استانا قالاسىنىڭ دوستىق ۇيىندە نەمىس مادەنيەتى كۇنى بولىپ ءوتتى. بۇل ءىس-شاراعا ەلوردالىق قازاقستان حالقى اسسامبلەياسى قولداۋ ءبىلدىردى.
«بەرلينسكايا پولكا» اتاۋىمەن وتكىزىلگەن فلەشموب مەرەكەلىك كەشتى جانداندىرىپ جىبەردى. ودان ءارى قوناقتار دوستىق ۇيىندەگى نەمىس مادەنيەتى كۇنىنە ارنالعان كورمەنى ارالاپ, قازاقستان نەمىستەرىنىڭ تاريحى جونىندەگى ماعلۇماتقا قانىقتى. ول بويىنشا ءار جىلدارى كوپتەگەن نەمىستەر مەملەكەتتىك ناگرادالارمەن ماراپاتتالعان. سونىڭ ىشىندە جيىرماسى سوتسياليستىك ەڭبەك ەرى اتاعىنا لايىق بولىپ تانىلعان.
ءىس-شاراعا كەلۋشىلەر «قازاقستانداعى نەمىستەر» اتاۋىمەن ۇيىمداستىرىلعان كورمە ارقىلى استانا مەن اقمولا وبلىسىنداعى نەمىستەر تاريحى جونىنەن تىڭ دەرەكتەرمەن تانىسىپ شىقتى.
ءىس-شارا بارىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى البەرت راۋ مەن استانا قالاسى قازاقستان حالقى اسسامبلەياسى حاتشىلىعىنىڭ مەڭگەرۋشىسى لياززات قۇسايىنوۆا تاعىلىمدىق ءمانى بار كەشتىڭ ماڭىزى تۋرالى ايتىپ بەردى.
نەمىس مادەنيەتى كۇنى باعدارلاماسى بويىنشا دوستىق ۇيىندەگى ءۇش زالدا ءبىر مەزەتتە وتكىزىلگەن ۆوكالدىڭ, ءبيدىڭ, قولدانبالى ونەردىڭ جانە اسپازدىق ءىستىڭ قىر-سىرىن مەڭگەرۋگە ارنالعان شەبەرلىك ساباقتارى جۇرتشىلىقتىڭ قىزىعۋشىلىعىن تۋدىردى.
ءبىر سوزبەن ايتقاندا, كەلۋشىلەر نەمىس مادەنيەتىمەن, ولاردىڭ سالت-داستۇرلەرىمەن جانە انا تىلىمەن كەڭىرەك تانىسىپ, مول ماعلۇمات الدى. مەرەكەلىك كەش سوڭى كونتسەرتتىك باعدارلاماعا ۇلاستى.