«رۋحاني جاڭعىرۋ» باعدارلاماسى اياسىندا مادەنيەت جانە سپورت مينيسترلىگى ءتىل ساياساتى كوميتەتى مەن ش. شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن وتكەن قازاقستان حالقى تىلدەرىنىڭ حح فەستيۆالى مەملەكەتتىك ءتىلدىڭ قولدانىلۋ اياسىن كەڭەيتۋ , ءتىل مادەنيەتىن كوتەرۋ, قازاق ءتىلى مەن مادەنيەتىنە دەگەن ىقىلاستى ارتتىرۋ ماقساتىن دىتتەدى.
فەستيۆالعا قاتىسقان وبلىس اكىمىنىڭ ورىنباسارى داۋرەن جانداربەك جينالعانداردى ايتۋلى شارانىڭ اشىلۋىمەن قۇتتىقتادى. مەملەكەتتىك ءتىلدى دامىتۋعا جانە ناسيحاتتاۋعا ەلەۋلى قوسقان ءبىر توپ ءتىل جاناشىرلارىنا مادەنيەت جانە سپورت مينيسترلىگىنىڭ, ءتىل ساياساتى كوميتەتىنىڭ قۇرمەت گراموتاسى,ايماق باسشىسىنىڭ قۇرمەت گراموتاسى مەن العىس حاتى تابىستالدى. جەتى اتالىم بويىنشا جەڭىمپاز اتانعان ۇجىمدار ماراپاتتالدى.
قازاقستان حالقى تىلدەرى فەستيۆالىنە ءوڭىرىمىزدىڭ بارلىق وبلىستارىنان جانە الماتى, استانا قالالارىنان اباي اتىنداعى كوركەمسوز وقۋ شەبەرلەرىنىڭ جەڭىمپازدارى كەلىپ, بايقاۋدىڭ ءبىرىنشى كەزەڭىندە قازاقتىڭ بەلگىلى جازۋشىلارىنىڭ پروزالىق شىعارمالارىنان ۇزىندىلەر وقىدى. ەكىنشى كەزەڭ بيىل 125 جىلدىعى تۇركى الەمىندە كەڭ كولەمدە اتاپ وتىلگەن جىر پايعامبارى ماعجان جۇماباەۆتىڭ ولەڭدەرىن مانەرلەپ وقۋعا ارنالدى.
بەلگىلى قوعام قايرەتكەرى الدان سمايىل باستاعان قازىلار القاسى شىعىس قازاقستان وبلىسىنىڭ وكىلى سايا بەكبوسىنوۆا باس جۇلدەگە لايىق دەپ شەشتى. ءبىرىنشى ورىندى اقتوبەلىك التىن قوجانوۆا, ەكىنشى ورىندى ەلوردالىق ومىربەكوۆا قۇلپىناي, ءۇشىنشى ورىندى پاۆلودارلىق ەركەجان تولەۋبەك پەن پەتروپاۆلدىق جاناربەك سەكەل يەلەندى.
جەڭىمپازدار مەن جۇلدەگەرلەر ارنايى ديپلومدارعا, العىس حاتتارعا جانە اقشالاي سىياقىعا يە بولدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى