«رۋحاني جاڭعىرۋ» باعدارلاماسى اياسىندا وتكەن جىلدىڭ قازان ايىندا شىعىس قازاقستان وبلىسىندا «مەنىڭ مەكتەبىم» جوباسىنىڭ تۇساۋى كەسىلگەن ەدى. جوبا شەڭبەرىندە وبلىستاعى 277 تولىق جيناقتى مەكتەپتىڭ 476 كابينەتىن حيميا, فيزيكا, بيولوگيا جانە روبوتتى تەحنيكا سىنىپتارىمەن نازارباەۆ زياتكەرلىك مەكتەپتەرىنىڭ تاجىريبەسى نەگىزىندە زاماناۋي قۇرال-جابدىقتارمەن جابدىقتاۋ جوسپارلانعان-دى. ەرەكشە اتاپ وتەرلىگى, جاس ۇرپاققا قاجەت جوبانى قارجىلاندىرۋدى وڭىردەگى كاسىپكەرلەر مەن ءىرى كاسىپورىندار تولىقتاي ءوز مويىندارىنا الدى.
ەندى, مىنە, اللا ءساتىن سالسا, ايماقتاعى 277 ءبىلىم ورداسىنىڭ وقۋشىلارى 1 قىركۇيەكتەن باستاپ زاماناۋي قۇرىلعىلارمەن جاراقتالعان جاڭا كابينەتتەردە ءبىلىم الاتىن بولادى. وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆانىڭ ايتۋىنشا, ەلىمىزدە بالاماسى جوق بىرەگەي اكتسياعا شىعىستىڭ اتىمتاي جومارت ازاماتتارى 2,8 ملرد تەڭگە كولەمىندە قارجى اۋدارىپتى. ونىڭ 2,3 ميلليارد تەڭگەسى 4 كابينەتكە قاجەت قۇرىلعىلاردى جانە 500 ميلليون تەڭگەسى جيھازداردى ساتىپ الۋعا جۇمسالىپتى. «476 كابينەتتىڭ 66-سى فيزيكا, 53-ءى حيميا, 85-ءى بيولوگيا, 272-ءسى روبوتتى تەحنيكا كابينەتتەرى.
ەلىمىزدە «تسيفرلى قازاقستان» باعدارلاماسىن ىسكە اسىرۋدىڭ جول كارتاسى ازىرلەنىپ, بارلىق مەكتەپتەردىڭ 30 پايىزىن روبوتتى تەحنيكا كابينەتتەرىمەن جابدىقتاۋ مىندەتتەلگەن ەدى. ءبىزدىڭ وبلىس بۇل مەجەنى 42 پايىزعا ارتىعىمەن ورىنداپ وتىر. جوعارىدا ايتقان 277 مەكتەپتە اشىلاتىن كابينەتتەردە ساباق بەرەتىن مۇعالىمدەردىڭ بارلىعىن وقىتتىق. ۇزىن سانى 600 ادامعا (323-ءى مۇعالىم, قالعانى – لابورانتتار) ماسكەۋدەن, لوندوننان كەلگەن ماماندار روبوتتى تەحنيكا كابينەتىندەگى قۇرىلعىلارمەن قالاي جۇمىس ىستەۋ كەرەكتىگىن, ياعني پراكتيكالىق جاعىن جاقسىلاپ ۇيرەتتى. تەوريالىق جاعىن مۇعالىمدەرىمىز «ورلەۋ» بىلىكتىلىكتى ارتتىرۋ ينستيتۋتى ارقىلى جاڭارتىلعان ءبىلىم باعدارلاماسى اياسىندا وقىدى. دەگەنمەن مۇنىمەن شەكتەلمەي, مۇعالىمدەردى الداعى ۋاقىتتا ارنايى كۋرستارعا جىبەرۋدى جوسپارلاپ وتىرمىز», دەيدى باسقارما باسشىسى.
وسىدان ءبىراز ۋاقىت بۇرىن «نۇر وتان» پارتياسى «تسيفرلى قازاقستان» باعدارلاماسى اياسىندا بالالارعا ارنالعان 1 مىڭ تەگىن IT-سىنىپتارىن اشۋ جونىندە ۇسىنىس ايتقانى بەلگىلى. سايرانگۇل ءجۇمادىلوۆا شىعىس قازاقستان بۇل باستامانى جۇزەگە اسىرۋعا قازىردىڭ وزىندە دايىن ەكەندىگىن ايتادى. «ۇكىمەت ەلىمىز بويىنشا 1 مىڭداي ءىت-سىنىپ اشۋدى جوسپارلاۋدا, ال ءبىزدىڭ وبلىس قازىردىڭ وزىندە 277 سىنىپ اشۋعا ءازىر. سەمەي مەن وسكەمەندەگى ەكى كوللەدجدە IT-ماماندارىن دايارلايتىن ورتالىق اشقان بولاتىنبىز. سەمەيدەگى رەسۋرستىق ورتالىقتىڭ دايىن باعدارلاماسى بار ەكەن. ءبىز ونى مەكتەپ باعدارلاماسىنا بەيىمدەدىك. 306 ساعاتقا جوسپارلانعان باعدارلاما 3-تەن 10 سىنىپ وقۋشىلارىنا دەيىن ارنالعان. بۇل باعدارلامانى ءبىلىم جانە عىلىم مينيسترلىگىنە جىبەرىپ, كەلىسىمدەرىن الدىق. قازىر ءىت-سىنىپتاردى اشۋعا دايىنبىز. وندا ساباق بەرەتىن مۇعالىمدەردى وقىتىپ جاتىرمىز. ءار مەكتەپتەن ەكى مۇعالىمنەن. ولار قولدارىنا ءىت-مامان دەگەن كۋالىك الىپ شىعادى. وقۋشىلاردى روبوتتى تەحنيكا, باعدارلامالاۋ, مەحاترونيكا, ۆەبديزاين جانە مودەلدەۋ سياقتى بەس باعىتتا وقىتۋدى جوسپارلاپ وتىرمىز. 3-4 سىنىپتارعا ويىن تۇرىندە وتكىزەمىز. ءارى قاراي كۇردەلەنە بەرەدى. سوندا بالا مەكتەپ بىتىرگەندە وندىرىستە جۇمىس ىستەۋگە دايىن بولادى», دەيدى س.ءجۇمادىلوۆا.
ازامات قاسىم,
«ەگەمەن قازاقستان»
شىعىس قازاقستان وبلىسى