استاناعا تۇرىك رەسپۋبليكاسى جاندارمەرياسىنىڭ باس قولباسشىسى ارميا گەنەرالى اريف چەتيننىڭ باسشىلىعىمەن ارنايى دەلەگاتسيا رەسمي ساپارمەن كەلدى. ءۇش كۇنگە سوزىلعان ءىس-شارالار اياسىندا قازاقستان مەن تۇركيا اراسىنداعى سالالىق ۆەدومستۆولاردىڭ ءوزارا ىنتىماقتاستىعىن تەرەڭدەتۋ جايى جان-جاقتى تالقىلاندى.
ال دەلەگاتسيا قۇرامىنا تۇركيانىڭ قازاقستانداعى ەلشىلىگىندەگى اسكەري اتتاشەسى پولكوۆنيك جيۋنەيت گيۋمەن جەتەكشىلىك ەتتى. ال دەلەگاتسيا قۇرامىندا تۇرىك رەسپۋبليكاسى جاندارمەرياسىنىڭ بايلانىس جانە اقپاراتتىق جۇيەلەر باسقارماسىنىڭ باستىعى گەنەرال-مايور ەنگين چىراقوعلى مەن ازيا ايماعى بويىنشا ارىپتەستىك جونىندەگى ءبولىم باسشىسى مايور جەنگيز يىلماز دا بولدى.
ارىپتەستىك كەزدەسۋدىڭ العاشقى كۇنىندە اسكەري قوناقتار قازاقستان رەسپۋبليكاسى ۇلتتىق ۇلانىنىڭ باس قولباسشىلىعىندا بولىپ, قۇقىقتىق اسكەردىڭ قۇرىلۋ تاريحىمەن, ونىڭ ماقسات مىندەتى مەن قۇرىلىمدىق ەرەكشەلىگىمەن تانىستى.
سونداي-اق, دەلەگاتسيا باسشىسى ارميا گەنەرالى اريف چەتين قر ۇلتتىق ۇلانى باس قولباسشىسى گەنەرال-لەيتەنانت رۋسلان جاقسىلىقوۆپەن كەزدەسۋ بارىسىندا تۇركيانىڭ اسكەري وقۋ ورىندارىندا مامان دايارلاۋ باعىتى مەن ءبىلىم بەرۋ ىسىندەگى ارىپتەستىكتى دامىتۋدىڭ جاي-كۇيى تالقىلاندى. سونىمەن قاتار, اعىمداعى جىلدىڭ شىلدە ايىندا قازاقستاندىق دەلەگاتسيانىڭ ستامبۋلدا وتكەن كەزدەسۋدە كەلىسىلگەن بىرقاتار جەتىستىكتەر لەگىن ودان ءارى جالعاستىرۋ جونىندە اڭگىمە ءوربىدى. ەستەرىڭىزگە سالا كەتەر بولساق, اتالعان ساپار اياسىندا ەكىجاقتى ارىپتەستىك اياسىندا قازاقستان رەسپۋبليكاسى تاراپىنىڭ جاندارمەريا ۋچيليششەسىندە ءبىلىم الۋشى كۋرسانتتارىن جىل سايىن 8 ادامعا دەيىن كوبەيتۋ كەلىسىمى جاسالعان ەدى. وعان قوسا, تاراپتار تۇركيانىڭ اسكەري-وقۋ ورىندارىنان تۇلەپ شىققان قازاقستاندىق تۇلەكتەردىڭ ودان ءارى تۇرىك رەسپۋبليكاسىنىڭ اكادەمياسىندا جانە تۇركيا وقۋ ورىندارىنداعى ارنايى ماقساتتاعى بولىمشەلەردە اسكەري مامانداردى دايارلاۋ ءۇشىن (سۇرمەرگەندەر مەن جارىلعىش قارۋ ماماندارىن, سۋدا ءجۇزۋ ماماندارىن ت.ب.) وقۋ كۋرستارىن ۇزارتۋ جونىندە كەلىسىم جاسالعان بولاتىن.
دەلەگاتسيا وكىلدەرىنىڭ رەسمي كەزدەسۋى سوڭىندا ارميا گەنەرالى اريف چەتين قازاقستان رەسپۋبليكاسى ۇلتتىق ۇلانى باس قولباسشىلىعى عيماراتىنىڭ اۋماعىندا «دوستىق اللەياسىن» اشىپ, وندا العاشقى اعاشتى وتىرعىزدى.
سودان كەيىنگى رەسمي ساپار ۇلت كوشباسشىسى – تۇڭعىش پرەزيدەنت اتىنداعى ۇلتتىق قورانىس ۋنيۆەرسيتەتىندە جالعاسىن تاپتى. مۇندا قوناقتار ۋنيۆەرسيتەتتىڭ وقۋ-ادىستەمەلىك بازاسى مەن ماتەريالدىق الەۋەتىمەن تانىسىپ, مۋزەيدى ارالادى. سونىمەن قاتار, يميتاتسيالىق مودەلدەۋ ورتالىعى مەن قر قك باس شتابى اكادەمياسى مەن ۇلتتىق ۇلاننىڭ بىلىكتىلىكتى اتتىرۋ فاكۋلتەتىنىڭ جۇمىسىمەن تانىستى.
رەسمي ساپاردىڭ ەكىنشى كۇنىندە تۇرىك رەسپۋبليكاسى جاندارمەرياسىنىڭ باس قولباسشىسى ارميا گەنەرالى اريف چەتين مەن قازاقستان رەسپۋبليكاسىنىڭ ىشكى ىستەر ءمينيسترى گەنەرال-پولكوۆنيك قالمۇحانبەت قاسىموۆتىڭ كەزدەسۋى ءوتتى.
جالپى ءىس-شارالار جەلىسى ءوزارا تۇسىنىستىككە نەگىزدەلگەن جاعىمدى سيپاتا ءوتىپ, تاراپتار ىنتىماقتاستىقتى تەرەڭدەتۋ مەن بەلسەندى جۇرگىزۋگە ىقىلاس تانىتتى. سونىمەن قاتار, قۇقىق قورعاۋ سالاسىنداعى قارىم-قاتىناس دەڭگەيىنىڭ بولاشاقتاعى باعىت-باعدارى ناقتىلاندى. ورايلى ساتتە قازاقستان رەسپۋبليكاسى ۇلتتىق ۇلانىنىڭ ەۋروپا مەن جەرورتا تەڭىزى جاندارمەرياسى جانە اسكەري دارەجەدەگى قۇقىققورعاۋ ورگاندارى قاۋىمداستىعى (FIEP) قۇرامىنا قوسىلۋدىڭ جاي-جاپسارى تالقىلاندى.
سودان سوڭ تۇركيالىق اسكەريلەر ارنايى جەدەل ماقساتتاعى استانالىق بريگادانىڭ ماتەريالدىق-تەنيكالىق جاعدايىمەن تانىسىپ, اسكەريلەردىڭ تۇرمىسىمەن تانىسىپ, اسكەري قارۋ-جاراق كورمەسىن تاماشالادى. دەلەگاتسيا وكىلدەرى ساپاردىڭ سوڭعى ءتۇيىنى رەتىندە ەلورداداعى كەمال اتاتۇرىك تىنداعى ساياباققا بارىپ, ەسكەرتكىشكە گۇل شوقتارىن قويدى.