ۇشقان قۇستىڭ قاناتىن, جۇگىرگەن اڭنىڭ تۇياعىن تالدىراتىن شەت-شەگى جوق جازيرالى كەڭ دالا. كوك مۇنارمەن كومكەرىلگەن كوگىلدىر تاۋلاردىڭ ۇشار باسى قازباۋىر بۇلتتاردى ءىلىپ الىپ, كىلكىگەن كوگىلدىر الەممەن استاسىپ جاتىر. ءۇزىلىپ تۇسكەن مونشاقتاي كوگىلدىر كولدەر باياۋ عانا تولقيدى. وسى ءبىر ادەمى سۋرەت كوز الدىڭا قانىق بوياۋىمەن كولبەپ كەلگەندە, كوكىرەگىڭ قۋانىشقا شۇپىلدەپ-اق كەتەدى. بۇل مەنىڭ ەلىم, مەنىڭ جەرىم, اتامەكەنىم!
ءان وسىلاي دەيدى, جانىڭدى تەربەيدى, جۇرەگىڭدى الديلەيدى. ءان اسەرىنەن جامىراعان جۇلدىزداي مازداعان سەزىم وتى جان جۇرەگىڭدى جىلىتىپ وتىرعان ساتتە ەرىكسىز ماقتانىش سەزىمى, اتامەكەنگە دەگەن سۇيىسپەنشىلىك قۋاتى تاۋدان اققان تۇما بۇلاقتاي ونە بويىڭدى شارلاپ, الپىس ەكى تامىرىڭدى قىزدىرماسى بار ما؟.. ءانشىنىڭ دە داۋىسى سۇراپىل ەكەن. جاڭاعى جالپاق دالادا ءبىر شوكىم مەرۋەرتتەي جالت-جۇلت ەتكەن كول ۇستىندەگى قۇس تورەسى – اققۋدىڭ ۇنىندەي سىزىلىپ-اق تۇر.
ءانشى الەكساندر اگوفونوۆ – قاراعاندى قالاسىنىڭ تۋماسى. كوكشەتاۋداعى اقان سەرى اتىنداعى مادەنيەت كوللەدجىنىڭ تۇلەگى, قازىرگى كۇنى ساندىقتاۋ اۋدانىنداعى اۋىلدىق مادەنيەت ءۇيىنىڭ ديرەكتورى بولىپ قىزمەت ىستەيدى. كوللەدجدە وقىپ جۇرگەن كەزىندە انگە كوڭىلى اۋعان. جالعىز ىنتا عانا ەمەس, تابيعي تالانت, ياكي داۋىس تا بار. ءان بولعاندا الەكساندر ۆالەنتينوۆيچتىڭ ءسۇيسىنىپ, ءسۇيىپ ايتاتىنى كىلەڭ قازاق تىلىندەگى پاتريوتتىق اندەر. سولتۇستىك وڭىردە وزگە جۇرتتىڭ قازاقشا ءتىل سىندىرعانىنىڭ ءوزى جەتىستىك بولىپ ەسەپتەلەدى. ال ءان سالۋ وزگەشە ونەر. ونىڭ ىشىندە تىڭدارمانىن كەرەمەت اسەرگە بولەپ, قۇلاعىڭنان كىرىپ, كوڭىلىڭدە وتان ءسۇيۋ قاسيەتىنىڭ ءدانىن ەگەتىن ءاندى ايتۋ, ەل ىشىندە ناسيحاتتاۋ, زامانداستارىنىڭ كوكىرەك كوزىن اشۋ ازاماتتىق.
– رەپەرتۋارىمدا وسىنداي تاقىرىپتاعى جۇزدەن استام ءان بار, – دەيدى الەكساندر ۆالەنتينوۆيچ, – ءبىزدىڭ ماكسيموۆكا سەلوسىندا الدەنەشە ۇلتتىڭ وكىلدەرى تۇرادى عوي. ءبارى ءسۇيىپ تىڭدايدى. ۇيىپ تىڭداعان سوڭ ماعان دا قانات ءبىتىپ, ايتا بەرگىم كەلەدى. ارينە, ءار ءانشى ءوزىنىڭ جۇرەك قالاۋىمەن تاقىرىپ تاڭداعانى, ءان تاڭداعانى دۇرىس. مەن وسى پاتريوتتىق اندەردى بار ىنتاممەن ورىندايمىن.
وسى ولكەدە دۇنيەگە كەلىپ, ات جالىن تارتىپ ءمىنىپ, ءدام-تۇزىن تاتقان الەكساندر باۋىرىمىزدىڭ نيەتى جان دۇنيەمىزدى ەلجىرەتىپ جىبەردى. «ازامات بولساڭ, وسىنداي بول!» دەدىك ءبىز ونەرىمەن ولكەنىڭ ورەندەرىنە ەل مەن جەردى قادىرلەۋدى انىمەن ۇقتىرىپ جۇرگەن انشىگە.
بايقال ءبايادىل,
«ەگەمەن قازاقستان»
اقمولا وبلىسى,
ساندىقتاۋ اۋدانى