ورلەۋ باسپالداقتارى
مەن باقىتجان تۇرسىن ۇلى جۇماعۇلوۆتى 30 جىلدان دا كوبىرەك بىلەدى ەكەنمىن, ءبىر قاراعاندا, قازىرگىدەي عالامات داۋىردە بۇل از ۋاقىت ەمەس قوي.
بۇل مەزگىل جارتى الەمگە ىقپالىن جۇرگىزگەن كەڭەس وكىمەتىنىڭ قۇلاپ, مىزعىماس كوممۋنيستىك يدەولوگيانىڭ قيراعان تۇسىنا سايكەس كەلگەن ەدى. ونىڭ ۇستىنە, الىپ يمپەريا قۇرامىندا بولعان ەلدەردىڭ بارلىعىنىڭ ەكونوميكاسى تۇرالاپ, حالىقتى ۇمىتسىزدىك پەن ۇرەي جايلاعان, نە ىستەرىن بىلمەي الاسۇرعان كەزەڭ بولاتىن.
تۇڭعىش تاريحي قادامنىڭ اسا اۋىر بولاتىنى تۇسىنىكتى, الايدا, ءوز ۇلتى مەن الەم تەگىس مويىنداعان, زامانىمىزدىڭ زاڭعار كوشباسشىسى – نۇرسۇلتان ءابىش ۇلى نازارباەۆ ەلىمىزدى وسى تىعىرىقتان امان-ەسەن الىپ شىقتى, ۇلتتىڭ وزىندىك رۋحى مەن ءۇمىتىن وياتتى. وسىنداي ەڭبەكتىڭ ارقاسىندا از عانا ۋاقىتتا قازاقستاندى, ونىڭ كورەگەن باسشىسىن بۇكىل جەر-جيھان تانىپ ءبىلدى.
بۇل الاساپىران ءارى تولعاقتى كەزەڭ كەشەگى ستۋدەنت, جاستاردىڭ جالىندى باسشىسى, ىزدەنىمپاز ۇستاز, بۇگىنگى ايگىلى عالىم, اسا كورنەكتى ۇيىمداستىرۋشى, مەملەكەتتىك دەڭگەيدەگى قايراتكەر باقىتجان جۇماعۇلوۆتى دا اينالىپ وتكەن جوق.
قانشا جەردەن زامان توڭكەرىلىپ تۇسسە دە ول باياعى جاستىق كەزىندەگى دۇنيەتانىمى مەن العىرلىعىنان, ءوزىنىڭ قايراتكەرلىك ءھام ۇيىمداستىرۋشىلىق قابىلەتىنەن, قيىن شارۋالاردى جاپىرا ىستەيتىن «تيتان» مىنەزىنەن ءالى تايعان جوق.
اكادەميك جۇماعۇلوۆ − سان قىرلى تالانت. ونىڭ تارازى باسىن تەڭ ۇستايتىن بىلىكتىلىگىنە, الدىنا قويعان ماقساتىنا جەتپەي قويمايتىن قايسارلىعىنا ارقاشان ءتانتى بولامىن.
قانشاما باس اينالدىرار لاۋازىمداردىڭ بيىگىنە سامعاسا دا, ول سونى مىسە تۇتىپ توقىراپ قالعان جوق, قايتا باقىتجان باسشىلىققا بارعان جەر كوركەيىپ سالا بەرەتىن.
ەڭ باستىسى, اسا ءىرى ۇيىمداستىرۋشى ءارى مەملەكەت قايراتكەرى رەتىندە باسقارعان سالاسىن سىرتتان باقىلاپ قانا قويماي, قاراپايىم شارۋانىڭ ءوزىن كوزىمەن كورىپ, قولىمەن ۇستاپ كورەتىن ايرىقشا تالاپشىلدىعى دەر ەدىم.
ءوز سالاسىنىڭ كاسىبي ماماندارىنىڭ ءوزى جۇماعۇلوۆتىڭ ىلعي ۋاقىتتان وزا جۇرەتىن كوشەلىلىگىنە, الماستاي العىرلىعىنا, كريستالداي تازالىعىنا, باي تاجىريبەسىنە تاڭداي قاعاتىنى سوندىقتان.
قومدانىپ قياعا سامعاۋ − ونىڭ ءتۋابىتتى قۇداي بەرگەن قاسيەتى سياقتى. ول قوعامدىق نەمەسە مەملەكەتتىك شارۋانى ۇلكەن-كىشى دەپ بولمەيدى, سونىڭ بارىندە ايشىقتى ءىزىن قالدىرۋ − باقىتجان جۇماعۇلوۆتىڭ ازاماتتىق ورەسىنىڭ بيىكتىگىن دالەلدەيدى.
ۇشار قاناتقا دۇنيە كەڭ
پسيحولوگتاردىڭ زەردەلەۋىنشە, ءبىزدىڭ مىنەز-قۇلقىمىز, ومىرلىك مۇراتتارىمىز, بولاشاقتاعى قابىلەت-قارىمىمىز وتباسىمەن, بالالىق شاعىمىزبەن, اتا-بابانىڭ ءداستۇر-سالتىمەن گەنەتيكالىق تۇرعىدان تەرەڭ تامىرلاساتىنى انىق. سوندىقتان دا بولار, وسىدان 24 جىل بۇرىنعى ءبىر كەزدەسۋ باقىتجان تۇرسىن ۇلىن جەتە تاني تۇسۋىمە ايرىقشا اسەر ەتتى. بۇل 1994 جىلى ونىڭ اناسى كەنجەتاي باتىربەكقىزىمەن ديدارلاسۋىم ەدى.
سول كەزدەسۋدە باقىتجاننىڭ اناسى ماعان: «اللا تاعالا ۇلكەن وتباسىنىڭ اراسىنان, بىرنەشە بالانىڭ ىشىنەن بىرەۋىنە عانا ەرەكشە قابىلەت دارىتادى, ال ول بۇكىل اۋلەتىن العا سۇيرەيدى», دەگەن ەدى. اناسىنىڭ ايتقانى ايداي كەلىپ, باقىتجان قاشان دا ونىڭ اماناتىن قال-قادىرىنشە ورىنداعانى انىق.
وسى ءبىر يماندى انا, قاراپايىم قازاق ايەلى − بۇكىل عۇمىرىن كىتاپحانا ىسىنە ارنادى, الماتى وبلىسى, قاپال اۋداندىق كىتاپحاناسىندا قىزمەت اتقارا ءجۇرىپ, «قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى» قۇرمەتتى اتاعىنا يە بولدى.
اناسى كەنجەتاي باتىربەكقىزىنىڭ سوزىنە قۇلاق تۇرسەك, باقىتجان مەكتەپتە ءتۇرلى وليمپيادالاردىڭ جەڭىمپازى بولىپ, سپورتقا دا قۇلاش ۇرىپ, رەسپۋبليكالىق دەڭگەيدەگى جۇلدەلى ورىنداردى يەلەنىپتى. مىنە, باقىتجان تۇرسىن ۇلىنىڭ دۇنيەتانىمى وسىنداي ورتادا قالىپتاستى, ول تابيعاتتىڭ تۇلەگى بولىپ دۇنيەگە كەلىپ, بىرتە-بىرتە الەۋمەتتىڭ تۇلعاسى بوپ بيىكتەي بەرىپتى. مەنىڭ نازارىمدى اۋدارعان دا ونىڭ وسى قاسيەتتەرى ەدى.
اسقارالى اسۋلارعا بەت الۋ
اكادەميك جۇماعۇلوۆتىڭ ۇزەڭگىلەس دوسى, قازاقستان رەسپۋبليكاسى جوعارى وقۋ ورىندارى اسسوتسياتسياسىنىڭ پرەزيدەنتى, «تۇران» ۋنيۆەرسيتەتىنىڭ رەكتورى راحمان الشانوۆتىڭ ايتۋىنشا, باقىتجان تۇرسىن ۇلىنىڭ عيبراتتى عۇمىرىنىڭ نەگىزى, ماتەماتيكاعا دەگەن قۇشتارلىعى − قازمۋ-دەگى ستۋدەنتتىك جىلدارى قالانىپتى.
ر.الشانوۆ سول كەزدەردى بىلايشا ەسكە الادى: «جۇماعۇلوۆ قۇرىلىس وتريادتارىنداعى قالىپتاسىپ قالعان ەسكى ءداستۇردى تۇبەگەيلى وزگەرتتى. جىلدار بويى قازمۋ-دەگى 30-40 شاقتى قۇرىلىس وتريادتارىنىڭ اراسىنان ءبىرىنشى ورىندى ىلعي زاڭ فاكۋلتەتى يەلەنەتىن. وسى سەڭدى العاش بۇزعان دا جۇماعۇلوۆ ەدى, ول كونفەرەنتسيادا جالىندى ءسوز سويلەپ, ەندى ءبىرىنشى ورىنعا قولدانبالى ماتەماتيكا فاكۋلتەتى كوتەرىلەتىنىن باتىل مالىمدەدى. كوپشىلىك بۇعان كۇمانمەن قاراعانى دا شىندىق. الايدا, قايسار باقىتجان سوزىندە تۇردى, ونىڭ فاكۋلتەتى جەمە-جەمگە كەلگەندە ءبىرىنشى ورىندى يەلەندى».
وسى ەڭبەگىنە وراي, ستۋدەنت باقىتجان جۇماعۇلوۆ تۇڭعىش رەت مەملەكەتتىك دارەجەدەگى سىي-سياپات جانە كسر جوعارعى كەڭەسى پرەزيديۋمىنىڭ قۇرمەت گراموتاسىمەن ماراپاتتالدى.
ستۋدەنتتىك جىلدارداعى تىنىمسىز ەڭبەك جۇماعۇلوۆتى بىرتە-بىرتە ساياسي كوشباسشىلىققا جەتەلەدى. ول بەسىنشى كۋرستا قازاقستانداعى ەڭ ءىرى جاستار وشاعى – قازمۋ-ءدىڭ كومسومول ۇيىمىن باسقاردى. كەيىننەن وسى وقۋ ورنىنىڭ پارتيا ۇيىمىنىڭ جەتەكشىسى بولدى.
قالاي دەگەنمەن دە, ءومىر جولى تاقتايداي تەگىس بولمايدى ەكەن. اياق استىنان 1986 جىلى بۇرىنعى استانامىز الماتىدا, قازاقستاننىڭ جوعارعى پارتيا ۇيىمىنداعى اۋىس-تۇيىسكە بايلانىستى ورتالىقتىڭ اپەرباقاندىعىنا شىداماعان ستۋدەنتتەردىڭ ايگىلى جەلتوقسان وقيعاسى بۇرق ەتتى.
ءدال وسى مەزگىلدە تالاي پارتيالىق دوكەيلەردىڭ بەتپەردەسى سىپىرىلدى, الايدا, باقىتجان تۇرسىن ۇلى جەكە باسىنا تونگەن قاۋىپ-قاتەرگە قاراماستان, ستۋدەنتتەردى شىر-پىرى شىعىپ قورعاپ باقتى, وقۋدان شىعارىلاتىن جۇزدەگەن قازمۋ ستۋدەنتتەرىنىڭ تىزىمىنە قول قويۋدان باس تارتتى.
قازمۋ-دەي ىرگەلى وقۋ ورنىنداعى جالىندى پارتيا جەتەكشىسىنىڭ بۇل ارەكەتى قايدان ەلەۋسىز قالسىن, ونى جۇمىستان بوساتۋ ەشتەڭە ەمەس, ءدارىس بەرۋ قۇقىنان دا ايىردى. وسىلاي, 33 جاستاعى تالانتى تاس جارعان جاس جىگىتكە «ۇلتشىل» دەگەن اتاق قوسا جاپسىرىلىپ, ول بۋىرقانعان ساياسي جانە رۋحاني ومىردەن ءبىر جولاتا الاستالعانداي كۇي كەشتى. سول ءبىر ساتتە قاسىندا ۇنەمى قاۋمالاپ جۇرەتىن «دوستارى مەن ءىزباسارلارى» دا عايىپ بولدى. بۇل كورىنىس جۇماعۇلوۆ ءۇشىن قاتەر تونسە جالت بەرەتىن ءدۇبارالار مەن شىنايى دوستىڭ اراجىگىن انىقتاۋعا, ياعني كۇرىش پەن كۇرمەكتى اجىراتۋعا سەپتىگىن تيگىزدى.
ۇشقىر ويىن ورەلى ىسكە جۇمساعان
«مەن سەنەتىن نارسەلەر» دەپ اتالاتىن كىتابىندا باقىتجان تۇرسىن ۇلى بىلاي دەپ جازعان: «الپينيستەر شىڭعا كوتەرىلۋدىڭ ءار كەزەڭىندە اۋەلى لاگەر قۇرادى, كوركەم دە قورقىنىشتى تاۋ جوتاسى ول جەردەن قاراعاندا جىگەرسىز ادامنىڭ زارەسى ۇشار قول جەتپەس بيىك بولىپ كورىنەدى, كەرى قايتۋ دا مۇمكىن ەمەس ءتارىزدى. سول الاڭقايدا ءارى قاراي جۇرەتىن جولدىڭ باعىتى بەلگىلەنىپ, قازىقتار مەن ارقاندار تەكسەرىلەدى... ءبىز دە ءجۇرىپ وتكەن جولىمىزعا جيناقتاعان تاجىريبەمىز بەن الەم تۋرالى, ەلىمىز بەن ءوزىمىز تۋرالى قانىققان ءبىلىمىمىزدىڭ بيىگىنەن كوز تاستايمىز».
1990 جىلدارى قازاقستان تۇبەگەيلى باعىت-باعدارىن بەلگىلەپ, جاڭا بەتبۇرىس كەزەڭىنە اياق باستى, بۇل ءۇردىس ءبىر جاعىنان باقىتجان جۇماعۇلوۆقا دا قاتىستى ەدى.
ەگەر وتكەن ۋاقىتتاردى بۇگىنگى كۇننىڭ عىلىمي بيىگىنەن قارايتىن بولساق, جۇماعۇلوۆ ءبىر-بىرىمەن بايلانىسى جوق بىرنەشە سالادا قاتار ەڭبەك ەتىپتى جانە سول باعىتتاردىڭ ەڭ العى شەبىندە تەر توگىپتى.
وسى ورايدا, اكادەميك-جازۋشى زەينوللا قابدولوۆتىڭ بۇرىندارى جاريالانعان جۇماعۇلوۆ تۋرالى مىنا تۇجىرىمىنا قوسىلماسقا بولمايدى: «مەن بۇل كىسىنىڭ ازاماتتىق قاسيەتتەرىنە ەش كۇماندانبايمىن. ونىڭ قوس قولىن قۋسىرىپ, شاراسىز وتىرعان ءحالىن كورگەنىم جوق, ءومىر بويى ءوز حالقىنىڭ مۇددەسى ءۇشىن كۇرەسۋدەن ءبىر تانعان ەمەس».
پروفەسسور جۇماعۇلوۆتىڭ ءوزى ايتقانداي, ونىڭ عىلىمي دارىنى ومىربەك جولداسبەكوۆ, شالتاي سماعۇلوۆپەن قويان-قولتىق جۇمىس ىستەگەن جىلدارى جارقىراي كورىندى. اسىرەسە, ينجەنەرلىك سالانى ءوز ەلىمىزدە, قالا بەردى الەمدىك دەڭگەيدە دامىتۋ, قولدانبالى ماتەماتيكا تۋرالى جانە گيدروديناميكالىق مودەلدەردى زەرتتەۋلەر, قازاقستانداعى ماتەماتيكالىق مەكتەپتەردىڭ بىلىكتىلىگىن شىڭداۋ ءتارىزدى سان-سالالىق جۇمىستار ونىڭ كۇردەلى عۇمىرىنىڭ ەڭ وزەكتى تەتىگىنە اينالعانداي.
بۇل قۇندى ەڭبەكتەر ەلەۋسىز قالعان جوق, عىلىم دوكتورى اتاندى, شەتەلدە بىرنەشە مونوگرافيالارى جارىق كوردى, الەمنىڭ سان الۋان ۋنيۆەرسيتەتتەرى مەن اكادەميالارىنىڭ قۇرمەتتى پروفەسسورى, اكادەميگى بولىپ سايلاندى.
سونداي-اق باقىتجان تۇرسىن ۇلى الەمدىك دەڭگەيدەگى كاسىبي مامان رەتىندە تانىلدى, قازاقستان ماتەماتيكتەر قوعامىن باسقاردى, بۇگىنگە دەيىن تۇركى الەمى ماتەماتيكتەر قوعامىنىڭ پرەزيدەنتى.
باقىتجان تۇرسىن ۇلى جۇماعۇلوۆ ەلىمىزدىڭ بەلگىلى عالىمدارى مەن ينجەنەرلەرىن بىرىكتىرەتىن باستى عىلىمي وردا – قازاقستان رەسپۋبليكاسى ۇلتتىق ينجەنەرلىك اكادەميانىڭ ىرگەتاسىن قالاۋشىلاردىڭ ءبىرى ءارى 20 جىلدان بەرى وسى اكادەميانىڭ پرەزيدەنتى.
ول سونداي-اق ەلباسى ن.نازارباەۆ قاتىسقان قازاقستان ينجەنەرلەرىنىڭ ءبىرىنشى سەزىن ۇيىمداستىرۋشىلاردىڭ ساپىندا. وسى سەزدە كوتەرىلگەن ينجەنەرلىك سالا مەن قولدانبالى عىلىمدى وركەندەتۋ ماسەلەسى نۇرسۇلتان ءابىش ۇلى تاراپىنان دا قىزۋ قولداۋ تاپتى.
كوپ جىلداردان بەرى پرەزيديۋم مۇشەسى ءارى قر ۇيا-نىڭ كونكۋرستىق كوميسسيا توراعاسى رەتىندە ماعان اكادەميك جۇماعۇلوۆتىڭ وسى اكادەمياعا دەگەن شىنايى كوزقاراسى بىردەن بايقالادى, اسىرەسە, ءوزى توپتاستىرعان تالانتتى كادرلاردى عىلىمنىڭ «التىن قورى» دەپ ۇنەمى اسپەتتەپ وتىرادى.
ول اكادەميانىڭ پرەزيدەنتى بولعان ۋاقىتتا وسى ىرگەلى عىلىمي وردا ەلىمىزدىڭ اكادەميالىق قاۋىمداستىعىنىڭ بىرەگەي كوشباسشىسىنا اينالدى. 2005 جىلعى ءساۋىر ايىندا اكادەميك جۇماعۇلوۆتىڭ ومىرىندە توسىن وزگەرىس ورىن الدى. «وتان» پارتياسىنىڭ توراعاسى ن.ءا.نازارباەۆ وعان «وتان» رەسپۋبليكالىق ساياسي پارتياسى توراعاسىنىڭ مىندەتىن اتقارۋشى قىزمەتىن ۇسىندى. ب.جۇماعۇلوۆ ەلباسىنىڭ سەنىمىن تولىعىمەن ورىنداپ شىقتى.
سونداي-اق 2005 جىلى ول ەل پرەزيدەنتتىگىنە ۇمىتكەر رەتىندە تىركەلگەن ن.ءا.نازارباەۆتىڭ رەسپۋبليكالىق قوعامدىق شتابىن باسقاردى, وسى سايلاۋالدى كومپانيانى ۇيىمداستىرۋعا دا قىرۋار ەڭبەك ءسىڭىردى.
2007 جىلى جۇماعۇلوۆتىڭ بەلسەندى ارالاسۋىمەن ەلىمىزدىڭ پارتيالىق جۇيەسىندە ەلەۋلى وقيعا بولدى. بۇل ەلىمىزدەگى ساياسي پارتيالاردىڭ ءرولىن كوتەرۋ ماقساتىمەن پارلامەنت ماجىلىسىنە دەپۋتات سايلاۋدا تەپە-تەڭدىك جۇيەسىن ەنگىزۋدى زاڭداستىرۋ ەدى. بۇل شارانى دا «نۇر وتان» پارتياسى توراعاسىنىڭ ءبىرىنشى ورىنباسارى باقىتجان تۇرسىن ۇلى ويداعىداي اتقارىپ شىقتى. پارلامەنت سايلاۋى ناتيجەسىندە «نۇر وتان» پارتياسى داۋسىز جەڭىسكە جەتتى. وسى ۇزدىكسىز ەڭبەگىنە وراي اكادەميك جۇماعۇلوۆ دەپۋتات ءارى پارلامەنت ءماجىلىسى توراعاسىنىڭ ورىنباسارى بولىپ سايلاندى.
2008 جىلى باقىتجان تۇرسىن ۇلى ەل پرەزيدەنتىنىڭ جارلىعىمەن ەلىمىزدىڭ ەڭ ءىرى وقۋ ورىندارىنىڭ ءبىرى − ءال-فارابي اتىنداعى قازمۋ-ءدىڭ رەكتورى بولىپ تاعايىندالدى.
ول باسشىلىققا كەلگەن بويدا ۋنيۆەرسيتەت تۇتاسىمەن جاڭا باعىتقا بەت تۇزەدى. ۋنيۆەرسيتەت ەلىمىزدە تۇڭعىش رەت حالىقارالىق اككرەديتاتسيادان ءوتتى, ءبىرىنشى رەت وقۋ باعدارلامالارى الەمنىڭ ىرگەلى ۋنيۆەرسيتەتتەرىمەن سايكەستەندىرىلدى, تۇڭعىش رەت تمد كەڭىستىگىندە «باكالاۆر-ماگيستر-PhD دوكتورى» نەگىزىندەگى ءۇش ساتىلى وقۋ جۇيەسىنە كوشتى, ەلىمىزدە ءبىرىنشى رەت كرەديتتىك وقىتۋ تەحنولوگياسىن تولىق ەنگىزدى...
قازمۋ قالاشىعىندا جاڭا ۇلگىدەگى وقۋ عيماراتتارى, مۇراجاي, جاتاقحانا, تاعى دا باسقا تۇرمىستىق, سپورتتىق كەشەندەر بۇرىنعى جىلدارمەن سالىستىرعاندا الدەقايدا كوبىرەك بوي كوتەردى. ەڭ باستىسى, جاستاردىڭ الاڭسىز ءبىلىم الۋىنا بارلىق جاعداي جاسالدى.
اكادەميك جۇماعۇلوۆتىڭ رەكتور بولعان جىلدارى قازمۋ-ءدىڭ ناعىز گۇلدەنگەن شاعى ەدى دەسەك, اسىرىپ ايتقاندىق بولا قويماس.
ەكى جارىم جىلدان كەيىن ول ءبىلىم جانە عىلىم ءمينيسترى بولىپ تاعايىندالدى. بۇل جوعارىلاۋ دا تەگىننەن-تەگىس ەمەس. مەملەكەت باسشىسى باقىتجان تۇرسىن ۇلىنىڭ قازمۋ-ءدى از ۋاقىتتا الەمدىك وقۋ جۇيەسىنە سايكەستەندىرگەنىن ەسەپكە السا كەرەك.
اقيقاتىن ايتقاندا, باقىتجان جۇماعۇلوۆ ەڭ مىقتى ءبىلىم جانە عىلىم ءمينيسترى رەتىندە تاۋەلسىز قازاقستاننىڭ تاريحىندا قالعانى انىق. ول ءبىلىم جانە عىلىم سالاسىنا 40-تان استام قالىپتاسقان, جۇيەلەنگەن, تەرەڭ زەردەلەنگەن ۇسىنىستار ەنگىزدى.
2013 جىلعى قىركۇيەكتە باقىتجان تۇرسىن ۇلى مينيستر قىزمەتىنەن بوسادى دا, ءوزىنىڭ ەڭ سۇيىكتى ىسىنە قۇلشىنا كىرىستى. ول ەندى ۇلتتىق ينجەنەرلىك اكادەمياسى اياسىندا بۇكىل قازاقستان تاريحىندا بولىپ كورمەگەن اسا اۋقىمدى عىلىمي شارا − بۇكىل دۇنيەجۇزىلىك ينجەنەرلەر مەن عالىمداردىڭ كونگرەسىن وتكىزۋدى قولعا الدى.
بۇكىل دۇنيەجۇزىلىك كونگرەسس پرەزيدەنت نۇرسۇلتان نازارباەۆتىڭ «بولاشاقتىڭ ەنەرگياسى» اتتى عالامدىق جوباسىن نەگىزگە الا وتىرىپ, ەكسپو-2017 حالىقارالىق كورمەسى اياسىندا استانا قالاسىندا ءوز جۇمىسىن باستادى. كونگرەسس الەمدىك عىلىم مەن ينجەنەريانىڭ وڭشەڭ الىپتارىن جينادى جانە 51 مەملەكەتتىڭ مىڭنان استام وكىلدەرى قاتىستى.
قازىر اكادەميك جۇماعۇلوۆ قازاقستان رەسپۋبليكاسى پرەزيدەنتىنىڭ ءوزى تاعايىنداعان سەناتور, بىلايشا ايتقاندا, ەلىمىزدىڭ زاڭنامالىق مىنبەرىنىڭ سىننان وتكەن, تاجىريبەسى مول, كاسىبي وكىلى. ول تاعى دا بۋىرقانعان يدەيالارىن, شەبەرلىگىن وسى ورتادا شىڭداۋدا. تاعدىر وعان قاشان دا تىرشىلىكتىڭ قايناعان العى شەبىندە ءجۇرۋدى بۇيىرتقان. باقىتجان جۇماعۇلوۆ بۇگىندە قازاقستاندىقتار ءۇشىن اسا ماڭىزدى جوبا − قازاقستان رەسپۋبليكاسى پرەزيدەنتى ۇسىنعان بەس الەۋمەتتىك ماسەلەنى تەز ارادا ىسكە قوسۋدى قاداعالايتىن قوعامدىق كەڭەستىڭ توراعاسى. حالىقتىڭ ءال-اۋقاتىن كوتەرۋگە ارنالعان كەشەندى الەۋمەتتىك-ەكونوميكالىق بۇل ماسەلەلەردى تۇبەگەيلى شەشىپ, ورنىقتىرۋدى باقىتجان جۇماعۇلوۆقا تاپسىرۋ دا وعان كورسەتىلگەن ايرىقشا قۇرمەت دەپ بىلەمىن. قورىتا ايتقاندا, اكادەميك جۇماعۇلوۆ ەلباسىنىڭ اسا جاۋاپتى تاپسىرمالارىن ورىندايتىن سەنىمدى سەرىگىنە اينالدى.
ەندەشە, وسى قارقىنىڭنان تايما, باقىتجان!
اسقار ق ۇلىباەۆ,
مەملەكەت جانە قوعام قايراتكەرى,
حالىقارالىق ينجەنەرلىك اكادەميانىڭ اكادەميگى