اتالعان باعدارلاما اياسىندا قابىلدانعان وتىنىشتەردىڭ سانى بويىنشا الماتى, استانا جانە اقتاۋدان كەيىنگى 4-ءشى ورىندا اقتوبە قالاسى تۇر.
اقتوبەدە باعدارلاما شارتتارى مەن تالاپتارىنا ساي 100-گە تارتا ادام ءوتىنىش تاپسىرعان, ولاردىڭ ون پروتسەنتكە جۋىعى نەسيە الىپ ۇلگەرگەن. اقتوبە قالاسىندا «7 – 20 – 25» مەملەكەتتىك-يپوتەكالىق باعدارلاماسىن جۇزەگە اسىرۋعا ەكىنشى دەڭگەيلى 8 بانك تارتىلعان. سونىڭ ىشىندە «بانك تسەنتر كرەديت» فيليالىنىڭ بەلسەندى ەكەنى بايقالادى. بۇل نەسيە الۋشىلاردىڭ دەنى وسى بانكتى تاڭداعانىنان كورىنەدى. اقتوبە قالالىق تۇرعىن ءۇي قاتىناستارى ءبولىمىنىڭ باسشىسى جانارگۇل دۇيسەكەنوۆانىڭ ايتۋىنشا, اتالعان بانك ارقىلى نەسيە الۋعا تىلەك بىلدىرگەندەرگە 51 ميلليون 452 مىڭ تەڭگە نەسيە بەرىلگەن. 50-دەن استام ادامنىڭ ءوتىنىشى قارالىپ, بانك تاراپىنان ولاردىڭ تولەم قابىلەتتەرى راستالعان. ونىڭ مولشەرى 361 ميلليون تەڭگەگە تەڭ. تاياۋ ارادا 55 ادامعا 456 ميلليون 137 مىڭ 600 تەڭگەنىڭ نەسيەسىن بەرۋ كوزدەلىپ وتىر.
وڭىردە «7-20-25» يپوتەكالىق باعدارلاماسىنا قاتىسۋعا تىلەك بىلدىرۋشىلەر قاتارىنىڭ وسە ءتۇسۋ سەبەبى ەكىنشى دەڭگەيلى بانكتەر مەن كاسىپورىن وكىلدەرى, قۇرىلىس كومپانيالارى اراسىنداعى ءوزارا بايلانىستاردىڭ وڭ جولعا قويىلعانىندا دەۋگە بولادى. بۇل باعىتتا باعدارلاما باعىتتارىن جۇرتشىلىققا ءتۇسىندىرۋ ءۇشىن قولعا الىنعان شارالار مەن اكتسيالاردىڭ ىقپالى دا ايتارلىقتاي.
«7 – 20 – 25» باعدارلاماسىنىڭ ەكى ارتىقشىلىعىن ايتا كەتكەن ءجون. بىرىنشىدەن, قۇرىلىسى اياقتالىپ, ءازىر تۇرعان ءۇيدى ساتىپ الۋ مۇمكىندىكتەرى بارىنشا مول. باسپانانى قالانىڭ قاي تۇسىنان كوپ قاباتتى ءۇيدىڭ قاي قاباتىنان نەمەسە قانداي قۇرىلىس كومپانياسى سالعان ءۇيدى تاڭداۋ قاجەتتىگىن ءار ادام ءوزى شەشە الادى. ەكىنشى ارتىقشىلىق − «7 – 20 – 25» يپوتەكالىق باعدارلاماسى اياسىندا ءۇي, پاتەر كەزەگىنە تۇرۋدىڭ قاجەتى جوق. ەڭ باستىسى, سوڭعى التى ايداعى كىرىستىڭ مولشەرى كورسەتىلگەن انىقتاما بولسا بولعانى. بۇعان قوسا ءوز اتىندا باسقا ءۇي مەن جىلجىمايتىن م ۇلىكتىڭ تىركەلمەگەنىن راستاۋ كەرەك.
وسى ماتەريالدى ازىرلەۋ بارىسىندا اقتوبە قالاسىنىڭ اكىمى ءىلياس يسپانوۆقا جولىعىپ, وبلىس ورتالىعىندا اتالعان باعدارلامانىڭ جۇزەگە اسۋ بارىسىن سۇراعان ەدىك.
− رەسپۋبليكا تۇرعىندارىنىڭ الەۋمەتتىك-تۇرمىستىق جاعدايىن ودان ءارى جاقسارتۋ − مەملەكەت باسشىسى نۇرسۇلتان نازارباەۆ جۇرگىزىپ وتىرعان ساليقالى ساياساتتىڭ باسىم باعىتتارىنىڭ ءبىرى. وزگەسىن ايتپاعاندا, ەلباسىنىڭ «بەس الەۋمەتتىك باستاماسىنىڭ» ءبىرى ءار وتباسىنا باسپانا الۋدىڭ جاڭا مۇمكىندىكتەرىن قاراستىرۋ بولدى. بۇل رەتتە «7 – 20 – 25» يپوتەكالىق باعدارلاماسى مەن «نۇرلى جەر» مەملەكەتتىك تۇرعىن ءۇي باعدارلاماسى ءبىرىن-ءبىرى تولىقتىرا ءتۇستى. ەكى باعدارلاما تۇرعىندارعا قولجەتىمدى باعا بويىنشا از ۋاقىت ارالىعىندا باسپانالى بولۋعا مۇمكىندىك بەرەدى, قۇجاتتاردى ازىرلەۋگە ءارى كەتكەندە ەكى-ءۇش اپتا عانا ۋاقىت كەتەدى. سوندىقتان دا بۇگىندە اقتوبە قالاسىندا تۇرعىنداردى پاتەرمەن قامتۋدىڭ باستى ارناسىن وسى باعىتقا بۇرىپ وتىرمىز, − دەدى ءى.يسپانوۆ.
جوعارىدا «7 – 20 – 25»-ءتىڭ وزگە باعدارلامالاردان ەكى ارتىقشىلىعىن ايتتىق. بۇعان قوسا ونىڭ ءۇشىنشى ارتىقشىلىعىن دا قوسا ايتا كەتكىمىز كەلەدى. اتالعان باعدارلاما شەڭبەرىندە جەتىم بالالاردىڭ دا جاڭا باسپاناعا قول جەتكىزۋ مۇمكىندىگى بار. وسى ورايدا, اقتوبەدە وزگە وڭىرلەر ءۇشىن ۇلگى بولارلىقتاي تاجىريبە قالىپتاسقان. ياعني قازىردىڭ وزىندە وڭىردە «7 – 20 – 25» باعدارلاماسىنا سايكەس جەتىم بالالاردىڭ بانكتەگى ەسەپشوتتارىنا قارجىلاي سەرتيفيكاتتار بەرىلۋدە. قوبدا وتباسىلىق ۇلگىدەگى بالالار ءۇيىنىڭ تاربيەلەنۋشى تۇلەگى تيمۋر اكيەۆ كۇنى كەشە «7 – 20 – 25» باعدارلاماسى اياسىندا 3 بولمەلى پاتەر كىلتىنە يە بولىپتى. وتباسىن قۇرعان جىگىت زايىبى ەكەۋى ەكى بالا تاربيەلەپ وتىر ەكەن.
«بىرنەشە جىل مەملەكەتتىك تۇرعىن ءۇي قورىندا پاتەر كەزەگىندە تۇردىم. الايدا, كەزەگىمە جەتە المادىم. سودان سوڭ «تۇرعىن ءۇي قۇرىلىس جيناق بانكىنە» 2 864 000 تەڭگە قاراجات جيناقتادىم. بۇل سوما دا باسپانا ساتىپ الۋىم ءۇشىن ازدىق ەتتى. وسىنداي قىسىلتاياڭ ساتتە اقتوبە قالاسىنىڭ اكىمى ءىلياس يسپانوۆ يپوتەكالىق تۇرعىن ءۇي الۋ ءۇشىن باستاپقى جارناعا قاجەتتى 700 000 تەڭگەنىڭ سەرتيفيكاتىن تابىس ەتتى. ءسويتىپ 3 بولمەلى پاتەر كىلتىنە يە بولدىم», دەيدى ول.
قىسقاسى, نەسيە الۋ مۇمكىندىگى مەن نەسيە تاريحى تالاپتارعا ساي كەلسە «7 – 20 – 25» باعدارلاماسى بويىنشا راسىمدەۋگە جول اشىلدى دەي بەرىڭىز. اتالعان باعدارلامانىڭ وسى قاراپايىم دا تۇسىنىكتى شارتتارى اقتوبەلىكتەردى ەرەكشە ىنتالاندىرىپ وتىر. وبلىس ورتالىعىندا «7 – 20 – 25» باعدارلاماسىنا سايكەس تۇرعىزىلىپ جاتقان ءساندى دە ساپالى قۇرىلىستار تۇرعىندار تىلەگىن تولىعىمەن وتەي الادى.
تەمىر قۇسايىن,
«ەگەمەن قازاقستان»
اقتوبە