مەملەكەت باسشىسىنىڭ بەس الەۋمەتتىك باستاماسىندا ايتىلعان شاعىن نەسيەلەۋ سوماسىنىڭ 85 پايىزىن ۇكىمەت كەپىلدەندىرمەك. ماسەلەن, الىنعان ءبىر ميلليون تەڭگە نەسيەنىڭ 850 مىڭ تەڭگەسىنە ۇكىمەت كەپىلدىك بەرەدى, ال قالعان 150 مىڭ تەڭگە ءۇشىن نەسيە الۋشى اۋىلداعى مالىن, جەرىن نەمەسە باسقا دا جىلجىمايتىن مۇلكىن كەپىلدىككە قويا الادى. ۇكىمەت ۇيىندە وتكەن ءباسپاسوز ءماسليحاتىندا ەڭبەك جانە حالىقتى الەۋمەتتىك قورعاۋ مينيسترلىگى حالىقتى جۇمىسپەن قامتۋ جانە ەڭبەك نارىعىن دامىتۋ دەپارتامەنتىنىڭ ديرەكتورى جەڭىسبەك دۋلاتوۆ شاعىن نەسيەلەۋدە اتقارىلىپ جاتقان جۇمىستارمەن تانىستىردى.
بىلتىرعى جىلى «قازاگروكەپىلدىك» اق جانە «دامۋ» قورى 414 نەسيەگە كەپىلدىك بەرگەن. 2017 جىلى جالپى سوماسى 32 ميلليارد تەڭگە بولاتىن 7200 شاعىن نەسيە بەرىلدى. الايدا «باستاۋ بيزنەس» جوباسى بويىنشا ءبىلىم العان تاعى 5 مىڭ ادام ءوز ءىسىن باستاۋعا قاجەتتى شاعىن نەسيەلەردى الا الماعان بولاتىن. ەل ۇكىمەتى 2018 جىلى قوسىمشا 20 ميلليارد تەڭگە ءبولىپ, شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋدى كوزدەپ وتىر. بيىلعى جىلى شاعىن نەسيە الاتىنداردىڭ سانى 2017 جىلمەن سالىستىرعاندا 2 ەسەگە ارتىپ, 14 مىڭ ادامعا جەتەتىن بولادى. شاعىن كاسىپكەرلىككە كەپىلدىك بەرۋدىڭ ۇلەسى دە ەسەلەنىپ, 800 كەپىلدىك بەرۋ جوسپارلانىپ وتىر. پرەزيدەنتتىڭ بەس الەۋمەتتىك باستاماسىنىڭ ءبىرى − «شاعىن نەسيە بەرۋدى كوبەيتۋ» بويىنشا ءوزىن-ءوزى ەڭبەكپەن قامتىعان جانە جۇمىسسىز تۇرعىندار اراسىندا جاپپاي كاسىپكەرلىكتى دامىتۋ ءۇشىن جەڭىلدىكتى شاعىن نەسيەلەر تۇراقتى بەرىلىپ كەلەدى. بۇل ءوز كەزەگىندە شاعىن جانە ورتا كاسىپكەرلىكتىڭ ەل ەكونوميكاسىنا قوسار ۇلەسىن ارتتىرۋعا مۇمكىندىك بەرەدى.
ەركەجان ايتقازى,
«ەگەمەن قازاقستان»