اتباسار قالاسىندا بال كۇلكىلى بالالار جينالىپ ويىن-ساۋىق وتكىزەتىن, وي-ءورىسىن جەتىلدىرەتىن ورتالىق اشىلدى.
ورتالىقتىڭ ءبىرىنشى قاباتىندا اياعىن اپىل-تاپىل باسقان بۇلدىرشىندەرگە ارنالعان اينالمالى اتكەنشەك, ءارتۇرلى ويىن اۆتوماتتارى, اۆتودروم, بي الاڭى, شارلار انيماتورى, كومپيۋتەر زالى بار. ال ەكىنشى قاباتتا بەس جاسقا دەيىنگى بالاقاندارعا ارنالعان باسسەين-لابيرينت ورنالاسقان. ەكپىن ءتۇسىرىپ ايتا كەتەتىن ءبىر ماسەلە – ورتالىقتىڭ اسەمدىگى. قاي تاراپقا قاراساڭ دا كوز سۋاراتىن كوركەمدىكتى بايقار ەدىڭىز. بارلىق الاڭ اسەم بەزەندىرىلگەن. ىشىنە كىرگەننەن-اق جانىڭ جاي تاباتىن جايلىلىق بالالاردىڭ ۋاقىتتارىن كوڭىلدى وتكىزۋلەرىنە مول مۇمكىندىك بەرەدى.
ەكىنشى قاباتتا جەتكىنشەكتەرگە ارنالعان تاۋارلار ساتىلادى. باعاسى دا قولجەتىمدى. ونىڭ ىشىندە سىرتقى بەينەسى ادەمى كەسكىندەلگەن ءارالۋان تاقىرىپتاعى ەرتەگى كىتاپتار, ءتۇرلى ويىنشىقتار, ءتىپتى كيىم-كەشەكتەرگە دەيىن بار. بۇل جەردە جالعىز ويىن تۇرلەرى عانا ەمەس, بالالاردىڭ تۋعان كۇندەرىن ءوز قۇربىلارىمەن اتاپ ءوتۋى ءۇشىن تاپسىرىس بەرۋگە دە بولادى. جاڭا ورتالىقتىڭ يەسى, جەرگىلىكتى كاسىپكەر ايگۇل ايتەەۆا ءوز قاراجاتىنا ءزاۋلىم ورتالىق سالىپ, بولاشاق يەلەرىنىڭ الاڭسىز ءوسىپ جەتىلۋىنە ءتاپ-ءتاۋىر مۇمكىندىك تۋدىرىپ وتىر.
بايقال ءبايادىل,
«ەگەمەن قازاقستان»
اقمولا وبلىسى,
اتباسار اۋدانى