سولتۇستىكقازاقستاندىقتار ءۇشىن تىرشىلىك ءنارىنىڭ بىردەن-ءبىر كوزى–ەسىل وزەنى. «ەسىل سۋ» مەملەكەتتىك مەكەمەسى ەلدى مەكەندەرگە ساپالى اۋىز سۋدى وسى وزەننەن جەتكىزەدى.
الايدا سوڭعى جىلدارى وزەننىڭ سۋى لايلانىپ, تارتىلىپ بارا جاتقانى الاڭداتپاي قويمايدى. بۇعان ورتاق سۋ كوزىن لاستاۋشىلار قاتارىنىڭ كوبەيىپ بارا جاتقانىن قوسساق, جەدەل شەشىمىن تاباتىن ماسەلەلەردىڭ از ەمەستىگى انىق اڭعارىلادى. جۇرتشىلىق تاراپىنان دابىلدار ءجيى قاعىلىپ جاتاتىنى دا سوندىقتان. وڭىرلىك ەكولوگيا دەپارتامەنتىنە قالا تۇرعىنىنان كاسىپورىنداردىڭ ءبىرى ەسىل وزەنىنە لاس سۋدى توگىپ جاتىر دەگەن اقپارات ءتۇسىپ, تەكسەرىس بارىسىندا تولىعىمەن راستالدى. ەكولوگ ماماندار قالالىق “تازارتقىش, سۋ تاراتقىش جانە سۋ وتكىزگىش عيماراتتار” مەكەمەسىنىڭ قالدىق سۋدى وزەنگە اعىزىپ جىبەرگەنىن انىقتادى.
دەپارتامەنت باسشىسىنىڭ ورىنباسارى ازامات بەكتاسوۆتىڭ ايتۋىنشا, قىسقى ۋاقىتتا قالدىق سۋدى توگۋگە قاتاڭ تىيىم سالىنعانىنا قاراماستان اتالمىش كاسىپورىن زاڭ تالاپتارىن ورەسكەل بۇزعان. ەلىمىزدە ءبىرىنشى كەزەكتە ادام دەنساۋلىعىن ساقتاۋ, نۇقسان كەلتىرمەۋ جايىن ەسكەرمەۋ سالدارىنان ەسىل ارناسىنا 153 مىڭ تەكشە مەتر اعىندى سۋ تۇسكەن.
«دەپارتامەنت ماماندارى تەكسەرىس جۇرگىزدى. فاكت راستالدى. زاڭبۇزۋشىلىققا جول بەرىپ, قورشاعان ورتاعا تيگىزگەن زالالى ءۇشىن 30 ميلليون تەڭگە ايىپپۇل سالىندى», دەيدى ەكولوگيا دەپارتامەنتى باسشىسىنىڭ ورىنباسارى ازامات بەكتاسوۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى