اۆستريالىق Master Concept كومپانياسى الماتى وبلىسىنىڭ اۋماعىندا تاۋ ءتۋريزمىن دامىتۋعا باعىتتالعان جوباعا قاتىسۋعا ىنتالى. بۇل جايىندا وبلىس اكىمى اماندىق باتالوۆتىڭ ينۆەستورلارمەن كەزدەسۋى بارىسىندا ءمالىم بولدى.
دۇنيەجۇزى نارىعىندا 18 جىلدان بەرى جوبالاۋمەن جانە جوسپارلاۋمەن اينالىساتىن Master Concept كومپانياسى نەگىزىنەن تۋريستىك نىسانداردى ينۆەستيتسيالايدى. كومپانيانىڭ رەسەيدەگى جۇمىس تاجىربيەسى 10 جىل بولسا, قازاقستاندا 6 جىلدان بەرى قىزمەت كورسەتىپ كەلەدى. كومپانيا وكىلى, ساۋلەتشى گەرنوت ليايتنەردىڭ ايتۋىنشا, Master Concept تالعار اۋدانى اۋماعىنداعى «لەسنايا سكازكا» كۋرورتىن وتباسىلىق-سپورتتىق دەمالىس ورنى رەتىندە دامىتۋعا كىرىسپەك. قازىر كومپانيا الماتى وڭىرىندەگى تاۋ ءتۋريزمى جوسپارىنا قاجەتتى زەرتتەۋ جۇمىستارىن باستاعان. بۇل ورايدا ەكى مودەل قاراستىرىلىپ وتىر. ءبىرىنشىسى, بۇرىننان بار, جۇمىس ىستەپ تۇرعان كۋرورتتاردى ودان ءارى دامىتۋدىڭ الەۋەتىن زەردەلەۋ, ەكىنشىسى قاي جەرلەردە تۋريستىك باعىتتاردى دامىتۋعا بولاتىنىن ءبىلۋ ءۇشىن تاۋلى جەرلەردى زەرتتەۋ.
ال ەكى جاقتى كەزدەسۋگە قاتىسقان الماتى ءوڭىرىنىڭ تۋريستىك كلاستەرى قاۋىمداستىعىنىڭ قۇرىلتايشىسى رايىمبەك باتالوۆ تاۋ ءتۋريزمىنىڭ دامۋى شاعىن جانە ورتا بيزنەستىڭ دامۋىنا, قىزمەت كورسەتۋ سالاسىنا تىڭ سەرپىن بەرەتىنىن ايتادى.
- تاۋ ءتۋريزمى دەگەندە تەك الماتى ماڭىنان وزگە, شارىن شاتقالىن, لەپسى وڭىرىندەگى, رايىمبەك اۋدانىنداعى تاۋلى وڭىرلەردى دە تولىق قامتۋعا ءتيىسپىز. تاۋلى ايماقتاردىڭ مۇمكىندىكتەرىن بۇگە-شىگەسىنە دەيىن زەرتتەپ, تاني الاتىن مامانداردىڭ ءبىلىمى مەن بىلىگىن پايدالانا ءبىلۋىمىز كەرەك. جالپى تابيعي-كليماتتىق ەرەكشەلىكتەرىنە بايلانىستى الماتى وڭىرىندەگى تاۋ تۋريزمىندە قالاعا قاراعاندا الماتى وبلىسىنىڭ ۇلەسى الدەقايدا باسىم. سوندىقتان قىستا عانا ەمەس, جىل بويى ۇزدىكسىز جۇمىس ىستەيتىن تاۋ كۋرورتتارىن دامىتۋدىڭ جوسپارلارى دا جاسالۋى ءتيىس, تەحنيكالىق-ەكونوميكالىق نەگىزدەمەلەر ازىرلەۋگە قانشا قاراجات قاجەت ەكەنىن دە ەسەپتەۋىمىز قاجەت. ودان ءارى بۇل جوبانىڭ وپەراتورى ناقتى قاي مەكەمە بولاتىنىن دا انىقتاۋىمىز كەرەك, - دەدى جيىندى قورىتقان وبلىس باسشىسى ا. باتالوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى