ءۇشىنشى سىنىپقا ەندى كوشكەن نيكولاي كەرتسمان 6-12 تامىز ارالىعىندا ءۇش مارتە اۆتوكولىك ايداپ كەتىپ, جول-كولىك وقيعاسىنا ۇشىراعان. كىشكەنتاي «باۋكەسپەنىڭ» كەسىرىنەن ونىڭ اتا-اناسى ەندى 1,4 ملن تەڭگە ايىپپۇل تولەۋگە ءماجبۇر.
بۇل وقيعا تىپ-تىنىش تامىز ايىندا ورالدىقتاردى تاڭ-تاماشا قالدىردى. 6 تامىز كۇنى سەگىز جاسار كوليا ەڭ العاش كوشەدە ەسىگى اشىق, كىلتى «اۋزىندا» تۇرعان «سۋزۋكي» ماركالى كولىكتى ايداپ كەتكەن. كىشكەنتاي «بارىمتاشى» بىرنەشە كوشەدەن ءوتىپ بارىپ, «لادا گرانتا» كولىگىنە سوعىلىپ توقتاعان. 8 تامىز كۇنى كوليا ۇيىنەن تاعى دا قاشىپ كەتىپ, جول جيەگىندە اشىق تۇرعان «تويوتا» ميكرواۆتوبۋسىن ايداي جونەلگەن. اۆتوكولىك يەسى پوليتسياعا حابارلاپ, ءتارتىپ ساقشىلارى سوڭىنان قۋعاندا, كوليا كولىكتى باسقارا الماي, كوپىردىڭ تىرەك-باعانىنا سوعىلىپ قالعان. ءۇشىنشى رەت – 12 تامىز كۇنى كوليانىڭ كوزى «Hyundai» كولىگىنە ءتۇسىپتى. وسى وقيعالاردىڭ بارىندە دە كولىكتەر جول جيەگىندە اشىق-شاشىق, قاراۋسىز تۇرعان ەكەن.
– 2 تامىز كۇنگى وقيعادا نيكولاي كەرتسمان جولى جوندەلىپ جاتقان كوشەنىڭ بەتون كەدەرگىسىنە سوعىلدى, – دەيدى ورال قالالىق جەرگىلىكتى پوليتسيا قىزمەتىنىڭ باستىعى پوليتسيا پودپولكوۆنيگى ءمۇسىلىم جاردەموۆ.
ابىروي بولعاندا كىشكەنتاي «جۇرگىزۋشىنىڭ» ءوزى ءدىن امان. اكەسى 47 جاستاعى الەكساندر كەرتسماننىڭ ايتۋىنشا, نيكولاي كىشكەنتاي كۇنىنەن تەحنيكاعا قۇمار, تىنىمسىز بالا بولىپ وسكەن. ەڭ سۇيىكتى ويىنى – كومپيۋتەرلىك كولىك جارىسى ەكەن. ونىڭ ۇستىنە, وتىز جىلعا تاياۋ جۇرگىزۋشىلىك ەڭبەك ءوتىلى بار اكەسى اۆتوبۋس جۇرگىزۋشىسى بولعان كەزىندە ۇلىن قاسىنا, ءتىپتى الدىنا وتىرعىزىپ, وزىمەن بىرگە الىپ جۇرگەن ەكەن.
جوعارىداعى ءۇش وقيعا بويىنشا دا قازاقستان رەسپۋبليكاسى قىلمىستىق كودەكسىنىڭ 200-بابى بويىنشا («اۆتوكولىكتى ايداپ كەتۋ») قىلمىستىق ءىس قوزعالعان. ونىڭ ۇستىنە, «كامەلەتكە تولماعاندى تاربيەلەۋ مىندەتىن اتقارماعانى», «اتا-انالىق مىندەتتەرىن دۇرىس ورىنداماعانى ءۇشىن» كوليانىڭ اتا-اناسى دا جاۋاپكەرشىلىككە تارتىلعان. جوعارىدا سوعىلىپ-ب ۇلىنگەن اۆتوكولىك يەلەرى وزدەرىنە كەلگەن شىعىن مولشەرىن 1,4 ملن تەڭگەگە باعالاپ وتىر ەكەن. ەكىنشى توپ مۇگەدەگىنە بۇل قارجىنى تولەۋ دە وڭاي بولماسا كەرەك.
ورال قالالىق ىشكى ىستەر باسقارماسىندا وتكەن بريفينگكە ارنايى الدىرىلعان كىشكەنتاي كوليا بۇل ارەكەتتى جاساۋعا نە سەبەپ بولعانىن ءتۇسىندىرىپ ايتا المادى. ءتىپتى «اتتەڭ, بويىم كىشكەنتاي, الدىمدى كورە الماي قالدىم, ايتپەسە ەشتەڭەگە سوعىلماس ەدىم» دەپ اقتالىپ قويادى. اكە-شەشەسى, اتا-اجەسى بار بالا ەشتەڭەدەن تارشىلىق كورمەي ءوسىپ كەلەدى ەكەن. ءوزىنىڭ پلانشەتى, كومپيۋتەرى دە بار. «كوليا وتە اسەرشىل, تەحنيكانى وتە جاقسى كورەدى, اۆتوكولىكتىڭ بۇكىل ماركاسىن تانيدى, كىشكەنتايىندا ۇنەمى كولىك جۇرگىزىپ وينايتىن. بىلمەيمىن, اسىرەسە سوڭعى ەكى اپتادا ءتىپتى وتە اسەرشىل بولىپ, وزگەرىپ كەتتى», دەيدى اكەسى ا.كەرتسمان.
مۇعالىمدەرىنىڭ ايتۋىنشا, مەكتەپتە نيكولاي كەرتسماننىڭ ساباعى دا, ءتارتىبى دە جاقسى كورىنەدى. بۇرىن ەسەپتە تۇرماعان. وقىس وقيعادان كەيىن مەكتەپ ديرەكتورى نيكولايعا جەكە جولىعىپ, ءمان-جايدى بىلۋگە تىرىسقان. «قىلمىستىق ءىس تەرگەۋى بارىسىندا ءبىز نيكولايدى قىلمىسقا يتەرمەلەگەن نە نارسە ەكەنىن انىقتايمىز. ازىرگە ونى جول-كولىك اپاتىنا تۇسكەن اۆتوكولىكتەر تۇراتىن ايىپ تۇراعىنا اپارىپ كورسەتىپ, كولىك جۇرگىزۋ – وتە جاۋاپتى ءىس ەكەنىن, جاۋاپسىزدىق ومىرگە قاۋىپتى ەكەنىن ءتۇسىندىرىپ, پروفيلاكتيكالىق اڭگىمە جۇرگىزەمىز», دەيدى ورال قالالىق جەرگىلىكتى پوليتسيا قىزمەتىنىڭ باستىعى, پوليتسيا پودپولكوۆنيگى م.جاردەموۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى