اقتوبە وبلىسى جولدارىنىڭ جاعدايىنا قاتىستى كوپتەگەن ازاماتتاردىڭ شاعىمدارىنا بايلانىستى اقتوبەدە جولدار ساپاسىنىڭ ناشارلاۋ سەبەبىن انىقتاۋ بويىنشا شارالار وتكىزىلۋدە.
وسىلايشا, اعىمداعى جىلدىڭ 16 تامىزىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىستىق دەپارتامەنتىنىڭ وكىلدەرى جانە كولىكتىك باقىلاۋ ينسپەكتسياسى قىزمەتكەرلەرىمەن سامارا-شىمكەنت اۆتوكولىك جولىندا جۇرگىزۋشىلەردىڭ جۇك پارامەترلەرىن اسىرۋ فاكتىلەرىن الدىن-الۋعا باعىتتالعان بىرلەسكەن ءىس-شارا ۇيىمداستىردى.
باقىلاۋ قۇرشىساي اۋىلى ماڭىنداعى جىلجىمالى كولىكتىك باقىلاۋ بەكەتىندە جۇزەگە اسىرىلدى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اقتوبە وبلىستىق دەپارتامەنتىنىڭ باس مامامانى نۇربولات ماحمۋدوۆتىڭ ايتۋىنشا سىبايلاس جەمقورلىقتى الدىن-الۋ ماقساتىندا مارتوك اۋدانىنىڭ «جايسان» وتكىزۋ بەكەتىنىڭ تۇسىندا ورنالاسقان اۆتوماتتاندىرىلعان ارنايى ولشەۋ ىسكە قوسىلدى.
«اۆتوماتتاندىرىلعان ارنايى ولشەۋ جۇيەسىنىڭ ماڭىزدى فۋنكتسيالارىنىڭ ءبىرى اۆتوموبيل جولدارىن جۇك كولىكتەرى اسەرىنەن بولاتىن بۇزىلۋدان ساقتاۋ عانا ەمەس, سونىمەن قاتار ولاردى ولشەۋ كەزىندە پايدا بولاتىن «جەكە بايلانىس» تۇرىندەگى سىبايلاس جەمقورلىق تاۋەكەلدەرىن جويۋ بولىپ تابىلادى.
وسىلايشا, جۇك كولىكتەرىن اۆتوماتتى تۇردە ولشەۋ قازاقستان رەسپۋبليكاسى اۋماعىنا كىرە بەرىس تۇستاعى كولىكتىك ينسپەكتسيا قىزمەتكەرلەرىنىڭ بارلىق مارشرۋتتار بويىنشا نەگىزسىز تەكسەرىسىن بولدىرمايدى», - دەدى ن.ماحمۋدوۆ.
الداعى جىلى اۆتوماتتاندىرىلعان ارنايى ولشەۋ جۇيەسىن «الىمبەت» وتكىزۋ بەكەتىنىڭ تۇسىنا ورنالاستىرۋ كۇتىلىپ وتىر, بۇل ءوز كەزەگىندە جۇك تاسىمالداۋشىلار مەن كولىكتىك باقىلاۋ ينسپەكتسياسىنىڭ قىزمەتكەرلەرى اراسىندا تۋىندايتىن سىبايلاس جەمقورلىق تاۋەكەلدەرىنە جول بەرمەيدى.
سونىمەن قاتار, شارا بارىسىندا «جولداعى قابىلداۋ» اكتسياسى وتكىزىلىپ, جۇك تاسىمالداۋشىلارعا سىبايلاس جەمقورلىق تاقىرىبىندا اقپاراتتىق جادنامالار تاراتىلىپ, سىبايلاس جەمقورلىقتى الدىن-الۋ سۇراقتارىنا قاتىستى تۇسىندىرمە جانە كونسۋلتاتسيالار بەرىلدى.
تەمىر قۇسايىن