ب. ساعىنتاەۆ پاۆلودار وبلىسىنىڭ وقۋ ورىندارىنىڭ باسشىلىعىمەن مامانداردى دايارلاۋ ماسەلەسىن تالقىلادى

پاۆلودار ءوڭىرى ءىرى يندۋستريالدى ورتالىق بولعاندىقتان, جوعارى كاسىبي ماماندارعا بۇل ايماق ەرەكشە مۇقتاج. پاۆلودار وبلىستىق ءبىلىم بەرۋ باسقارماسىنىڭ باسشىسى د. بولاتحان ۇلىنىڭ ايتۋىنشا, ايماقتا 2017 جىلدان باستاپ مەتاللۋرگيا سالاسىنىڭ ماماندارىن دايىنداۋعا ارنالعان ارنايى باعدارلاما جۇزەگە اسىپ جاتىر. مىسالى, اليۋميني زاۋىتى بازاسىندا جاقسى ناتيجە كورسەتىپ جۇرگەن جۇمىسكەرلەر اراسىنان بولاشاق باسشىلار دايىندالادى. وسىلايشا كاسىپورىن اعا بۋىندى الماستىرا الاتىن كادر رەزەرۆىن جاساقتاۋدا. سونداي-اق, جەرگىلىكتى وقۋ ورىندارى كاسىپورىندارمەن تىعىز بايلانىستا, قوسارلى ءبىلىم بەرۋ جۇيەسى بويىنشا تاجىريبەدەن وتەتىن ستۋدەنتتەردە كەيىن تۇراقتى جۇمىسقا ورنالاسۋعا مۇمكىندىگى بولادى.

پرەمەر-مينيستر زەرتحانا مەن وقۋ سىنىپتارىن ارالاپ, تەحنيكالىق-وندىرىستىك بازامەن تانىستى. كوللەدج مەتاللۋرگيا سالاسىنا مەتالل جونۋشى, تەمىر ۇستاسى, ەلەكتر–گازبەن دانەكەرلەۋشى مەن ەلەكترمونتەرلاردى دايىندايدى. ءۇشىنشى كۋرستان باستاپ ستۋدەنتتەر وندىرىستە جۇمىس ىستەيدى. بىلتىر ءبىلىم ورداسى 163 ماماندى دايىنداپ شىعارعان. ولاردىڭ 97,3% جۇمىسپەن قامتىلدى. جاقىن ارادا ءتۇستى مەتاللۋرگيا كوللەدجى بازاسىندا مەتاللۋرگيا سالاسىنىڭ ۋاكىلەتتى ورتالىعى اشىلاتىن بولادى. 

باقىتجان ساعىنتاەۆ ستۋدەنتتەر ءۇيىنىڭ تىنىس-تىرشىلىگىمەن دە تانىستى. كوللەدج ديرەكتورى ا. بولداشەۆسكيدىڭ ايتۋىنشا, 200 ادامعا شاقتالعان عيمارات 2017 جىلى پايدالانۋعا بەرىلگەن. ستۋدەنتتەر ءۇشىن بار جاعداي جاسالعان, ءتىپتى جاتتىعۋ زالى مەن حورەوگرافيا زالى قاراستىرىلعان. 

ءبىلىم ورداسىنىڭ جۇمىسىن قاراعان سوڭ پرەمەر-مينيستر جوعارى وقۋ ورىندارى, كوللەدج بەن كاسىپورىن باسشىلارى جانە ستۋدەنت جاستارمەن ونەركاسىپتىك يندۋستريالاندىرۋدىڭ جاڭا مودەلىنە مامانداردى دايىنداۋ ماسەلەسى بويىنشا جينالىس وتكىزدى.

جيىن بارىسىندا تەحنيكالىق سالاداعى كاسىبي مامانداردى دايارلاۋ, ەلىمىزدە قولعا الىنىپ جاتقان تسيفرلاندىرۋدى دامىتۋ كەزەنىندە جۇمىسكەرلەردى قايتا وقىتۋ, كوللەدجدەردىڭ بەدەلىن كوتەرۋ, سونىمەن قاتار ءتورتىنشى ونەركاسىپتىك رەۆوليۋتسيا جاعدايىنداعى ەڭبەك نارىعىنىڭ قازىرگى جاعدايى مەن بولاشاعى تالقىلاندى.

كەزدەسۋگە قاتىسۋشىلار ەل ەكونوميكاسىن دامىتۋ ءۇشىن جاڭا زاۋىتتاردىڭ قۇرىلىسى مەن ينۆەستيتسيالاردىڭ تارتىلۋىمەن قاتار, جوعارى بىلىكتى مامانداردى دايارلاۋدىڭ قاجەتتىلىگىن اتاپ ءوتتى. جاستاردى شىنايى ەكونوميكاعا تارتۋدىڭ ماڭىزدى تەتىكتەرىنىڭ ءبىرى — تەحنيكالىق جانە كاسىپتىك ءبىلىم بەرۋ (تجكبب).

پاۆلودار وبلىسىنىڭ اكىمى ب. باقاۋوۆتىڭ ايتۋىنشا, بۇل ءوڭىر — كوپ سالالىق يندۋستريالىق كەشەن. تاياۋ كەلەشەكتە 14 ءىرى ينۆەستيتسيالىق جوبانى ىسكە اسىرۋ جوسپارلانعان, ول 4 مىڭنان استام جاڭا جۇمىس ورنىن قۇرۋعا مۇمكىندىك بەرەدى.

«مەملەكەت باسشىسىنىڭ تاپسىرماسىنا سايكەس, وبلىستا بىلىكتى ءارى باسەكەگە قابىلەتتى مامانداردى دايارلايتىن تجكبب جۇيەسىن جاڭعىرتۋ ۇدەرىسى باستالدى. بۇگىندە 17 مىڭ جاس ازامات تەگىن تەحنيكالىق جانە كاسىپتىك ءبىلىم الۋ مۇمكىندىگىنە يە بولدى», — دەدى وبلىس اكىمى.

ونىڭ ايتۋىنشا, وبلىستىڭ 45 كوللەدجىندە 46 ماماندىق بويىنشا قوسارلى ءبىلىم بەرۋ جۇيەسى ىسكە قوسىلعان. وبلىستىڭ كاسىپورىندارىمەن ىنتىماقتاستىق تۋرالى كەلىسىمشارتتارعا قول قويىلىپ جاتىر. تىكەلەي كاسىپورىندا وتكىزىلەتىن وقۋ ۋاقىتى 80%-عا ۇلعايتىلدى. سونىمەن قاتار, تجكبب جۇيەسىن جاڭعىرتۋ اياسىندا كوللەدجدەردى سەنىمدى باسقارۋعا بەرۋ جۇمىستارى جۇرگىزىلىپ جاتىر. ب. باقاۋوۆتىڭ ايتۋىنشا, وسىلايشا بىرنەشە مىندەت ورىندالادى: ەكونوميكانىڭ شىنايى سەكتورىن ءبىلىم بەرۋ سالاسىنا تارتۋ, كوللەدجدەردىڭ ينفراقۇرىلىمى مەن بازاسىن ساقتاۋ جانە كوبەيتۋ.

كەزدەسۋ بارىسىندا بەيىندى مينيسترلىكتەردىڭ وكىلدەرى دە ءسوز سويلەدى. ءبىلىم جانە عىلىم ءمينيسترى ە. ساعاديەۆ ءبىلىم بەرۋ جۇيەسىن دامىتۋ تۋرالى باياندادى. اتاپ ايتقاندا, جوو-لارعا اكادەميالىق ەركىندىك بەرۋ, كوللەدجدەردى ءبىر باعىتقا بەيىندەۋ جانە قوسارلى ءبىلىم بەرۋ جۇيەسىن دامىتۋ ماسەلەلەرىن قوزعادى. ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترى م. ابىلقاسىموۆا ەڭبەك رەسۋرستارىنىڭ كوشۋىن باسقارۋعا قاتىستى ءسوز سويلەدى.

ء«بىز مەملەكەت باسشىسىنىڭ تاپسىرماسىنا سايكەس ەڭبەك رەسۋرستارىنىڭ اعىنىن باسقارۋ جونىندە كەشەندى جول كارتالارىن ازىرلەۋگە كىرىستىك. بۇگىندە ەلىمىزدىڭ ءىرى كاسىپورىندارىمەن جۇمىس جۇرگىزىلىپ جاتىر. پاۆلودار وبلىسىندا 19 كاسىپورىنمەن كارتالارعا قول قويىلدى, وبلىستىڭ 9-عا جۋىق كاسىپورنى ءوندىرىستى جاڭعىرتۋدى جوسپارلاپ وتىر», — دەدى ەڭبەك جانە حالىقتى الەۋمەتتىك قورعاۋ ءمينيسترى.

سونداي-اق, كەزدەسۋ بارىسىندا ءىرى كاسىپورىنداردىڭ وكىلدەرى ءسوز سويلەدى. «قازاقستان ءاليۋمينيى» اق پرەزيدەنتى ر. رومانوۆ جاستاردىڭ كاسىپورىندا داعدىلاردى ۇيرەنۋى مەن جۇمىسقا ورنالاسۋى تۋرالى ايتىپ بەردى. قىزىل اسكەر اگرارلىق-تەحنيكالىق كوللەدجىنىڭ ديرەكتورى س. جارتىباەۆ اۋىل شارۋاشىلىعى ماماندىقتارى بويىنشا مامانداردى دايارلاۋدىڭ باسىم باعىتتارى تۋرالى ءسوز سويلەدى. قىزىل اسكەر اگرارلىق-تەحنيكالىق كوللەدجىنىڭ جەتەكشىسى ا. پولياكوۆ, پاۆلودار مۇناي-حيميا زاۋىتىنىڭ الەۋمەتتىك ماسەلەلەر جونىندەگى باس ديرەكتورىنىڭ ورىنباسارى ا. يمانتاەۆا قوسارلى ءبىلىم بەرۋ جۇيەسى بويىنشا ستۋدەنتتەردى وقىتۋ اياسىندا كوللەدجدەرمەن ىنتىماقتاسۋ تۋرالى ايتىپ بەردى.  

تجكبب باعدارلاماسى اياسىندا پراكتيكادان ءوتۋ كەزىندە جيناعان تاجىريبەلەرىمەن جانە وزدەرىنىڭ ويلارىمەن پاۆلودار ءتۇستى مەتاللۋرگيا كوللەدجىنىڭ تۇلەكتەرى ت. كۇلەمشاتوۆ پەن ا. ماگوۆيانوۆ ءبولىستى.

تجكبب جۇيەسىن ەنگىزىپ جاتقان كاسىپورىنداردىڭ ينۆەستيتسيالىق تارتىمدىلىعى تۋرالى ەۋروپا قايتا قۇرۋ جانە دامۋ بانكىنىڭ باسشىسى ا. پرەيمانيس تۇسىنىكتەمە بەرىپ ءوتتى.