كاسىپقوي بوكستا جەڭىلىس دەگەندى بىلمەي كەلگەن گەننادي گولوۆكين مەكسيكالىق ساۋل الۆارەسكە جەڭىلدى. 12 راۋندتىق ايقاستا تورەشىلەردىڭ شەشىمى بويىنشا «كانەللو» باسىم ءتۇستى. بوكس كەشى اياقتالىسىمەن كوپتەگەن سۇقباتتار مەن ساراپتامالار جارىق كوردى.
ونىڭ ەڭ قىزىعى ءۇشىنشى كەزدەسۋ توڭىرەگىندە. جانكۇيەرلەر دە تريلوگيا بولعانىن تالاپ ەتىپ, ەكى بوكسشىنىڭ قايتا كەزدەسكەنىن قالايدى. اتاقتى بوكسشى دجو فورمان «الۆارەستى جەڭىسىمەن قۇتتىقتايمىن. تاماشا جەڭىس. بىراق, مەنىڭ ويىمشا بۇل ەكەۋى تاعى ءبىر رەت كەزدەسكەنى دۇرىس» دەپتى. شوۋدى جاقسى كورەتىن امەريكالىق تەلەراديولار دا ءوز پىكىرلەرىن ايتتى. «ەكەۋى دە پانچەر. ۇنەمى نوكاۋتتارمەن جەڭىسكە جەتەدى. ءبىرىن ءبىرى سۇلاتىپ سالعانىن كورگىمىز كەلەدى» دەگەن سىڭايدا ءسوز قوزعادى. كەزدەسۋ اياقتالىسىمەن گەننادي گولوۆكين تىلشىلىرمەن كەزدەسىپ, العاشقى جەڭىلىسى جايلى ايتتى. «مەن كەزدەسۋدە كىم جەڭگەنى جايلى داۋ قوزعامايمىن. تورەشىلەر «كانەللو» جەڭدى دەپ شەشتى. دەمەك, قارسىلاسىمدى جەڭىسىمەن قۇتتىقتايمىن! مەن ءوزىمدى وعان قاراعاندا مىقتىراق بوكستاسىپ ءجۇرمىن دەپ ويلاپپىن. ەڭ باستىسى فاناتتارعا ۇناعان سەكىلدى», دەدى. تىلشىلەر تاعى ءبىر كەزدەسۋ بولسا رينگكە شىعۋعا قالاي قارايسىز دەپ ەدى گەنا «كەزدەسۋدىڭ شارتتارى جاقسى بولسا, نەگە شىقپاسقا؟!» دەپ تاعى ءبىر رەماتچقا قارسى ەمەستىگىن ءبىلدىردى.
ال ودان كەيىن كەزەك «كانەللوعا» كەلدى. ول الدىمەن وسى ەكىنشى كەزدەسۋدە انىق جەڭىسكە جەتكەنىن ايتىپ, گولوۆكيندى ۇپايمەن ۇتقانىنا قۋانىشتىمىن دەدى. سونىمەن قاتار, گولوۆكينمەن ءۇشىنشى كەزدەسۋگە شىعۋدان دا باس تارتپايتىنىن جەتكىزدى. دەمەك, امەريكا ءباسپاسوزى قازىر وسى بوكسشىنىڭ تاعى ءبىر كەزدەسۋى بولۋى ىقتيمال ەكەنىن جارىسا جازۋدا.
36 جاستاعى بوكس ارداگەرى سانالاتىن گولوۆكيننىڭ جەڭىلۋىنە بايلانىستى ەڭ كوپ كەزدەسەتىن اقتالۋ ونىڭ جاسى بولىپ تۇر. قارسىلاسى ساۋل الۆارەس نەبارى 28 جاستا. گولوۆكيننەن 8 جاس كىشى. كۇش-قايراتى تاسىپ, ناعىز تولىسىپ تۇرعان شاعى. كۇن وتكەن سايىن قازاقستاندىقتىڭ سوققىسى السىرەپ, جىلدامدىعى تومەندەيتىنى انىق, ال مەكسيكالىق ءالى بىرنەشە جىل كەرىسىنشە كۇشەيە بەرەدى.
بۇل جولى دا تەلەكورسەتىلىم رەيتينگى جوعارى بولعان, ساتىلىم ءارى اقىلى كورسەتىلىمدەر دە قوماقتى قارجى تۇسىرگەن. جارنامالىق جوبالاردىڭ تۇگەلى ىسكە استى, بۋكمەكەرلىك كەڭسەلەر دە پايداعا كەنەلدى. ۇيىمداستىرۋشىلار ەكى پروموۋتەرلىك كومپانيا كەلىسىمگە كەلسە, تاعى ءبىر مارتە كەزدەسۋ وتكىزىپ بەرەمىز دەپ قۇلشىنىپ وتىر. اراعا اپتا سالعان سوڭ, بارلىعى تىنىشتالىپ, ەكى بوكسشى مەدەتسينالىق تەكسەرىستەن وتكەن سوڭ, شامالارىن بولجاي كەلە قايتا ايقاسامىز دەپ شىعىپ جاتسا تاڭ قالمايمىز. ءالىپتىڭ ارتىن باعايىق. سەبەبى, مۇنداي دەڭگەيدە بوكستاساتىن ەكەۋىنە باسقا قارسىلاس تا جوق.
ەرمۇحامەد ماۋلەن,
«ەگەمەن قازاقستان»