۋدەنتى ءمولدىر قازيەۆا باس جۇلدەگە يە بولدى.
ءبىرىنشى ورىنعا الەۋمەتتىك-گۋمانيتارلىق فاكۋلتەتىنىڭ ستۋدەنتى لاۋرا ىسقاقوۆا لايىق دەپ تانىلسا, ەكىنشى ورىن جاراتىلىستانۋ فاكۋلتەتىنىڭ ستۋدەنتى سىمبات ابدۋعاپپار مەن پەداگوگيكا جانە پسيحولوگيا فاكۋلتەتىنىڭ ستۋدەنتى اياجان اقتىمبايدىڭ قانجىعاسىندا كەتتى. ال ءۇشىنشى ورىن جاراتىلىستانۋ فاكۋلتەتىنىڭ ستۋدەنتى اسەم قالماحانعا بۇيىردى.
سونىمەن قاتار «العىر ارۋ» نوميناتسياسىمەن پەداگوگيكا جانە پسيحولوگيا فاكۋلتەتىنىڭ ستۋدەنتى ۇلجالعاس ناسير, «زەردەلى ارۋ» نومينتسياسىمەن ونەر جانە مادەنيەت فاكۋلتەتىنىڭ ستۋدەنتى ۇلمەكەن شەكەربەك, «كورەرمەن كوزايىمى» نوميناتسياسىمەن پەداگوگيكا جانە پسيحولوگيا فاكۋلتەتىنىڭ ستۋدەنتى اياجان اقتىمباي ماراپاتتالدى.
– سۇلۋلار سايىسىنا قاتىسۋشىلاردىڭ بارلىعى دا ۇلكەن دايىندىقپەن كەلگەندىگى كورىنىپ تۇر. ءبارى دە باس جۇلدەدەن ءۇمىتتى ەدى. شەتىنەن سۇلۋ, ونەرلى. قازىلار القاسى شىن مىقتىنى انىقتاۋ ماقساتىندا ءاربىر ۇمىتكەردى جان-جاقتى تالداپ بارىپ, ناقتى شەشىم قابىلدادى, – دەيدى شارا ۇيىمداستىرۋشىلارى.
ايناش ەسالي,
«Egemen Qazaqstan»
الماتى