الماتىداعى جەمقورلىققا قارسى كۇرەس جونىندەگى «SANALY URPAQ» جوبالاۋ ءوفيسى ەكسپەريمەنتتىك رەجىمدە ءال-فارابي اتىنداعى قازاق ۇلتتىق ۋنيۆەرسيتەتى نەگىزىندە سىبايلاس جەمقورلىققا قارسى مونيتورينگ جۇيەسىن سىناقتان وتكىزدى. جوبا رەسپۋبليكاداعى جەتەكشى ۋنيۆەرسيتەتتىڭ 16 مىڭنان استام ستۋدەنتى مەن وقىتۋشىلارىن قامتىدى.
مونيتورينگ ءادىسناماسى «وقىتۋشى ستۋدەنتتەردىڭ كوزىمەن», «وقىتۋشى ارىپتەستەردىڭ كوزىمەن», «ستۋدەنتتەردىڭ قاناعاتتانۋىن باعالاۋ», «ۋنيۆەرسيتەت تۇلەكتەردىڭ كوزىمەن», «سىبايلاس جەمقورلىقتى قابىلداۋ يندەكسى» سياقتى جاپپاي جانە ىرىكتەلگەن سۇراق-جاۋاپتارعا نەگىزدەلگەن ساۋالدامالار سەرياسىن قامتيدى. ولار جوو-لارداعى سىبايلاس جەمقورلىققا قارسى ساياساتتىڭ جاي-كۇيىن جانە تيىمدىلىگىن باعالاۋدىڭ بىرىڭعاي جۇيەسىن قۇرايدى.
وعان ءال-فارابي اتىنداعى قازۇۋ-ءدىڭ «سىبايلاس جەمقورلىقتان تىس ۋنيۆەرسيتەت» اتتى جوباسىنىڭ اياسىندا جەتى جىل بويى قالىپتاسقان پراكتيكالىق ازىرلەمەلەرى نەگىز بولىپ وتىر. اتالعان جوبانى جۇزەگە اسىرۋ ۋنيۆەرسيتەتتىڭ بارلىق سالاسىندا جەمقورلىققا قارسى تەحنولوگيالار كەشەنىن ەنگىزۋدى جانە ولاردىڭ تيىمدىلىگىن ۇنەمى باعالاۋدى قامتاماسىز ەتپەك.
سىبايلاس جەمقورلىققا قارسى ءىس-قيمىل مونيتورينگى جۇيەسى ستۋدەنتتەر مەن وقىتۋشىلار تۇرعىسىنان سىبايلاس جەمقورلىقتى قابىلداۋ يندەكسىن انىقتاۋعا مۇمكىندىك بەرەدى. ول وقىتۋشىلاردىڭ كورپوراتيۆتىك مادەنيەت نورمالارى مەن كاسىبي قۇندىلىقتاردى ۇستانۋى, ءبىلىم بەرۋ جانە وقۋ-تاربيە ۇدەرىسىنىڭ اشىقتىعى, وقۋ جەتىستىكتەرىن باعالاۋدىڭ وبەكتيۆتىلىگى مەن اكادەميالىق شىنايىلىق, كورسەتىلەتىن قىزمەت ساپاسى دەڭگەيىمەن قاناعاتتانۋ دارەجەسى جانە جوو ورتاسىندا جوسىقسىز پراكتيكالاردىڭ تارالۋى سياقتى ماڭىزدى پارامەترلەر بويىنشا باعالاۋدى قامتيدى.
اۋقىمدى زەرتتەۋلەردىڭ قورىتىندىسى بويىنشا فاكۋلتەتتەر مەن كافەدرالاردىڭ سىبايلاس جەمقورلىققا قارسى رەيتينگى جاسالىپ, ونىڭ ناتيجەلەرى قازۇۋ عىلىمي كەڭەسىنىڭ وتىرىسىندا كەڭىنەن تالقىلاندى. «SANALY URPAQ» جوبالاۋ ءوفيسىنىڭ باسشىسى قايىرجان توقۋشەۆ اتاپ وتكەندەي, مۇنداي الەۋمەتتىك زەرتتەۋلەر بارلىق جوعارى وقۋ ورىندارىندا جۇرگىزىلۋى ءتيىس. ويتكەنى بۇل سىبايلاس جەمقورلىقتىڭ الدىن الۋ جانە وعان قارسى كۇرەس بويىنشا ناقتى شارالاردى ۋاقتىلى قالىپتاستىرۋعا كومەكتەسەدى. جوبالاۋ ءوفيسى مونيتورينگ جۇيەسى مەن ونى وتكىزۋ تاجىريبەسىن الماتىداعى بارلىق جوو-لارعا سىبايلاس جەمقورلىققا قارسى ءىس-قيمىلداردى زەرتتەۋ جانە پايدالانۋ ءۇشىن ۇسىناتىن بولادى.
«SANALY URPAQ» جوبالىق ءوفيسى ۇستىمىزدەگى جىلدىڭ كوكتەمىندە ءال-فارابي اتىنداعى قازاق ۇلتتىق ۋنيۆەرسيتەتى نەگىزىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن اشىلعان. اگەنتتىك توراعاسى اليك شپەكباەۆ, الماتى قالاسىنىڭ اكىمى باۋىرجان بايبەك جانە ءال-فارابي اتىنداعى قازۇۋ رەكتورى عالىم مۇتانوۆ ءبىلىم بەرۋ سالاسىنداعى سىبايلاس جەمقورلىققا قارسى ءىس-قيمىل تەتىكتەرىن ەنگىزۋ تۋرالى ۇشجاقتى كەلىسىمگە قول قويعان بولاتىن.
ارمان وكتيابر,
«ەگەمەن قازاقستان»
الماتى