ىبىراي ءالتىنساريننىڭ وتباسى قولدانعان جادىگەرلەر جۇرت نازارىنا ۇسىنىلدى (ۆيدەو)

«ى.ءالتىنساريننىڭ ناعاشىلارى وتە بىلىمگە جاقىن بولاعان كىسىلەر. سونداي كىسى شەگەن ءبيدىڭ شاپانى بار. شەگەن ءبيدىڭ شاپانىن وسىدان ەكى جىل بۇرىن ونىڭ تۋسىقاندارى ءبىزدىڭ مۋزەيگە اكەلىپ تاپسىردى», دەيدى قوستاناي وبلىستىق ىبىراي التىنسارين مەموريالدىق مۋزەيىنىڭ قىزمەتكەرى شىنار سۇلتانقىزى.

ءحىح عاسىردىڭ ۇلگىسىمەن جاسالعان كۇرسى, ۇستازدىڭ ناعاشى اتاسى شەگەن ءبيدىڭ شاپانى, ناعاشىسى بەكتەمىس بايدىڭ تۇتىنعان اعاش كەلسابى جانە تاعى باسقا جادىگەرلەر جۇرت نازارىنا ۇسىنىلىپ وتىر. 

«قىسقا عانا 49 جىل عۇمىرىندا ى.التىنسارين ۇلكەن اعارتۋشىلىقپەن,  پەداگوگيكامەن اينالىسىپ, قازاق دالاسىندا قازاق جاستارى مەن قىزدارىن عىلىم مەن بىلىمگە سۋسىنداۋعا شاقىرعان. بۇگىنگى ءبىزدىڭ ءىس-شارانىڭ ماقساتى دا وسىنداي ۇلىلاردى, پەداگوگتاردى, قايراتكەرلەردى بۇگىنگى ۇرپاقتارعا تانىستىرۋ», دەيدى قولجازبالار مەن سيرەك كىتاپتار ۇلتتىق ورتالىعى كورمە زالىنىڭ باس ساراپشىسى ءادىلالى جابىقباي ۇلى.

كورمە جۇمىستارىنىڭ اشىلۋىنا كەلگەن زيالى قاۋىم وكىلدەرى مەن قالا تۇرعىندارى ۇلى پەداگوگ, اعارتۋشى جايلى وي-پىكىرلەرىن ورتاعا سالىپ, مۇنداي ءىس-شارالاردىڭ ماڭىزى زور ەكەنىن ايتتى.

«وسى الاتاۋداي بولىپ الىستان كورىنەتىن, قاشاندا جۇرەككە جىلۋ سىيلايتىن, كوڭىلگە قۋانىش سىيلايتىن وسىنداي بابالارىمىز بار. سونىڭ ءبىرى – ىبىراي بابامىز. سول بابامىزدى ءبىر اۋناتۋ ماقساتىندا, سول كىسىنىڭ ءتالىم-تاربيەسىن كورەيىك, سول كىسىنىڭ ارتىندا قالعان مول مۇراسىن ءبىر بۇرىشىن بولسا دا تانىسىپ كورەيىك دەگەن جاقسى نيەتپەن جينالعان ەكەنسىزدەر», دەيدى اقىن قونىسباي ءابىل.  

استانانىڭ 20 جىلدىق مەرەيتويىنا وراي ۇيىمداستىرىلىپ جاتقان كورمەنى قالا تۇرعىندارى مەن قوناقتارى ءبىر اي بويى تاماشالاي الادى. ال قوستانايلىقتاردىڭ استاناعا تارتۋى مۇنىمەن اياقتالماق ەمەس. الداعى جەكسەنبى كۇنى «ەتنواۋىل» ۇلتتىق مادەني كەشەنىندە «قازىنالى قوستانايدان ارايلى استاناعا» اتتى كونتسەرتتىك باعدارلاما وتەدى.

مارجان سەرعاليقىزى

ۆيدەو: جانبولات كەنجەعۇل

«ەگەمەن قازاقستان»