جەتىسۋلىق جاس وقىرماندار اقىن تىنىشتىقبەك ابدىكاكىم ۇلىنىڭ «القوڭىر دۇنيە» اتتى كىتابى تۋرالى پىكىر الماستى. باس قوسۋ كورنەكتى اقىننىڭ ولەڭدەرىن وقۋمەن باستالىپ, مەملەكەتتىك سىيلىققا ۇسىنىلىپ وتىرعان كىتاپ جايىندا ەركىن تالقىلاۋعا ۇلاستى.
جالپى, تىنىشتىقبەك اقىننىڭ شىعارماشىلىعىنا جەتىسۋلىق جاستار ابدەن قانىق. مۇقىم قازاقتىڭ سۇيىكتى اقىنى جايلى ىستىق ىقىلاسقا تولى لەبىز بىلدىرگەن ىنتالى جاستار «القوڭىر دۇنيە» كىتابىنىڭ ەلىمىزدىڭ باس ماراپاتى – مەملەكەتتىك سىيلىققا ۇسىنىلعانىنا قۋانىشتى ەكەن. وڭىردەگى ادەبي ورتانىڭ كورىگىن قىزىدىرىپ جۇرگەن جاس اقىندار اعا بۋىننىڭ شىعارماشلىعى جايلى اڭگىمەلەسىپ تۇرۋ شىعارماشىلىق بايلانىستى نىعايتىپ, ادەبيەتتىڭ تانىمالدىعىن ارتىرادى دەگەن سەنىمدە.
- بۇگىنگى باس قوسۋدا تىنىشتىقبەك ابدىكاكىم ۇلىنىڭ شىعارماشىلىعىن تالقىلادىق. تىنىشتىقبەك اقىن قازىرگى قازاق پوەزياسىنداعى قۇبىلىس قوي. ولەڭدەرى وتە ويلى, تەرەڭ. وكىنىشتىسى, اقىنىڭ اتىن ەستىگەنىمەن, شىعارماشىلىعىنان حابارى از جاستار دا بار ەكەن. بۇگىنگى كەزدەسۋدە ولار وزدەرىنە ءبىر سىرلى الەمنىڭ قاقاپاسى ناشقانداي بولىپ وتىردى. سوندىقتان, وسىنداي رۋحاني باس قوسۋدىڭ ءجيى ءوتۋىن قالايمىز, - دەپ ءوز ويىن ءبىلدىردى جاس اقىن, جازۋشىلار وداعىنىڭ مۇشەسى جانگەلدى نەمەرەباي.
ال قازاقستان جازۋشىلار وداعى الماتى وبلىستىق فيليالىنىڭ باسشىسى, اقىن ەرلان ءجۇنىستىڭ ۇيىمداستىرۋمەن وتكەن شىعارماشىلىق باس قوسۋ ەندى تۇراقتى جالعاسپاق.
- العاشقى پىكىرتالاسقا تىنىشتىقبەك ابدىكاكىم ۇلىنىڭ «القوڭىر دۇنيە» كىتابى نەگىز بولدى. الداعى كۇندەرى اقۇشتاپ باقتىگەرەۆا, مارحابات بايعۇت, وتەگەن ورالباەۆ, عالىم جايلىباي سەكىلدى قالامگەرلەردىڭ شىعارماشىلىعىنا قاتىستى تالقىلاۋلار وتكىزۋدى دە جوسپارلاپ وتىرمىز, - دەيدى قازاقستان جازۋشىلار وداعى الماتى وبلىستىق فيليالىنىڭ باسشىسى, اقىن ەرلان ءجۇنىس.
قالماحانبەت مۇقامەتقالي,
«ەگەمەن قازاقستان»
الماتى وبلىسى