تاياۋدا كوكشەتاۋ قالاسىنداعى ماعجان جۇماباەۆ اتىنداعى وبلىستىق امبەباپ-عىلىمي كىتاپحاناسىندا كەڭەس وداعىنىڭ باتىرى مالىك عابدۋلليننىڭ عىلىمي-ادەبي ەڭبەكتەرى قامتىلعان 11 تومدىق كىتاپتىڭ تۇساۋكەسەرى وتكىزىلدى.
ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ شارالارى اياسىندا وتكىزىلگەن تۇساۋكەسەرگە باتىردىڭ قىزى مايدان مالىكقىزى باستاعان اعايىن-تۋىستارى, قوعام قايراتكەرلەرى, جەرگىلىكتى اقىن-جازۋشىلار قاتىستى. وبلىس اكىمى مالىك مىرزالين اقتوبە, وڭتۇستىك قازاقستان, سولتۇستىك قازاقستان, پاۆلودار وبلىستارى مەن استانا, ستەپنوگور قالالارى جانە وبلىسىمىزدىڭ 17 اۋدانىنان كەلگەن كىتاپحانا وكىلدەرىنە وقىرمان ولجاسىنا اينالاتىن جيناقتاردى سالتاناتتى تۇردە تابىس ەتتى.
بۇل جيناق الماتى قالاسىنداعى حالىقارالىق قازاق پەن-كلۋبىنىڭ پرەزيدەنتى بيگەلدى عابدۋلليننىڭ باسشىلىعىمەن «يدان» باسپاسىنان 1000 دانا تيراجبەن جارىق كورىپ وتىر. سالتاناتتى جيىندا ءسوز سويلەگەن بيگەلدى عابدۋللين مالىك عابدۋلليننىڭ ەڭبەكتەرىن شەت تىلىنە اۋدارۋ قاجەتتىلىگىنە توقتالىپ, تاياۋدا جازۋشى ساكەن ءجۇنىسوۆتىڭ «اماناي مەن زاماناي» پوۆەسى اعىلشىن تىلىنە اۋدارىلىپ, جارىققا شىعاتىنىن ايتىپ, جينالعان قاۋىمدى ءبىر قۋانتىپ تاستادى. مالىك عابدۋللين مۋزەيىنىڭ ديرەكتورى قۇدايبەرلى مىرزابەك عالىم مالىكتىڭ مازمۇنى تەرەڭ ەڭبەكتەرى قامتىلعان جيناقتى دايىنداۋ بارىسىنداعى جۇمىسقا توقتالدى.
سالتاناتتى جيىندا ءسوز سويلەگەن جازۋشى جابال ەرعاليەۆ ۇلى دالانىڭ ءبىرتۋار ۇلدارىن ۇلىقتاۋ «ماڭگىلىك ەل» جالپىۇلتتىق يدەياسىمەن استاسىپ جاتقانىن تىلگە تيەك ەتتى. عالىمدار كىتاپ مازمۇنىنا قىسقاشا شولۋ جاساسا, باتىردىڭ قىزى مايدان مالىكقىزى اكەسىنىڭ مول مۇرالارىن ماڭگىلىك ەستە قالدىرۋعا زور مۇمكىندىك تۋعىزعان ەل اعالارىنا ءوز ريزاشىلىعىن ءبىلدىردى.
بايقال ءبايادىل,
«ەگەمەن قازاقستان»