«قازاقستان بارىسى», «الەم بارىسى», «ەۋرازيا بارىسى» تۋرنيرلەرىنىڭ جەڭىمپازى, قازاق كۇرەسىنەن الەمنىڭ ءتورت دۇركىن چەمپيونى ايبەك نۇعىماروۆ تۋعان اۋىلى – قۇندىزدىعا ەرەكشە سىي جاسادى. داڭقتى بالۋان «تۋعان جەر» باعدارلاماسى اياسىندا جەرلەستەرىنە 50-دەن استام بالاعا شاقتالعان سپورت كەشەنىن تارتۋ ەتتى.
سونىمەن قاتار قۇندىزدى اۋىلىندا «كۇلدىر دە كۇلدىر كىسىنەتىپ, كۇرەڭدى مىنەر مە ەكەنبىز. كۇدەرىدەن باۋ تاعىپ, اق كىرەۋكە كيەر مە ەكەنبىز» دەپ جىرلاعان باتىر, قولباسشى اقتامبەردى جىراۋدىڭ كەۋدە ءمۇسىنى ورناتىلدى. تۇعىرىن قوسا العاندا 4 مەترگە جۋىقتايتىن ەسكەرتكىشتىڭ اۆتورى – جاس ءمۇسىنشى نۇربول قاليەۆ.
اباي اۋدانىنىڭ əكىمى جارقىنبەك بايسابىروۆ بيىل «رۋحاني جاڭعىرۋ» باعدارلاماسى اياسىندا 75 ميلليون تەڭگەگە جۋىق دەمەۋشىلىك كومەك كورسەتىلگەنىن ايتادى. ال قۇندىزدىدا بوي كوتەرگەن سپورت نىسانى مەن جىراۋدىڭ بيۋستىنە 16 ميلليون تەڭگەدەن استام قاراجات جۇمسالىپتى. «قايدا جۇرسەك تە تۋعان جەردىڭ تۋىن بيىك ۇستاۋعا تىرىسامىز. ۇلىلار ەلىنىڭ تۋماسى ەكەنىمدى اركەز ماقتان ەتەمىن. سپورت كەشەنىنىڭ سالىنۋىنا جەرگىلىكتى كاسىپكەرلەر دە قولۇشىن سوزدى, باتىردىڭ كەۋدە ءمۇسىنىنىڭ قويىلۋىنا اقتامبەردى بابامىزدىڭ ۇرپاقتارى, داۋلەت تۇرلىحانوۆ اعامىز دا قولداۋ كورسەتتى. بۇل اۋىلدان ءəلى دە تالاي چەمپيوندار شىعاتىنىنا بەك سەنىمدىمىن», دەيدى ايبەك نۇعىماروۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
اباي اۋدانى,
قۇندىزدى اۋىلى