گەنەرال-مايور ءامىر حالىقوۆ باستاعان قورعانىس مينيسترلىگى باس ينسپەتسياسىنىڭ ءبىر توپ وفيتسەرلەرى ەلىمىزدىڭ باتىسىنداعى اسكەري بولىمدەردىڭ جاۋىنگەرلىك دايارلىعى مەن ازىرلىگىن سىناۋدا.
تەكسەرىستىڭ باستى ماقساتى – اسكەري بولىمدەردىڭ جاۋىنگەرلىك دايارلىعى مەن جاۋىنگەرلىك ازىرلىك دەڭگەيىن باعالاۋ. وسى ۋاقىتتا, وڭىردەگى بەس اسكەري ءبولىم تەكسەرىستەن ءوتتى, ونىڭ ىشىندە «باتىس» وڭىرلىك قولباسشىلىعى اسكەرلەرى قولباسشىسىنىڭ باسقارماسى بار.
تەكسەرىستى تولىققاندى جانە جان-جاقتى وتكىزۋ ءۇشىن تەوريالىق تەستىلەۋلەر مەن ءىس جۇزىندەگى سىناقتار قابىلداندى. تەستىلەۋ جالپىاسكەري جارعىلار, جەدەل دايارلىق ونەرى, مەملەكەتتىك-قۇقىقتىق دايىندىق, تەحنيكالىق دايىندىق جانە مەملەكەتتىك قۇپيالاردى ساقتاۋ پاندەرىنەن ءوتتى. سونىمەن قوسا, وفيتسەرلەر مەن كەلىسىمشارت بويىنشا اسكەري قىزمەتشىلەر, ساربازدار وزدەرىنىڭ جوعارى جاۋىنگەرلىك دايارلىعىن دەنە جانە اتىس جاتتىعۋلارىن ورىنداۋ بارىسىندا دالەلدەپ شىقتى. تەكسەرىسكە «گەنەرالدان سوڭعى ساربازعا دەيىن» تۇگەل قاتىستى.
قورعانىس مينيسترلىگى باس ينسپەكتسياسى جۇمىسىنداعى ماڭىزدى ساتتەردىن ءبىرى, ءتۇرلى دەڭگەيدەگى جاۋىنگەرلىك ازىرلىك جاعدايىنا كەلتىرگەن كەزدەگى تاجىريبەلىك ءىس-ارەكەتتەردىڭ ۇلەسىمدىلىگى بولدى. ماسەلەن, «باتىس» وڭىرلىك قولباسشىلىعىنىڭ باسقارماسى جاۋىنگەرلىك دايارلىقتىڭ جوعارى دارەجەسىنە كەلتىرىلىپ, 25744, 51051-ك جانە 41321 اسكەري بولىمدەرىمەن بىرگە اتىراۋداعى «كاراباتان» جانە اقتاۋداعى «ويماشا» وقۋ پوليگوندارىنا شىعارىلدى. وڭىرلىك قولباسشىلىقتىڭ قولباسشىسىنا باتىس ستراتەگيالىق باعىتىندا ارنايى اسكەري ءىس-قيمىلداردى وتكىزۋگە ۇيعارىم بەرىلدى.
قورعانىس مينيسترلىگى باس ينسپەكتسياسىنىڭ ەلىمىزدىڭ باتىسىنداعى جۇمىسى ناۋرىز ايىنىڭ باسىنا دەيىن جالعاسادى, بۇل ارالىقتا ايماقتاعى بارلىق اسكەري بولىمدەر مەن قۇرىلىمدار تەكسەرىستەن ءوتىپ, سايكەس باعاسىن الادى.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى