شەنەۋنىكتەردىڭ ءىس-ارەكەتتەرى «قانىنا تارتپاعاننىڭ قارى سىنسىن» ماتەلىن ەرىكسىز ەسكە تۇسىرەدى. تۇلەن تۇرتەيىن دەسە, وپ-وڭاي ەكەن. ع.مۇسىرەپوۆ اتىنداعى اۋداننىڭ بيلىك تۇتقاسىن ۇستاعان لاۋازىم يەلەرى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنا قاتىسۋشىلارعا پاتەر ءبولۋ كەزىندە الدىمەن تۋعان-تۋىستارى مەن تانىستارىن جارىلقاماق بولعان.
ولاردىڭ ادەپ كودەكسى تالاپتارىمەن ءۇش قايناسا سورپاسى قوسىلمايتىن ارەكەتتەرىن سىبايلاس جەمقورلىققا قارسى كۇرەس جونىندەگى ۇلتتىق بيۋروسى وبلىستىق دەپارتامەنتى اشكەرەلەپ وتىر. تەرگەۋ باسقارماسى باسشىسىنىڭ ورىنباسارى سەرعالي ءتۇسىپوۆتىڭ بايانداماسىندا اتاپ كورسەتىلگەندەي, تايىنشا اۋدانىنىڭ قازىرگى اكىمى ۆلاديمير دۋدوۆ ع.مۇسىرەپوۆ اۋدانىنا باسشىلىق ەتكەن تۇستا قارىنداسىنا, اكىمنىڭ ورىنباسارى التىنشاش تايشاباەۆا سىڭلىسىنە باسپانا الۋعا كومەكتەسىپ, زاڭ بۇزۋشىلىقتارعا ورىن بەرگەن. ۆ.دۋدوۆ كوميسسيا توراعاسى رەتىندە بەيتاراپتىق تانىتۋدىڭ ورنىنا وتىرىسقا, داۋىس بەرۋگە قاتىسقان. ول وزىنە تاعىلعان ايىپتاۋلاردان سىتىلىپ كەتۋگە قانشا ۇمتىلسا دا, ەتجاقىن ادامداردىڭ مۇددەسىن قورعاعانى, حاتتاماعا قول قويعانى, وسىلايشا مەملەكەتتىك قىزمەتكە نۇقسان كەلتىرگەنى تايعا تاڭبا باسقانداي موينىنا قويىلىپ, قىزمەتىنە تولىق ساي ەمەس دەپ تانىلدى. ونىڭ «سۇتتەن اق, سۋدان تازامىن» دەگەن ءۋاجى كوميسسيا مۇشەلەرىن سەندىرە العان جوق. كەي تۇرعىندارعا بەرىلگەن باسپانالاردىڭ اۋماعىنا قاتىستى زاڭعا قايشى جايتتارعا دا ءتىس جارىپ ۇندەمەگەن. ءتىپتى وتباسى قۇرامى تۋرالى انىقتاما تالاپ ەتىلمەگەن.
اڭگىمە اۋانى ۆ.دۋدوۆ پەن ونىڭ ورىنباسارى تالعات ابىلپەيىسوۆتىڭ كاسىپكەرلەردەن زاڭسىز اقشا جيناعانى تۋرالى ماسەلەگە اۋىسقاندا تالقىلاۋ قىزىپ سالا بەردى. استانادا وتكەن ات بايگەسىنە تۇياعىمەن جەر تارپىعان سايگ ۇلىكتەردى اپارۋعا 100 مىڭ تەڭگە, اۋىلشارۋاشىلىق مەرەكەسىن وتكىزۋگە وسىنشا كولەمدە قارجى سۇراعان فاكتىلەر راستالدى. تاعى ءبىر فەرمەردەن 20 مىڭ تەڭگە تالاپ ەتىلگەن. ولار بولسا اعىمدىق ءىس-شارالارعا جەرگىلىكتى قازىنادان قاراجات قاراستىرىلماعاندىقتان قالتالى ازاماتتاردىڭ كومەگىنە جۇگىنۋگە تۋرا كەلگەنىن, ءوتىنىش رەتىندە ايتقاندارىن كولدەنەڭ تارتقانىمەن, شاعىن جانە ورتا بيزنەس قىزمەتىنە ءجونسىز ارالاسۋ دەگەن باعا بەرىلدى.
سىبايلاس جەمقورلىققا قارسى كۇرەس جونىندەگى ۇلتتىق بيۋرونىڭ جەرگىلىكتى قۇرىلىمى لاۋازىمدى تۇلعالارعا جەمقورلىققا جول بەردى دەگەن ايىپ تاعىپ, قىزمەتتەرىنەن شەتتەتۋ تۋرالى ۇسىنىس ايتقانىمەن, ادەپ كوميسسياسىنىڭ مۇشەلەرى باسقاشا شەشىم قابىلدادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى