مادەنيەت جانە سپورت مينيسترلىگىنىڭ ۇيىمداستىرۋىمەن ماۋسىم ايىنىڭ 24-30 كۇندەرى استانانىڭ 20 جىلدىعىنا وراي وتەتىن «Eurasian Dance Festival» ءىى حالىقارالىق بالەت ونەرى جوباسىنا ارنالعان ءباسپاسوز ءماسليحاتىنا «استانا بالەت» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى ۆالەري كۇزەمباەۆ, بەلگىلى حورەوگراف ريكاردو امارانتە, «استانا بالەت» تەاترىنىڭ باس بالەتمەيستەرى, قازاقستاننىڭ ەڭبەك سىڭىرگەن قايراتكەرى مۋكارام اۆاحري, فەستيۆالدىڭ اتقارۋشى ديرەكتورى جانىبەك قايىر قاتىستى.
استاناداعى ەۋرازيالىق بالەت فەستيۆالى تانىمال بالەت جۇلدىزدارى مەن جاستاردىڭ نازارىن اۋدارتقان الەمدىك دەڭگەيدەگى بىردەن-ءبىر ءداستۇرلى ءىرى ونەر جوباسىنا اينالىپ كەلەدى. حالىقارالىق جوباعا قىتاي ۇلتتىق بالەتىنىڭ بالەت ترۋپپاسى, يسپانيانىڭ اڭىزعا اينالعان «Castro Romero» ۇجىمى, گوللانديا ۇلتتىق بالەتى, پورتۋگاليا ۇلتتىق بالەتى, سلوۆەنيا ۇلتتىق بالەتى, «استانا وپەرا», اباي اتىنداعى ماوبت, «استانا بالەت» تەاترىنىڭ ۇجىمدارى مەن ۇلكەن تەاتر (رەسەي) سوليستەرى قاتىسادى دەپ كۇتىلۋدە.
سونىمەن قاتار فەستيۆال اياسىندا «استانا بالەت» تەاترىنىڭ ساحناسىندا تۇڭعىش رەت الەمدىك بالەت جۇلدىزدارىنىڭ گالا-كونتسەرتى وتپەك. وعان وسى كەشكە ارنايى شاقىرىلعان, الەمنىڭ ۇزدىك تەاترلارىنىڭ ايگىلى ارتىستەرى, اتاپ ايتقاندا, يۆان ۆاسيلەۆ (ميحايلوۆ تەاترى, سانكت-پەتەربۋرگ), اناستاسيا ستاشكەۆيچ (ۇلكەن تەاتر, ماسكەۋ), فريدەمان فوگەل مەن ماريا ەيحۆالد (شتۋتگارت مەملەكەتتىك بالەتى), مايا ماحاتەلي (گوللانديا ۇلتتىق بالەتى), فيليپپا دە كاسترو مەن كارلوس پينيلوس (پورتۋگاليا ۇلتتىق بالەتى), باقتيار ادامجان, ءمادينا باسپاەۆا مەن ەركىن راحماتۋللاەۆ («Aستانا وپەرا»), فارحاد بوريەۆ پەن ريزا قاناتقىزى ( «استانا بالەت») قاتىساتىنى ءمالىم بولدى.
23 جانە 24 ماۋسىمدا كورەرمەن نازارىنا «جيزەل» كلاسسيكالىق بالەتىنىڭ پرەمەراسىن ۇسىنۋ جوسپارلانۋدا. ۆيلليستار جايلى كونە پوەتيكالىق اڭىزدىڭ ىزىمەن گەنريح گەينە جازعان تۋىندىنىڭ نەگىزىندە برازيليالىق حورەوگراف ريكاردو امارانتە ساحنالاعان ەكى اكتىلى بالەت تۇرمىسقا شىقپاعان, سۇيىكتىلەرى تەرىس اينالعاندىقتان قۇسادان كوز جۇمعان بويجەتكەندەر حاقىندا باياندايدى.
ال 28 ماۋسىمدا استانالىقتار مەن قالا قوناقتارى يسپانيانىڭ – «Castro Romero», ال 29 ماۋسىمدا تۇڭعىش رەت قىتايدىڭ ۇلتتىق بالەتى (بەيجىڭ) تەاترلارىنىڭ ونەرىن تاماشالاماق. وتاندىق تەاترلارمەن قاتار الەمدىك دەڭگەيدەگى تانىمال بالەت شەبەرلەرى قاتىسۋىمەن وتەتىن گالا-كونتسەرت, زاماناۋي حورەوگرافتار ازىرلەگەن نومىرلەر مەن ۇزدىك تۋىندىلار شوعىرى جان باۋرايدى.
– ەلوردانىڭ 20 جىلدىق تويىن «استانا بالەت» تەاترى تولايىم تابىسپەن قارسى الىپ وتىر. ەۋرازيا حالىقارالىق بالەت جوباسىنىڭ مۇندا ەكىنشى رەت وتكىزىلۋىنىڭ ءوزى بالەت سوليستەرىنە ۇلكەن سەنىم ارقالاتادى. وسى ورايدا تەاتردىڭ شەتەلدەرگە گاسترولدىك ساپارلارى مەن قازاقستان قالالارىنا تۋرنەسى دە ءساتتى وتكىزىلىپ, كوپشىلىك سۇيىسپەنشىلىگىنە بولەنگەنىن اتاي كەتكەن ءجون, – دەيدى فەستيۆالدىڭ اتقارۋشى ديرەكتورى جانىبەك قايىر.
قاراشاش توقسانباي,
«ەگەمەن قازاقستان»