اقتوبە سۋ قويماسىن سازدى وزەنىمەن قوساتىن سۋ تاراتقىش قۇرىلىسىنىڭ وبلىس ورتالىعى اۋماعىنداعى ەكولوگيالىق جاعدايدى جاقسارتۋ ءۇشىن ماڭىزى زور. سۋ تاراتقىش ىسكە قوسىلىسىمەن سازدى سۋى مولايسا مىڭداعان گەكتار جاس كوشەت سۋمەن قامتاماسىز ەتىلەدى.
اقتوبە وبلىسىنىڭ اكىمى بەردىبەك ساپارباەۆ وسى اۋقىمدى جوبانىڭ جۇزەگە اسىرىلۋىمەن تانىسىپ شىقتى.
- سۋ تاراتقىشتى 2019 جىلى مامىر ايىنىڭ باسىندا ىسكە قوسۋدى جوسپارلاپ وتىرمىز. مىڭ گەكتاردان استام جەردى ۇنەمى سۋارىپ وتىرسا قالانىڭ جاسىل بەلدەۋى ۇلعايادى. بۇل ەكولوگيالىق جاعدايدى ءسوزسىز جاقسارتادى, ياعني ناتيجەسىندە اۋاعا, اقتوبەلىكتەردىڭ دەنساۋلىعىنا وڭ اسەرىن تيگىزەدى, - دەدى «قازسۋشار» رمك اقتوبە فيليالىنىڭ ديرەكتورى بەكزات نامەتوۆ.
ول سونداي-اق, گەولوگ پەتر كوتيكتىڭ باق-تا: سۋ قويماسىنداعى سۋ قالانى سۋارۋ ءۇشىن جارامسىز دەپ جاريالانعان پىكىرىن دە جوققا شىعاردى.
- ءومىرىنىڭ كوپ بولىگىن وسى سالاعا ارناعان ادام رەتىندە اقتوبە سۋ قويماسىندا جينالعان كوكتەمگى تاسقىن سۋلار تازا ءارى سۋارۋعا جارامدى ەكەنىن جاۋاپتىلىقپەن ايتامىن. ويلانىڭىز, سۋ قويمالارى جەرلەردى, سونىڭ ىشىندە ءوزىمىز تاماق ءوسىرىپ وتىرعان جەرلەردى سۋمەن قامتاماسىز ەتۋ ءۇشىن سالىندى ەمەس پە؟! جانە ونداي سۋدى الدىن الا تازارتۋدىڭ قاجەتى جوق, اۋىز سۋدى عانا الدىن الا تازارتادى. بۇدان باسقا, ءتۇرلى قىزمەتتەر سۋ قويماسىنان ۇنەمى سۋ سىنامالارىن الادى. سوڭعى سىنامالاردىڭ ناتيجەلەرى, الدىڭعىلار سەكىلدى سۋدىڭ سۋارۋعا جارامدى ەكەنىن راستاپ وتىر. بۇل جەردە سونداي-اق, سۋ قويماسىنان كەلەتىن سۋدىڭ تومەننەن ەمەس, جالپاق بەكىتپە ارقىلى بەرىلەتىنىن ءتۇسىنۋ كەرەك. ول تازا, پايدالانۋ نورمالارىنا ساي, - دەپ اتاپ ءوتتى مامان.
جالپى ۇزىندىعى شامامەن 15 شاقىرىمدىق جوبانى ءۇش كەزەڭدە جۇزەگە اسىرۋ جوسپارلانعان. قازىرگى تاڭدا ءبىرىنشى كەزەكتى جۇزەگە اسىرۋ باستالدى. سونىڭ اياسىندا سۋ توعاندارى, سورعىلاۋ بەكەتى, سۋ جىبەرگىش قوندىرعى سالىنىپ, قۇبىر جەلىلەرى توسەلەدى, ەلەكتر ەنەرگياسى جۇرگىزىلەدى جانە سازدى وزەنىنىڭ جاعاسى مەن ارناسى بەكىتىلەدى. جۇمىسقا 250-دەن استام ادام مەن 25 بىرلىك تەحنيكا جۇمىلدىرىلعان.
سۋ تاراتقىش ىسكە قوسىلعان سوڭ سازدى وزەنىنىڭ اعىن سۋى بار سۋ ايدىنىنا اينالاتىنى دا ماڭىزدى.
تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى نۇرجان اققۇل: « ساعات سايىن وزەنگە 500 تەكشە سۋ قۇيىلادى. تۇنعان سۋ بولمايدى – ەشقانداي ءيىس بولمايدى. سۋ تاراتقىش جوباسىن «قۇرىلىس كونسالتينگ» ۇلتتىق ورتالىعى» اق ليتسەنزياسى بار مەكەمە ازىرلەگەن, بارلىق ەكولوگيالىق, مەملەكەتتىك ساراپتامالاردان وتكەن. بۇدان وزگە, ول ەۋرازيالىق قايتا قۇرۋ جانە دامۋ بانكىنىڭ جەلىسى بويىنشا قارجىلاندىرىلادى. ساراپشىلار بانكتى دە مۇقيات زەرتتەگەن. ەشقانداي تەرىس اسەرى بولمايدى. قالا, تۇرعىندار ودان تەك پايدا كورەدى», - دەگەن سەنىمدە.
تەمىر قۇسايىن