الماتى وبلىسىنىڭ اقسۋ جانە سارقان اۋداندارىنا جاڭا اكىم تاعايىندالدى. جاڭا باسشىلاردى ايماق اكىمى اماندىق باتالوۆ تانىستىردى, دەپ حابارلايدى قازاقپارات.
اقسۋ اۋدانىنا اكىم بولىپ ەسىم بازارحانوۆ تاعايىندالدى.
ەسىم سەيىلحان ۇلى بۇعان دەيىن ءتورت جىل بويى اۋدان اكىمىنىڭ ورىنباسارى قىزمەتىن اتقارعان. ەسىم بازارحانوۆ 1978 جىلى تۋعان. 1999 جىلى د.قوناەۆ اتىنداعى قازاق گۋمانيتارلىق ينستيتۋتىندا, 2009 جىلى ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە «زاڭگەر», «قارجى باكالاۆرى» ماماندىقتارى بويىنشا وقىعان. ەڭبەك جولىن 2002 جىلى الماتى وبلىسىنداعى قاراتال اۋدانى پروكۋرورىنىڭ كومەكشىسى قىزمەتىنەن باستاعان. 2003 جىلى «پاۆلودار وبلىسىنىڭ پروكۋراتۋراسى» مەملەكەتتىك مەكەمەسىندە قىلمىستىق ىستەر بويىنشا سوت شەشىمدەرىنىڭ زاڭدىلىعىن قاداعالاۋ باسقارماسىنىڭ پروكۋرورى بولدى. 2003-2006 جىلدارى استانا قالاسىنداعى قازاقستان رەسپۋبليكاسى ادىلەت مينيسترلىگىنىڭ باقىلاۋ جانە تالداۋ باسقارماسىنىڭ نورماتيۆتىك قۇقىقتىق اكتىلەردى باقىلاۋ ءبولىمىنىڭ باسشىسى قىزمەتىن اتقارىپ, 2006 جىلى قازاقستان رەسپۋبليكاسى قارجى مينيسترلىگىنىڭ استانا قالاسى بويىنشا دارمەنسىز بورىشكەرلەرمەن جۇمىس كوميتەتى باسشىسىنىڭ ورىنباسارى قىزمەتىنە تاعايىندالدى. قازاقستان رەسپۋبليكاسى تابيعي مونوپوليالاردى رەتتەۋ اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى قىزمەتىن دە اتقارعان. ال 2014 جىلدان وسى كۇنگە دەيىن اقسۋ اۋدانى اكىمىنىڭ ورىنباسارى بولدى.
ەستەرىڭىزگە سالا كەتەيىك, بۇعان دەيىن اقسۋ اۋدانىنىڭ اكىمى ادىلبەك دالباعاەۆ بولدى. اۋداندى بەس جىلدان اسا باسقارعان ادىلبەك ەگەۋبەك ۇلى باسقا قىزمەتكە اۋىسىنا بايلانىستى ءوز ەركىمەن اۋدان اكىمى قىزمەتىنەن بوساتىلدى.
سارقان اۋدانىنىڭ اكىمى بولىپ مارات رازبەكوۆ تاعايىندالدى. 1966 جىلى تۋعان. ول بۇعان دەيىن وسى اۋدان اكىمىنىڭ ورىنباسارى قىزمەتىن اتقارعان. ماماندىعى - ەكونوميست-بۋحگالتەر. ەڭبەك جولىن 1983 جىلى سارقان شاراپ زاۋىتىنىڭ جۇمىسشىسى بولىپ باستاعان. 1998 جىلى سارقان اۋدانى بويىنشا سالىق ينسپەكتسياسىنىڭ سالىق ينسپەكتورى, 2002-2003 جىلدارى الماتى وبلىسى بويىنشا سالىق كوميتەتىنىڭ ءبولىم باستىعى, 2003-2004 جىلدارى الماتى وبلىسى بويىنشا سالىق كوميتەتىنىڭ وندىرىستىك ەمەس تولەمدەر باسقارماسى ۋاكىلەتتى ورگاندارمەن جۇمىس ءبولىمىنىڭ باستىعى, 2004-2008 جىلدارى الماتى وبلىسى بويىنشا سالىق كوميتەتىنىڭ باسقارما باستىعى, 2008-2009 جىلدارى الماتى وبلىسى بويىنشا سالىق دەپارتامەنتىنىڭ سالىق اكىمشىلىگىن جۇرگىزۋ باسقارماسىنىڭ باستىعى, 2009-2010 جىلدارى تالدىقورعان قالاسى بويىنشا سالىق باسقارماسىنىڭ باس سالىق ينسپەكتورى, 06.04.2010 -13.12.2010 جىلى سارقان اۋدانى بويىنشا سالىق باسقارماسى باستىعىنىڭ ورىنباسارى, 13.12.2010 جىلدان وسى ۋاقىتقا دەيىن سارقان اۋدانى اكىمىنىڭ ورىنباسارى قىزمەتىن اتقاردى.
ال بۇعان دەيىن اۋدان باسشىسى بولعان ەرعازى قوشانبەكوۆ زەينەت دەمالىسىنا شىقتى.