باقىت سۇلتانوۆ استانادا سالىنىپ جاتقان ءىرى قۇرىلىس الاڭدارىن ارالادى

سونىمەن قاتار باقىت سۇلتانوۆ پرەزيدەنتتىڭ تاپسىرماسى بويىنشا LRT قۇرىلىسىنىڭ ورىندالىپ جاتقانىن تەكسەرىپ, LRT كولىك جۇيەسىنىڭ بىرقاتار جاڭا ستانتسيالارىندا بولدى. قازىرگى تاڭدا قۇرىلىسشىلار ينجەنەرلىك جەلىلەر مەن جەلى قادالارى مەن ارقالىقتارىن دايىنداۋدا.

جوبانى ىسكە اسىرۋ بارىسى تۋرالى استانا قالاسىنىڭ اكىمىنە «LRT قۇرىلىسى جونىندەگى ديرەكتسيا» جشس ديرەكتورى اديلشا ەرمۇحانوۆ باياندادى. جوسپارعا سايكەس, لرت اۋەجاي مەن جاڭا «نۇرلى جول» تەمىرجول ۆوكزالىن بايلانىستىرادى. ەستاكادانىڭ ۇزاقتىعى 22,4 كم, قالا بويىنشا 18 ستانتسيا جانە 19 بىرلىك جىلجىمالى قۇرام بولادى. ايتا كەتەيىك, قۇرىلىس-مونتاج جۇمىستارىنىڭ نەگىزگى جوباسى 2017 جىلى مامىر ايىندا قىتاي كومپانيالارى كاسىپورىندارىنىڭ كونسورتسيۋمى كۇشىمەن باستالعان.

وسى جىلدىڭ 13 قىركۇيەگىندە نىساندا مىناداي جۇمىستار اتقارىلدى: - ءبۋرونابيۆتى قادالار – 3 764 دانا (90% - جوبا بويىنشا بارلىعى 4 203 دانا); - روستۆەرت – 675 دانا (61% - جالپى جوبا بويىنشا 1 110 دانا); - تىرەكتەر جانە كولوننالار – 455 دانا (41% - جوبا بويىنشا بارلىعى 1 114 دانا); - قۇراما ارقالىقتار – 268 دانا (34% - جوبا بويىنشا بارلىعى 782 دانا); - دەپو وبەكتىلەرىندە 3 687 قادا قاعىلدى. قازىرگى تاڭدا جىلۋ جەلىلەرىنىڭ 98% دايىن (قايتا قۇرىلدى) (2,2 كم), سۋ قۇبىرى 89% (3,2 كم), شارۋاشىلىق-تۇرمىستىق جانە نوسەرلىك كارىزدىڭ 65% (6,2 كم), ەلەكترمەن جابدىقتاۋ جەلىلەرى 90%-عا (100,3 كم), بايلانىس 97% (165 كم) اتقارىلعان. وسى جىلى جۇمىستار تولىق اياقتالادى. قۇرىلىس نىسانىنىڭ جەلىلەرىندە شامامەن ەكى جارىم مىڭ جۇمىسشى جانە 155 بىرلىك اۋىر تەحنيكا جۇمىس جاساۋدا.

سونىمەن قاتار, باقىت سۇلتانوۆ قۇراما تەمىربەتون ارقالىقتار شىعارۋ بويىنشا پوليگوندى, ەسىل وزەنى ارقىلى وتەتىن جاڭا كوپىرگە باردى. ارالاۋ قورىتىندىسى بويىنشا ديرەكتسيا كەڭسەسىندە كوشپەلى وتىرىس وتكىزىلىپ, وندا استانا اكىمى «لرت قۇرىلىسى جوباسىن كورسەتىلگەن مەرزىمدە اياقتاۋدى قامتاماسىز ەتۋدى» تاپسىردى.

سونداي-اق, ب. سۇلتانوۆقا مىڭجىلدىقتار اللەياسىنىڭ (الماتى اۋدانى) قۇرىلىسى بويىنشا ناقتى جوسپارلاردى تانىستىردى.