قاسىم-جومارت توقاەۆتىڭ توراعالىق ەتۋىمەن پارلامەنت سەناتىنىڭ وتىرىسى بولدى, دەپ حابارلايدى پارلامەنت سەناتىنىڭ ءباسپاسوز قىزمەتى.
سەنات قازاقستان مەن رەسەي اراسىنداعى «تۋيمازى – ومبى – نوۆوسيبيرسك-2» جانە «ومبى – پاۆلودار» ماگيسترالدىق مۇناي قۇبىرلارىنداعى تەحنولوگيالىق مۇنايدىڭ مارتەبەسىن ايقىنداۋ تۋرالى كەلىسىمدى راتيفيكاتسيالادى.
قۇجاتتىڭ ماقساتى قازاقستاندىق تاراپتىڭ («قازترانسويل» اق) 141728 توننا مولشەرىندەگى جانە رەسەيلىك تاراپتىڭ («ترانسنەفت – ۋرال» اق – «ترانسنەفت» جاق-نىڭ ەنشىلەس قوعامى) 62048 توننا مولشەرىندەگى تەحنولوگيالىق مۇنايعا مەنشىك يەسى قۇقىقتارىن راستاۋ بولىپ تابىلادى. كەلىسىم بۇگىنگى كۇندە ءىس جۇزىندە بار مۇنايدىڭ اتالعان ۇيىمدارعا تيەسىلىگىن زاڭدى تۇردە بەكىتەدى, ال قۇجاتتا كورسەتىلگەن كەستە مۇنايدى مەنشىك يەلەرىنە بەرۋ ءۇشىن قاجەتتى ازاماتتىق-قۇقىقتىق جانە ۇيىمدىق راسىمدەردى جەڭىلدەتۋ مەن بارىنشا تومەندەتۋگە مۇمكىندىك بەرەدى.
پالاتا قىلمىستىق ىستەر بويىنشا زاتتاي دالەلدەمەلەر بولىپ تابىلاتىن ەسىرتكى قۇرالدارىن, پسيحوتروپتىق زاتتار مەن ولاردىڭ پرەكۋرسورلارىن, اتىس قارۋىن, ونىڭ نەگىزگى بولىكتەرىن, وق-دارىلەردى, جارىلعىش زاتتار مەن جارعىش قۇرىلعىلاردى بەرۋ ءتارتىبى تۋرالى حاتتامانى راتيفيكاتسيالادى.
حاتتاما قۇزىرەتتى ورگانداردىڭ ءوزارا ءىس-قيمىل جاساۋىن, قىلمىستىق ىستەر بويىنشا زاتتاي دالەلدەمەلەر بولىپ تابىلاتىن زاتتاردى قىلمىستىق پروتسەستە پايدالانۋ ءۇشىن ولاردى بەرۋ تۋرالى سۇراۋ سالۋلاردى رەسىمدەۋ جانە ورىنداۋ ءتارتىبىن, سونداي-اق سۇراۋ سالۋدى ورىنداۋدان باس تارتۋ نەگىزدەرىن ايقىندايدى.
سونىمەن قاتار ول جوعارىدا تىزبەلەنگەن زاتتاي دالەلدەمەلەردى حاتتاماعا قاتىسۋشىلاردىڭ مەملەكەتتىك شەكارالارى ارقىلى الىپ ءوتۋ تۋرالى ەرەجەنى, ولاردىڭ ساقتالۋىن جانە قايتارىپ بەرىلۋىن قامتاماسىز ەتۋ ءتارتىبىن بەكىتەدى.
حاتتاما ەسىتكىلەردىڭ زاڭسىز اينالىمىنا بايلانىستى قىلمىستاردىڭ الدىن الۋداعى, ولاردى اشۋ مەن تەرگەپ-تەكسەرۋدەگى ىنتىماقتاستىقتى جانداندىرا تۇسۋگە ىقپال ەتەتىن بولادى.
وتىرىستا قازاقستان ۇكىمەتى مەن حالىقارالىق قىزىل كرەست كوميتەتىنىڭ اراسىنداعى قازاقستان رەسپۋبليكاسىنداعى حالىقارالىق قىزىل كرەست كوميتەتى وكىلدىگىنىڭ مارتەبەسى, ارتىقشىلىقتارى جانە يممۋنيتەتتەرى تۋرالى كەلىسىم دە راتيفيكاتسيالاندى.
قازىرگى ۋاقىتتا حقكك-ءنىڭ الەمنىڭ 90-نان استام ەلدەرىندە ءوز وكىلدىكتەرى بار, ول ولارمەن ەكىجاقتى كەلىسىمدەردىڭ دەڭگەيىندە قارىم-قاتىناس جاسايدى, بۇل ەلدەردە دە حقكك-ءنىڭ حالىقارالىق قۇقىق سۋبەكتىلىگى مويىندالادى.
قۇجاتتىڭ قابىلدانۋى حقكك تۇراقتى كەڭسەسىنىڭ اشىلۋى ءۇشىن قاجەتتى جاعدايلاردى جاساۋعا, ونىڭ ىشىندە قۇقىق سۋبەكتىلىگىن مويىنداۋعا, ارتىقشىلىقتار مەن يممۋنيتەتتەر بەرۋگە, سالىقتاردان بوساتۋعا, ءۇي-جايلارىنا باسا كوكتەمەۋدى قامتاماسىز ەتۋگە جانە حقكك مانداتىنا سايكەس قازاقستاندا ونىڭ قىزمەتىن جۇزەگە اسىرۋعا جاردەمدەسەتىن بولادى.
حقكك وكىلدىگىن اشۋ مەملەكەت باسشىسىنىڭ كوپجاقتى ديپلوماتيا حابىن قۇرۋ تۋرالى باستاماسىن ىسكە اسىرۋعا ىقپال ەتەدى.
وتىرىس بارىسىندا سەناتورلاردىڭ دەپۋتاتتىق ساۋالدارى جاريا ەتىلدى. داريعي نازارباەۆا ەسىرتكى اسەرى بار «ترامادول» ءدارىسىن دارىگەردىڭ رۇقساتىنسىز ساتۋعا تىيىم سالۋ تۋرالى; بىرعانىم ءايتىموۆا مەن داريعا نازارباەۆا مۇعالىمدەر مەن دارىگەرلەرگە تۇرعىن ءۇيدى جەڭىلدىكپەن ءبولۋ قاجەتتىگى جانە ارنايى ەكونوميكالىق ايماقتارداعى وتاندىق كىتاپ شىعارۋ, كينو ءوندىرىسى مەن باسپاحانا قىزمەتتەرىنىڭ جۇمىسى; ءابدالى نۇراليەۆ جامبىل وبلىسىنىڭ جۋالى اۋدانىنداعى اۋىلداردى گازداندىرۋ; ەربولات مۇقاەۆ جالپاقتال (باتىس قازاقستان وبلىسى) سۋ قويماسىنىڭ قۇرىلىسىن رەسپۋبليكالىق بيۋدجەت ەسەبىنەن قارجىلاندىرۋ; مۇراتباي جولداسباەۆ اۋىل تۇرعىندارىن تازا اۋىز سۋمەن قامتاماسىز ەتۋ جوبالارىن قارجىلاندىرۋ تۋرالى ساۋالدار جولدادى.