بۇگىن ماجىلىستە مەملەكەتتىك جاستار ساياساتىن ىسكە اسىرۋ بارىسى تۋرالى ۇكىمەت ساعاتى ءوتتى.
وتىرىستى اشقان ۆيتسە-سپيكەر گۇلميرا يسيمباەۆا ءبىلىمدى, باسەكەگە قابىلەتتى جاس ۇرپاقتى قالىپتاستىرۋ تاۋەلسىزدىكتىڭ العاشقى كۇندەرىنەن باستاپ مەملەكەت باسشىسى نۇرسۇلتان ءابىش ۇلى نازارباەۆتىڭ ساياساتىنداعى باسىم باعىت ەكەنىن اتاپ ءوتىپ, بيىلعى جىلدىڭ «جاستار جىلى» بولىپ جاريالانۋىنىڭ ماڭىزدىلىعىنا توقتالدى.
گ.يسيمباەۆا ءماجىلىس وتكىزگەن «جاستارعا ينۆەستيتسيا» حالىقارالىق كونفەرەنتسياسىندا 35 ەلدىڭ دەپۋتاتتارى قازاقستاننىڭ 2019 جىلدى جاستار جىلى دەپ جاريالاۋ تۋرالى شەشىمىن جوعارى باعالاعانىن اتاپ ءوتتى.
ۇكىمەت ساعاتى بارىسىندا دەپۋتاتتار جاستار جىلىن وتكىزۋ جونىندەگى 80-نەن استام ءىس-شارادان تۇراتىن جول كارتاسىن, وعان تۇتاستاي العاندا شامامەن 130 ميلليارد تەڭگە جۇمساۋ بولجانىپ وتىرعانىن تالقىلادى. جۇمىسسىزدىقتى ازايتۋ ماقساتىندا جول كارتاسىندا «جاس مامان», «جاس كاسىپكەر» باعدارلامالاردى جۇزەگە اسىرۋ قاراستىرىلعان. 100 قاجەتتى ماماندىق بويىنشا مامانداردى دايىنداۋ جوسپارلانۋدا.
ۆيتسە-سپيكەردىڭ ايتۋىنشا, ماماندار تاپشىلىعى ورىن السا, ەكىنشى جاعىنان, جۇمىس تابا الماي جۇرگەن جاستاردىڭ بارشىلىعى. مەملەكەت تاراپىنان كادر دايارلاۋعا قوماقتى قاراجات بولىنۋدە. مىسالى, كادرلاردى دايارلاۋعا 2 جىل ىشىندە شامامەن 234 ميلليارد تەڭگە ءبولىنىپ, جىل سايىن 300 مىڭداي جاس مامان جوعارى جانە كاسىپتىك تەحنيكالىق ءبىلىم الىپ شىعادى.
جاستار اراسىنداعى جۇمىسسىزدىق, رەسمي ستاتيستيكاعا سايكەس, بۇگىنگى كۇنى 82400 مىڭ ادامدى قۇرايدى. ال ەلەكتروندىق ەڭبەك بيرجاسى پورتالىندا جۇمىسقا ورنالاستىرۋ بويىنشا 34 مىڭنان استام بوس ورىن جانە جۇمىس بەرۋشىلەردەن 82 مىڭنان استام سۇرانىس ورنالاستىرىلعان.
بۇدان باسقا, وتىرىس بارىسىندا ءماجىلىس دەپۋتاتتارى جاسوسپىرىمدەر مەن جاستاردىڭ اراسىنداعى قۇقىق بۇزۋشىلىقتاردىڭ الدىن الۋ بويىنشا جۇمىستاردى جەتىلدىرۋ, ازاماتتاردىڭ جوعارى ساپالى پسيحولوگيالىق جانە وتباسىلىق كەڭەس بەرۋ مۇمكىندىگىن كەڭەيتۋ تۋرالى ماسەلەلەرگە نازار اۋداردى.