«ديپلوماتيا جارشىسى» جۋرنالىنىڭ ءۇشىنشى باسىلىمى كۇزگى ساياسي ماۋسىمنىڭ ماڭىزدى وقيعالار شەڭبەرىندە جارىق كوردى, ونىڭ ىشىندە الەمدىك جانە ءداستۇرلى دىندەر كوشباسشىلارىنىڭ VI سەزى مەن «بەلدەۋ مەن جول» باستاماسىنىڭ 5-جىلدىعىنا باسا نازار اۋدارىلدى.
«پرەزيدەنت نۇرسۇلتان نازارباەۆتىڭ سىرتقى ساياساتى قازاقستان رەسپۋبليكاسىنىڭ ۇلتتىق مۇددەلەرىن تۇراقتى جانە دايەكتى تۇردە قورعاۋ, ەلىمىزدىڭ تۇراقتى دامۋى ءۇشىن قولايلى سىرتقى ورتانى قالىپتاستىرۋ, ينۆەستيتسيالار تارتۋ, وڭىرلىك كووپەراتسيا جانە شەتەلدەگى قازاقستان ازاماتتارىنىڭ قۇقىقتارىن قورعاۋ بولىپ تابىلادى. سىرتقى ساياساتتىڭ مىندەتتەرىن ناق وسىلاي تۇسىنۋگە بايلانىستى مەملەكەت باسشىسى حالىقارالىق باستامالاردى كوتەرەدى», – دەپ اتاپ ءوتتى سىرتقى ىستەر ءمينيسترى قايرات ءابدىراحمانوۆ «ديپلوماتيا بەيبىتشىلىك, ىنتىماقتاستىق جانە دامۋ قىزمەتىندە» اتتى ماقالاسىندا.
پرەزيدەنت نۇرسۇلتان نازارباەۆ باستاماسىمەن قۇرىلعان الەمدىك جانە ءداستۇرلى دىندەر كوشباسشىلارىنىڭ سەزى الەمدە تەڭدەسى جوق بىرەگەي فورۋم بولىپ تابىلادى. ءدىن مەن ساياساتتىڭ جانە حالىقارالىق قاۋىپسىزدىكتىڭ ءبىر-بىرىمەن تىعىز بايلانىسى فورۋم يدەياسىنىڭ وزەكتىلىگىن جىل سايىن ارتتىرۋدا. اتالعان باسىلىمدا قازاقستان رەسپۋبليكاسى پارلامەنتى سەناتىنىڭ توراعاسى, سەز حاتشىلىعىنىڭ باسشىسى قاسىم-جومارت توقاەۆتىڭ 15 جىلدىق تاريحى بار فورۋمنىڭ ءرولى, دامۋى مەن نەگىزگى جەتىستىكتەرى تۋرالى ماقالاسى جاريالاندى.
«بەلدەۋ مەن جول» اۋقىمدى ەكونوميكالىق جوباسى كونتينەنتىمىزدىڭ ساۋدا-لوگيستيكالىق كارتاسىنىڭ ماڭىزدى بولىگى بولىپ تابىلادى. بۇل جوبا «نۇرلى جول» مەملەكەتتىك باعدارلاماسى, «قورعاس – شىعىس قاقپاسى» ەكونوميكالىق ايماعى جانە احقو-مەن بىرگە قازاقستان ءۇشىن ەۋرازياداعى ەڭ ماڭىزدى ساۋدا, لوگيستيكالىق جانە قارجى حابى بولۋعا مۇمكىندىك بەرەدى. وسىعان بايلانىستى جارىق كورگەن باسىلىمدا بىرقاتار ماقالالار قازاقستان-قىتاي ىنتىماقتاستىعى مەن «بەلدەۋ مەن جول» باستاماسى تاقىرىبىنا ارنالعان.
سونىمەن قاتار, جۋرنالدا فرانتسيامەن ستراتەگيالىق ارىپتەستىك تۋرالى شارتتى جۇزەگە اسىرۋدىڭ العاشقى ونجىلدىعىنىڭ قورىتىندىلارى, قازاقستاننىڭ شەتەلدەگى كونسۋلدىق قىزمەتى, احقو-نىڭ قارجىلىق كوميتەتىنىڭ ءرولى, قازاقستانداعى ءىرى نەمىس ينۆەستورى Knauf كومپانياسى تۋرالى ماتەريالدار جانە حالىقارالىق سيپاتتاعى باسقا دا وزەكتى تاقىرىپتار وقىرمان قاۋىمعا ۇسىنىلىپ وتىر.
«ديپلوماتيا جارشىسى» قازاق, ورىس («ۆەستنيك ديپلوماتي») جانە اعىلشىن (The Diplomatic Herald of Kazakhstan) تىلدەرىندە باسىپ شىعارىلادى.