استانادا ۇجىمدىق قاۋىپسىزدىك كەڭەسىنىڭ سەسسياسى باستالدى

ۇجىمدىق قاۋىپسىزدىك تۋرالى شارت ۇيىمىنا قازىرگى ۋاقىتتا ارمەنيا رەسپۋبليكاسى, بەلارۋس رەسپۋبليكاسى, قازاقستان رەسپۋبليكاسى, قىرعىز رەسپۋبليكاسى, رەسەي فەدەراتسياسى جانە تاجىكستان رەسپۋبليكاسى مۇشە. سوندىقتان دا كەڭەسكە قازاقستان پرەزيدەنتىنەن وزگە اتالعان مەملەكەتتەردىڭ باسشىلارى –  رەسەي پرەزيدەنتى ۆلاديمير پۋتين, بەلارۋس پرەزيدەنتى الەكساندر لۋكاشەنكو, قىرعىز پرەزيدەنتى سوورونباي جەەنبەكوۆ, ءتاجىستان پرەزيدەنتى ەمومالي راحمون جانە ارمەنيا پرەمەر-ءمينيسترىنىڭ مىندەتىن اتقارۋشى نيكول پاشينيان قاتىسۋدا. 

جيىن الدىندا قازاقستان پرەزيدەنتى ۇقشۇ مۇشە مەملەكەتتەردىڭ باسشىلارىن رەسمي شارت بويىنشا جەكە-جەكە كۇتىپ الىپ, ەستەلىك سۋرەتكە ءتۇستى. مۇنان سوڭ پرەزيدەنتتەر توپتاسىپ سۋرەتكە ءتۇسۋ راسىمىنە قاتىستى.

پرەزيدەنتتەردىڭ شاعىن قۇرامدا كەزدەسۋىن اشقان قازاقستان پرەزيدەنتى نۇرسۇلتان نازارباەۆ ارىپتەستەرىن ۇقشۇ كەزەكتى سامميتىنە قاتىسۋ ءۇشىن استاناعا كەلگەنىى ءۇشىن العىسىن ايتتى.

– ءبىز قازىرگى قالىپتاسقان حالىقارالىق جاعدايعا بايلانىستى ويلارىمىزدى ورتاعا سالىپ, قارىم-قاتىناسىمىزداعى وزەكتى ماسەلەلەردى تالقىلايمىز, – دەدى قازاقستان پرەزيدەنتى.

اتالعان وتىرىس ەلىمىز ءۇشىن قازاقستاننىڭ 2018 جىلى ۇجىمدىق قاۋىپسىزدىك شارتى ۇيىمىنا توراعالىق ەتۋى شەڭبەرىندە نەگىزگى جانە قورىتىندى ءىس-شارا بولعاندىعىمەن ماڭىزدى. ويتكەنى, وتىرىس بارىسىندا ۇجىمدىق قاۋىپسىزدىك شارتى ۇيىمىنا مۇشە مەملەكەتتەر باسشىلارى قازاقستاننىڭ توراعالىق ەتۋ كەزەڭىندە ەلىمىز ۇسىنعان ۇيىمنىڭ باسىمدى باعىتتارىن ىسكە اسىرۋدىڭ نەگىزگى ناتيجەلەرىن قورىتىندىلايدى.

سونىمەن قاتار ۇقشۇ توراعالىعى 2018-2019 جىلدارى قىرعىز رەسپۋبليكاسىنا وتەتىندىكتەن, ەل پرەزيدەنتى سوورونباي جەەنبەكوۆ سەسسيا بارىسىندا قىرعىزستاننىڭ توراعالىق كەزەڭىندەگى باسىمدىقتاردى اتايدى.

سونىمەن قاتار كۇن تارتىبىندەگى ماسەلەرگە بايلانىستى قۇجاتتارعا قول قويىلىپ, باق ءۇشىن مالىمدەمە جاسالماق. 

سەرىك ابدىبەك,

«ەگەمەن قازاقستان»