وبلىس اكىمى قىرىمبەك كوشەرباەۆ «مەرەيلى وتباسى - 2018» رەسپۋبليكالىق بايقاۋىندا جەڭىسكە جەتكەن يشانقۇلوۆ وتباسىمەن كەزدەسىپ, مەملەكەت باسشىسى اتىنان «نيۆا-شەۆرولە» ماشيناسىن سىيلادى دەپ حابارلايدى «Egemen.Kz» ءتىلشىسى.
2013 جىلى ەلباسى وتباسىلىق قۇندىلىقتاردى ناسيحاتتاۋ ماقساتىندا «مەرەيلى وتباسى» جالپىۇلتتىق بايقاۋىن ۇيىمداستىرۋ تۋرالى شەشىم قابىلداعان بولاتىن.
- قازاق حالقى قاشاندا وتباسىن قاسيەتتى شاڭىراق رەتىندە باعالاپ, زور ماڭىز بەرىپ, كوزىنىڭ قاراشىعىنداي قورعاعان. وتباسىنىڭ ار-نامىسىن ساقتاۋعا, ۇرپاق ءوسىرىپ تاربيەلەۋگە, ءوز ۇرپاعىنىڭ ەلگە ادال قىزمەت ەتۋىنە اسا ءمان بەرگەن. وسىنداي ءداستۇرلى قۇندىلىقتار قازاقتىڭ قايماعى بۇزىلماعان سىر وڭىرىندە ەرەكشە ساقتالۋى زاڭدىلىق دەپ ويلايمىز. وتباسى التىن ۇيا, كيەلى شاڭىراق بولسا, سول شاڭىراقتىڭ مۇراگەرى, ۇرپاق جالعاسى بالالار بولىپ تابىلادى. بالالارىنىڭ بويىنا ۇلتتىق قۇندىلىقتاردى ءسىڭىرىپ تاربيەلەپ وتىرعان سىر ەلىنىڭ سىزدەر سياقتى ونەگەلى وتباسىلارىنا ايتار العىسىمىز شەكسىز,-دەدى وبلىس اكىمى.
شيەلى اۋدانى, ەڭبەكشى اۋىلىنىڭ تۇرعىنى ەرعالي يشانقۇلوۆ جارى, «التىن القا», «كۇمىس القا» توسبەلگىسىنىڭ يەگەرى باحيرا اپامەن 62 جىل ءبىر شاڭىراقتا ءومىر ءسۇرىپ, 14 ۇل-قىزدى دۇنيەگە اكەلگەن. بۇگىنگى تاڭدا 61 نەمەرە, 46 شوبەرە, 1 شوپشەك ءسۇيىپ وتىرعان بۇل اۋلەتتىڭ ونەگەلى ءومىرى - ەلگە ۇلگى.
باقتيار تايجان,
«ەگەمەن قازاقستان»
قىزىلوردا وبلىسى