بۇل كۇندەرى رەسەيدىڭ حانتى-مانسيسك قالاسىندا شاحماتتان ايەلدەر اراسىنداعى الەم چەمپيوناتى وتۋدە. بۇل جارىستا 28 مەملەكەتتەن كەلگەن 64 ويىنشىلار باق سىناۋدا.
جەر جاھاننىڭ ەڭ ۇزدىك شاحماتشىلارى باس قوسقان بايراقتى باسەكە نوكاۋت جۇيەسى بويىنشا وتۋدە. ياعني, جەڭىسكە جەتكەن ۇمىتكەر كەلەسى كەزەڭگە جولداما السا, جەڭىلگەنى سول مەزەتتە جارىستى اياقتايدى. بۇل جارىسقا قازاقستاننىڭ ءۇش سپورتشى اتتاندى. ولار – دينارا سادۋاقاسوۆا, جانسايا ابدىمالىك جانە گ ۇلىسحان ناقباەۆا. وكىنشىكە قاراي, گ ۇلىسحاننىڭ حانتى-مانسيسكىدە جولى بولمادى. اسا شيەلەنىستى وتكەن باسەكەدە ول رەسەيلىك اليسا گاللياموۆادان ۇتىلىپ قالىپ, كورەرمەندەر قاتارىنا قوسىلدى.
ال قالعان ەكى قىزىمىز العاشقى سىناقتان سۇرىنبەي ءوتتى. 22 جاستاعى دينارا سادۋاقاسوۆا يسپانيانىڭ تۋى استىندا كورسەتىپ جۇرگەن 35 جاستاعى گرۋزيالىق شاحماتشى انا ماتنادزەنى ادەمى ۇتتى. ەسەپ – 2:0. 18 جاسار جانسايا 24 جاستاعى ءۇندىستاننىڭ وكىلى پادميني روۋتتان باسىم ءتۇستى. ەسەپ – 1,5:0,5.
قازىرگى كەزدە ەكىنشى كەزەڭگە جولداما العان ويىنشىلار جارىس كورىگىن قىزدىرۋدا. دينارا بولگاريانىڭ بەتكەۇستارى, كەزىندەگى الەم چەمپيونى 39 جاستاعى انتوانەتا ستەفانوۆامەن شەبەرلىك بايقاسۋدا. جانسايانىڭ قارسىلاسى دا وتە مىقتى. قازاق قىزى قىتايدىڭ 33 جاستاعى ساقا ويىنشىسى چجاو سيۋەمەن سايىسقا تۇسۋدە. ولاردىڭ ەكەۋىنىڭ دە قانداستارىمىزدان رەيتينگى جوعارى. سوعان قاراماستان سادۋاقاسوۆا مەن ابدىمالىك اتاقتى شاحماتشىلارعا لايىقتى قارسىلىق كورسەتۋدە. بۇل مەجەدەگى العاشقى پارتيالاردىڭ ەكەۋى دە تەڭ اياقتالدى.
جۇلدە قورى 450 000 اقش دولللارىن قۇراپ وتىرعان ايتۋلى جارىس 23 قاراشادا ءوز مارەسىنە جەتىپ, جاڭا الەم چەمپيونىنىڭ ەسىمى بەلگىلى بولادى.
عالىم سۇلەيمەن,
«ەگەمەن قازاقستان»