پاۆلودار وبلىسىنا جاساعان جۇمىس ساپارى اياسىندا پرەمەر-مينيستر باقىتجان ساعىنتاەۆ مەديتسينالىق جەدەل جاردەم ستانتسياسىنا بارىپ, ماماندارمەن مەديتسينالىق قىزمەت كورسەتۋ ساپاسىن ارتتىرۋ جايىن تالقىلادى.
باقىتجان ساعىنتاەۆ مەديتسينا نىسانى جۇمىسى نەگىزىندە وڭىردەگى دەنساۋلىق ساقتاۋ سالاسىنىڭ تسيفرلاندىرۋ بارىسىمەن تانىستى. جەدەل جاردەم بريگادالارىنىڭ جۇمىسىن ۇيلەستىرۋگە كومەكتەسەتىن مەديتسينالىق قۇرىلعىلاردى قاراپ شىقتى. بۇگىندە مەديتسينا ۇيىمىنا 12 جوبا ەنگىزىلگەن. ولاردىڭ ىشىندە باسقارۋ مەن جۇمىس ورنىنىڭ اۆتوماتتاندىرىلعان جۇيەسى, ەلەكتروندى مەديتسينالىق كارتا, ناۆيگاتسيالىق جۇيە, ناۋقاسقا تەزىرەك جەتۋ ءۇشىن بريگادالاردى بارلاۋ, ەكگ-نى قاشىقتان وتۋ سىندى ىڭعايلى جاڭاشىلىق بار. سونىمەن قاتار, ارنايى تەلەمەديتسينا مەن ينتەراكتيۆتىك وقۋ ورتالىعى جۇمىس ىستەيدى. مەكەمەدە ادام ومىرىنە اراشا ءتۇسىپ جۇرگەن 1044 قىزمەتكەر بيىلعى سەگىز اي ىشىندە 177 مىڭ شاقىرتۋعا شىققان.
مەديتسينالىق جەدەل جاردەم مەكەمەسىنىڭ جۇمىسىمەن تانىسقان سوڭ, ب. ساعىنتاەۆ وبلىستىڭ مەديتسينا سالاسى قىزمەتكەرلەرىمەن كورسەتىلەتىن قىزمەتتىڭ ساپاسىن ارتتىرۋ جايىندا كەڭەس وتكىزدى. اسىرەسە, دارىمەن قامتاماسىز ەتۋ, ولاردىڭ باعاسى مەن مەديتسينا ينفراقۇرىلىمى جانە ماماندار بىلىكتىلىگى قىزۋ تالقىلاندى. بالا مەن انا دەنساۋلىعىن قورعاۋ تاقىرىبىنا ەرەكشە كوڭىل ءبولىندى.
دەنساۋلىق ساقتاۋ سالاسىن دامىتۋ اياسىندا قولعا الىنىپ جاتقان شارالار تۋرالى وبلىستىق دەنساۋلىق ساقتاۋ باسقارماسىنىڭ باسشىسى و. مۇقاشەۆ بايانداپ بەردى. كەزدەسۋ قاتىسۋشىلارى: باس دارىگەرلەر, جەدەل مەديتسينالىق كومەك قىزمەتكەرلەرى جانە وبلىستىڭ دەنساۋلىق ساقتاۋ سالاسىنداعى مەملەكەتتىك جانە جەكەمەنشىك مەكەمەلەرىنىڭ قىزمەتكەرلەرى ءوز سوزدەرىندە سالانىڭ وزەكتى ماسەلەلەرىن قوزعادى. پاۆلودار قالاسىنىڭ №5 ەمحاناسىنىڭ دارىگەرى ا. نيزامۋتدينوۆا مەديتسينا قىزمەتكەرلەرىنىڭ ەڭبەك اقى ماسەلەسىن كوتەردى. وبلىستىڭ جەدەل جاردەم ستانتسياسىنىڭ دارىگەرى ا. ەرمەك تراسسالىق مەديتسينالىق-قۇتقارۋ پۋنكتىلەرىنىڭ جۇمىسى تۋرالى ءسوز سويلەدى. پاۆلودار اۋدانى ەمحاناسىنىڭ دارىگەرى گ. قايىرباەۆا مەديتسينا كادرلارىمەن قامتاماسىز ەتۋ تۋرالى ايتتى. سيرەك كەزدەسەتىن اۋرۋلار كەزىندە ءدارى-دارمەكتەرمەن قامتاماسىز ەتۋ ماسەلەسىن پاۆلودار وبلىستىق كارديو ورتالىعىنىڭ كارديولوگى گ. مۇقانوۆا قوزعادى. پاۆلودار وبلىستىق كارديولوگيالىق ورتالىعىنىڭ كارديوحيرۋرگى ا. انتيكەەۆ جوعارى تەحنولوگيالىق مەديتسينالىق قىزمەتتەردى ۇسىنۋ تۋرالى ايتىپ ءوتتى. ال №1 ەمحانا دارىگەرى ا. يسەەۆا ءوز سوزىندە دەنساۋلىق ساقتاۋ جۇيەسىن تسيفرلاندىرۋ پروتسەسىنە توقتالىپ ءوتتى.
قازىرگى تاڭدا پاۆلودار وبلىسىندا 118 مەديتسينالىق ۇيىم جۇمىس ىستەيدى, ولاردىڭ ىشىندە مەملەكەتتىك ۇيىمدار سانى — 42, جەكە مەنشىك نىسانىنىڭ ۇلەسى — 64,4% (76). 2017–2018 جىلداردىڭ قورىتىندىسى بويىنشا ءمجا, جەكەشەلەندىرۋ, سەنىمدى باسقارۋ تەتىكتەرى ارقىلى 7 مەديتسينالىق ۇيىم باسەكەلى ورتاعا بەرىلدى. وبلىستىڭ مەديتسينا ۇيىمدارىندا 8 500-دەن استام ادام, ولاردىڭ ىشىندە 2200 دارىگەر جانە 6 300 ورتا مەديتسينا قىزمەتكەرى جۇمىس ىستەيدى.
وسى جىلدىڭ باسىنان بەرى ءمجا اياسىندا دەنساۋلىق ساقتاۋ نىساندارىن مەديتسينالىق جابدىقپەن جابدىقتاۋ جانە جاڭعىرتۋ ماقساتىندا ەكى جوبا جۇزەگە اسىرىلدى. ينۆەستيتسيالار كولەمى 800 ملن تەڭگەنى قۇرادى. جىل سوڭىنا دەيىن 1,1 ملرد تەڭگەگە ءتورت جوبا ىسكە اسىرىلادى. جەكە ينۆەستيتسيالاردىڭ كولەمى جىلىنا 1,9 ملرد تەڭگەنى قۇرايدى. وسىلايشا, 2017–2018 جىلدارعا ارنالعان ينۆەستيتسيالار 4,1 ملرد تەڭگەنى قۇرايدى.
ءمجا اياسىندا پاۆلودار قالاسىنىڭ №1 قالالىق اۋرۋحاناسىندا, ەكىباستۇز قالالىق اۋرۋحاناسىندا جانە ع. سۇلتانوۆ اتىنداعى وبلىستىق اۋرۋحانادا كومپيۋتەرلىك توموگرافتار ورناتىلدى. بۇل ينسۋلتكە ەرتەرەك دياگنوستيكا جاساۋعا جانە ونى ۋاقىتىلى ەمدەۋگە مۇمكىندىك بەردى, ال بۇنىڭ ناتيجەسىندە — ءولىم-ءجىتىم كورسەتكىشى 13%-عا تومەندەدى. تسيفرلاندىرۋدى ەنگىزۋ قۇجاتتامانى تولتىرۋ ۋاقىتىن قىسقارتۋعا, ەمدەلۋشىنى قاراۋ ۋاقىتىن ۇلعايتۋعا جانە العاشقى دياگنوستيكا ساپاسىن ارتتىرۋعا جول اشتى.
دارىگەرلەردىڭ قويعان سۇراقتارىنا پرەمەر-مينيستر ب. ساعىنتاەۆ, پرەمەر-ءمينيستردىڭ ورىنباسارى ا. جۇماعاليەۆ جانە دەنساۋلىق ساقتاۋ ءمينيسترى ە. ءبىرتانوۆ تۇسىنىكتەمە بەرىپ ءوتتى. كەزدەسۋدىڭ قورىتىندىسى بويىنشا باقىتجان ساعىنتاەۆ دەنساۋلىق ساقتاۋ ءمينيسترى ە. بىرتانوۆقا جانە وبلىس اكىمى ب. باقاۋوۆقا مەديتسينا قىزمەتكەرلەرىنىڭ بىلىكتىلىگىن جوعارىلاتۋ جانە ۇسىنىلاتىن مەديتسينالىق قىزمەتتەردىڭ ساپاسىن ارتتىرۋ بويىنشا بىرقاتار شارالار كەشەنىن ازىرلەۋدى تاپسىردى.