وتاندىق نارىقتاعى كادەسىيلاردىڭ 80%-ءى شەتتەن كەلەدى. جەرگىلىكتى وندىرۋشىلەردىڭ بۇل باعىتتا جۇمىستانۋعا قۇلشىنىستارى كەم بە, الدە جاسالعان بۇيىم ءوز باعاسىن اقتاماي ما؟ اتىراۋداعى «ەتالون» جارناما اگەنتتىگى وسى ساۋالعا جاۋاپ ىزدەپ, ەڭبەكتەنۋدى ءجون كورىپتى. ناتيجە جامان ەمەس.
بەس جىلدان بەرى پوليگرافيا جانە سىرتقى جارناما بويىنشا قىزمەت كورسەتىپ كەلە جاتقان اگەنتتىك تاريحي جادىگەرلەردىڭ كوشىرمەلەرىن جاساۋدى اتىراۋدا العاش بولىپ قولعا العان. «قازاقستاننىڭ ۇزدىك تاۋارى» رەسپۋبليكالىق كورمە-بايقاۋىنىڭ وبلىستىق كەزەڭىنە جەرگىلىكتى ماتەريالدان دايىندالعان كادەسىي ۇسىنىپ, ۇزدىكتەر قاتارىنان كورىندى.
– قازىر جارناما اگەنتتىگىمىز «سامۇرىق-قازىنا» قورىنىڭ الەۋەتتى جەتكىزۋشىلەر تىزىمىندە. 300-گە جۋىق بۇيىم ءتۇرىن جاسايمىز. جىل سايىن 40 جاڭا بۇيىم ازىرلەيمىز. باعا مەن ساپا كورسەتكىشتەرىنىڭ وڭتايلى قاتىناسىنا سايكەس, كاسىپورىن ونىمدەرىنىڭ كوپشىلىگى الىس جانە جاقىن شەتەلدەردىڭ نارىقتارىندا تابىستى باسەكەلەسە الادى دەپ سانايمىز», – دەيدى مەكەمە باسشىسى اسقار ساپپاەۆ.
«ەتالوننىڭ» كادەسىيلارى اعاشتان, ورگانيكالىق شىنىدان, باسقا دا ماتەريالداردان دايىندالادى جانە ارقايسىنا دارا ديزاين قولدانىلۋىمەن ەرەكشە.
باقىتگۇل باباش,
«ەگەمەن قازاقستان»
اتىراۋ