«بابىق-بۇرلىق» جاۋاپكەرشىلىگى شەكتەۋلى سەرىكتەستىگى بيداي ونىمدىلىگىنىڭ رەكوردىن جاڭارتتى.
ايىرتاۋ اۋدانىنا بارعان جۇمىس ساپارىندا وبلىس اكىمى قۇمار اقساقالوۆ بيداي تاناپتارىنىڭ ءار گەكتارىنانا 62,5 تسەنتنەر ءونىم جينالىپ جاتقان القاپتاردى ارالاپ, كۇزگى وراقتىڭ بارىسىمەن تانىستى. بۇرىنعى رەكورد 55 تسەنتنەر بولسا, بيىل بۇل كورسەتكىش 7,5 تسەنتەرگە اسىپ تۇسكەن.
وسىنداي مول ونىمگە قالاي قول جەتكىزدىڭىزدەر دەگەن ساۋالعا «بابىق-بۇرلىق» سەرىكتەستىگىنىڭ باسشىسى سەيىلبەك ماحمەتوۆ جەر-انانى ماپەلەپ كۇتە بىلسە, جومارتتىعىندا شەك جوق, دەپ قىسقاشا جاۋاپ بەردى. ايماق باسشىسى قىزىلجار, ەسىل جانە ايىرتاۋ اۋداندارىنىڭ ەگىس تاناپتارىن ارالاۋ كەزىندە بابىقبۇرلىقتاردىڭ تاجىريبەسىن ۇلگى ەتتى.
«مەملەكەت اگرارلىق سالاعا جۇيەلى تۇردە قولداۋ كورسەتىپ كەلەدى. ەڭبەكاقىنىڭ ءوسۋى, باسقا الەۋمەتتىك سالالاردىڭ جاقسارۋى استىق ءوندىرىسىنىڭ رەنتابەلدى تابىسىمەن ولشەنەدى. جەردىڭ بەرەكەسىن قاشىرعان شارۋاشىلىق جەتەكشىلەرىنە بۇدان بىلاي قاتاڭ تالاپ قويىلاتىن بولادى», ق. اقساقالوۆ.
بۇگىندە تومەنگى بۇرلىق اۋىلى تۇرعىندارىنا بارلىق جاعداي جاسالعان. ورتاشا ەڭبەكاقى 141 مىڭ تەڭگەنى قۇرايدى. بيىل ءار ۇيگە ورتالىقتاندىرىلعان جىلىتۋ جۇيەسى تارتىلىپ, جۇمىسشىلارعا ارناپ تۇرعىن ۇيلەر سالىنادى.
ء«ونىم , ناتيجە تومەن بولسا, شارۋاشىلىقتار جالاقىنى قالاي كوتەرەدى؟ بۇل ورايدا جەرگىلىكتى بيلىك ءوز جۇمىستارىن شيراتۋلارى ءتيىس», دەپ اتاپ كورسەتتى وبلىس اكىمى.
ءوڭىر بويىنشا بارلىق ءداندى داقىلداردىڭ ۇشتەن بىرىنە جۋىعى باستىرىلىپ, ورتاشا ونىمدىلىك 14,9 تسەنتنەردەن اينالۋدا.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى