قاراعاندىدا Elbasy joly جولى دەپ اتالعان جاڭا تۋريستىك مارشرۋتتىڭ تۇساۋكەسەرى بولدى. اشىلۋى استانانىڭ 20 جىلدىق مەرەيتويىنا ورايلاستىرىلعان جاڭا تاريحي-اقپاراتتىق تۋرعا قاراعاندى وبلىسىنىڭ اكىمدىگى باستاماشى بولعان.
ەلىمىزدە العاش رەت اشىلعان تاقىرىپتىق تۋر قازاقستاننىڭ تۇڭعىش پرەزيدەنتى وقىعان جانە ەڭبەك ەتكەن نىسانداردى ارالاپ كورۋگە ارنالعان. تۋردىڭ العاشقى ايالداماسى – تەمىرتاۋداعى تۇڭعىش پرەزيدەنتتىڭ تاريحي-مادەني ورتالىعى. تۋريستەر مۇندا 6 ەكسپوزيتسيالىق زالدى ارالاپ, ونداعى 3 مىڭنان استام ەكسپوناتپەن تانىسۋعا مۇمكىندىك الادى.
ودان كەيىن ساياحاتشى قاۋىم اتاقتى قاراعاندى مەتاللۋرگيالىق كومبيناتىنىڭ تىنىس-تىرشىلىگىمەن تانىسادى. مۇندا جاس گورنوۆوي نۇرسۇلتان نازارباەۆ قازاقستاننىڭ العاشقى شويىنى الىنعان تاريحي ءساتتىڭ كۋاگەرى بولعان. ءارى قاراي تۋريستەر ەلباسى ءبىلىم العان قاراعاندى مەملەكەتتىك تەحنيكالىق ۋنيۆەرسيتەتىندە بولىپ, الما-ماتەردى ارالاپ كورەدى. تۋردىڭ سوڭعى نۇكتەسى – قاراعاندىداعى شاحتا-مۋزەي. بۇل جەردە تۋريستەر جەر استىنا ءتۇسىپ, وزدەرىن از عانا ۋاقىت بولسا دا كەنشى كەيپىندە سەزىنە الادى.
– استاناعا كەلەتىن قوناقتار تۋريستىك سالانىڭ جەتىستىگىنە ءارى قاراي قىزىعۋشىلىق تانىتار بولسا, قاراعاندىنى دا ەسكە الار دەگەن ويدامىز. ەگەر دە ءبىز بەرىك بايلانىس ورناتار بولساق, وندا تۋريستەر اعىنىن 2-3 ەسەگە كوبەيتە الامىز دەپ جوسپارلاپ وتىرمىز, – دەيدى وبلىستىق كاسىپكەرلىك باسقارماسىنىڭ باسشىسى تاتيانا ابلاەۆا.
قاراعاندى وبلىسىنا ءبىر جىلدا 300 مىڭنان استام تۋريست كەلەدى ەكەن. وڭىردە 60-تان استام بەكىتىلگەن تۋريستىك مارشرۋت قوناقتارعا قىزمەت كورسەتەدى.
قايرات ءابىلدا, «ەگەمەن قازاقستان»
قاراعاندى وبلىسى