بىلتىر كوكتەمگى تاسقىن وسكەمەن, سەمەي قالالارى مەن اياگوز, گلۋبوكوە, التاي, شەمونايحا اۋداندارى تۇرعىندارىن اۋرە-سارساڭعا سالعانى بەلگىلى. بيىل شە؟ اۋا رايىن زەرتتەۋشى ماماندار سەمەي قالاسى مەن التاي, شەمونايحا, گلۋبوكوە, بەسقاراعاي جانە اياگوز اۋداندارىنا ءجىتى نازاردا ۇستاۋ كەرەكتىگىن ەسكەرتىپ وتىر.
وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ بەرگەن مالىمەتتەرىنە سۇيەنسەك, قازىرگى ۋاقىتتا وڭىردە قار شىعارۋ, سۋ بوگەتتەرىن, جاعالاۋلاردى بەكىتۋ جۇمىستارى جۇرگىزىلۋدە. «سينوپتيكتەردىڭ بولجامىنشا ايماقتا قار قالىڭ بولعانىمەن, ونىڭ دەڭگەيى شەكتى نورمادان اسپاعان. بىلتىرعىداي قالىڭ توڭ جوق. وبلىستىڭ 74 ەلدى مەكەنىن سۋ باسۋ قاۋپى بار ەكەندىگى انىقتالعاندىعىمەن, تاسقىننىڭ الدىن الۋ جۇمىستارى جۇرگىزىلگەننەن كەيىن ونىڭ 14-ءى بۇل تىزىمنەن الىندى. 12 ەلدى مەكەندە جاعداي تۇراقتالدى», - دەلىنگەن دەپارتامەنت تاراتقان مالىمەتتە.
ايتىپ كەلمەيتىن تاسقىنعا وبلىس قانشالىقتى دايىن؟ تەحنيكا جەتكىلىكتى مە؟ 2018 جىلى ءوڭىردى قارعىن سۋ قاپتاعان كەزدە وبلىس اكىمى دانيال احمەتوۆتىڭ «توتەنشە جاعدايلار دەپارتامەنتىنىڭ تەحنيكالىق جابدىقتالۋى وتە تومەن. دەپارتامەنتتە نورماتيۆ بويىنشا بولۋعا ءتيىس 249 كوشپەلى موتوپومپانىڭ تەك 55-ءى, 69 قايىقتىڭ 14-ءى, 1 مىڭ گيدروكومبينەزوننىڭ 86-سى عانا بار, 55 جول تالعامايتىن كولىكتىڭ بىردە بىرەۋى جوق» دەپ ۇكىمەت باسشىسى باقىتجان ساعىنتاەۆتان كومەك سۇراعانى ەسىمىزدە. بيىل دەپارتامەنتتىڭ جاعدايى ءبىرشاما جاقسارعان سەكىلدى. «بىلتىرعى تاسقىن ماۋسىمىنىڭ سوڭىندا موتوپومپانىڭ سانى ءۇش ەسەگە كوبەيدى. رەسپۋبليكالىق جانە وبلىستىق بيۋدجەت ەسەبىنەن تەحنيكالار جاڭارتىلىپ, قۇتقارۋ قۇرىلعىلارى الىندى. بۇگىندە دەپارتامەنتتە 1000 ادام قۇتقارۋ شارالارىنا دايىن. 6 ءموبيلدى توپ قۇرىلعان. 300 جول تالعامايتىن كولىك, 60-قا جۋىق ءجۇزۋ قۇرىلعىلارى, 10 تىكۇشاق پەن 1 ۇشاق بار», - دەيدى دەپارتامەنتتىڭ ءباسپاسوز قىزمەتىنىڭ مامانى اناستاسيا سكليار.
ازامات قاسىم,
«Egemen Qazaqstan»
شىعىس قازاقستان وبلىسى