«رودينا» اگروفيرماسىنىڭ باس ديرەكتورى, قازاقستاننىڭ ەڭبەك ەرى يۆان ساۋەر تۋرالى تولعام. ادام بالاسىنا بەرىلەتىن ەڭ جوعارى ءارى جۇرەككە جاقىن باعا – ابىروي. حالقىمىز مۇنى «تىرنەكتەپ جينالادى» دەگەن پالساپالىق تەرەڭدىكپەن ءاۋ باستان-اق بيىكتەتىپ قويعان. ارينە, بۇل كوكتەمنىڭ جىلىمىعىنداي جالعاندىقپەن ەمەس, قيىندىعى قىرىق قارىس قايسار ەڭبەكتىڭ قايتارىمىنداي جانىڭدى جادىراتسا عانا قايىرلى بولماق. مۇنداي ادامدار كوپ بىزدە. سارالاپ ساناي بەرەر تۇلعالاردىڭ دا تۇلپارى بارىن ەسكەرىپ بارىپ, جۇلدىزدارعا كوز قادايسىڭ. اعىپ تا جاتقاندارى بار, جانىپ تا جاتقاندارى بار. جاقسى ماعىنادا ايتقاندا, «رودينا» اگروفيرماسىنىڭ باس ديرەكتورى يۆان ساۋەردى وسى بايلامنىڭ ابىرويلى ساناتىنا الاقايلاپ قوسساق, اسا قاتەلەسە قويماسپىز. ويتكەنى يۆان اداموۆيچ ءوز ەڭبەگىنىڭ جەمىسىن كورىپ قاناتتانعان, ءوزى اۋزىنان تاستامايتىن «مەن ارقاشاندا ءىستىڭ كوركەيۋىن, ادامداردىڭ ساتتىلىك ساتىسىنان تۇسپەۋىن قالايمىننىڭ» ادامى.
قاراپ وتىرساق, تىرشىلىكتىڭ ءتول تەبىرەنىستەرى, ءومىردىڭ ءمانى مەن ۇعىمىن ۇزارتار قاعيداتتارى بارىنا قايرانسىڭ. سونىڭ ءبىر پاراسى بۇرىن كورمەگەن جاندى بىردەن بويىڭا جاقىن تارتۋ ما دەپ قالاسىڭ. ول نەسىمەن باۋرايدى سوندا؟ جۇرەگىنىڭ كەڭدىگىمەن, پاراساتىنىڭ بيىكتىگىمەن, اينالاسىنا شۋاق تاراتار ىشكى جىلىلىعىمەن, ۋاقىتتىڭ دەمىن ءدال سەزىنۋىمەن, ىسكەرلىك قابىلەتىنىڭ جوعارىلىعىمەن دەپ تىزبەلەي بەرسەك, تاۋسىلار ما؟ قىرىق جىلدان استام جۋرناليستىك قادامى بار ادام ءۇشىن مۇنداي پايىم تاڭسىق ەمەس. سوندا دا سەلك ەتكىڭ كەلەدى, سونداي كىسىلەردىڭ كوپ بولعانىن قالايسىڭ. ولاردى تاني ءبىلۋىڭ كەرەك…
تاۋەلسىزدىگىمىزدىڭ تەبىرەنىستى شاعى. ەل تاريحىندا جاڭا استانا بوي كوتەردى. رەسپۋبليكالىق دەڭگەيدەگى اقمولانىڭ ەلوردادان ەنشى الىپ, كوكشەتاۋعا كوشۋى ءوڭىر جۇرتشىلىعى ءۇشىن كوڭىل جەلپىنتەر قۋانىش پەن جۇرەك تەربەر جاۋاپكەرشىلىككە تولى ەدى. وبلىستىڭ جاڭا ورداسىندا جينالىستار دا ءجيى وتكىزىلەتىن. تۇسىنىكتى جاعداي. مۇندايدا جۇرتشىلىقتىڭ تورالقادا كىمدەردىڭ وتىرعانىنا كوز سالاتىنى بار. وسى جينالىستاردىڭ ماڭىزىن سالماقتاندىرۋ ءۇشىن الگى وكىلدەردىڭ اتى-ءجونىن تاپتىشتەپ, سويلەگەن سوزىنە ەكپىن تۇسىرۋگە تىرىسامىز. ايتكەنمەن, تاڭداپ بارىپ تالعاپ جازۋ تالابى دا بار.
بىردە «نۇر وتان» پارتياسى وبلىستىق فيليالىنىڭ ەسەپ بەرۋ-سايلاۋ جينالىسىنا شاقىرىلدىق. دايىندىق مىقتى. كونتسەرتتەر قويىلىپ, كورمەلەر ۇيىمداستىرىلعان. دەلەگاتتاردى بىلاي قويىپ, مەكەمە باسشىلارى, پارتيالار مەن قوعامدىق بىرلەستىكتەردىڭ وكىلدەرىن قوسقاندا, جالپى ادام قاراسى 300-گە جۋىقتايدى. پرەزيديۋمعا ەكى ورىنتاق قويىلعان. ءبىز عانا ەمەس, بارشانىڭ جۇزىنەن «ەكىنشى كرەسلوعا كىم جايعاسادى؟» دەگەن سۇراق مەنمۇندالاپ تۇر. كوپ ۇزاماي ساحناعا وبلىس اكىمىمەن بىرگە سۇڭعاق بويلى, اشاڭ ءجۇزدى كىسى شيراق قيمىلداپ شىقتى. ءبىرازدان كەيىن جينالىس توراعاسىنىڭ تارتىپكە شاقىرعانىنا قاراماستان, زالدىڭ ءار بۇرىشىنان «وۋ, بۇل ءوزىمىزدىڭ يۆان اداموۆيچ قوي!» دەگەن تاڭدانىسىنان قۋانىشى باسىم داۋىستار ەستىلدى.
پرەزيديۋمنان استانالىق ادامداردى ىزدەپ داعدىلانعاندىقتان بولار, العاشىندا تانىماپپىز. الدىمىزدا تسەلينوگراد اۋدانىنداعى «رودينا» اگروفيرماسى» جشس ديرەكتورى ساۋەر وتىر. ول «نۇر وتان» پارتياسى ساياسي كەڭەسىنىڭ مۇشەسى ەكەن. يۆان اداموۆيچ ءوز كەزەگىندە توگىلدىرىپ دەمەگەنمەن, قاراپايىم تولعامدارمەن تەبىرەنتىپ سويلەدى. ناقپا-ناق ءتۇيىن. كوپشىلىك جەتەكشى پارتيانىڭ جاڭاشىل ۇستانىمدارىنا ريزا بولدى.
ءومىر وزگەرەدى. ۋاقىت العا جىلجيدى. سوعان بايلانىستى كوپ نارسە باسقاشا سيپاتقا يە بولادى. بىراق كەيىپكەرىمىز, ونىڭ ۇستانىمى, مىنەزى بىرقالىپتى. سوندىقتان دا جۇرتشىلىق ونى: ء«وزىمىزدىڭ يۆان اداموۆيچ», دەيدى. كوشەدە كورسە دە, كوشەلى جينالىستا كورسە دە, تەلەديداردان كورسە دە وسىنى ايتادى. اۋقىمىندا قانشاما ىزەت-قۇرمەت جاتىر دەسەڭىزشى. يۆان اداموۆيچ تۋرالى, ونىڭ «روديناسى» تۋرالى اجەپتاۋىر ءىلتيپات ەستىدىم. حالىق قۇرمەت ءسوزىن جاي ايتپايدى ەكەن. امبەباپ شارۋاشىلىق «التىن ساپانىڭ» ەڭ العاشقى جەڭىمپازى. بىلتىر تاعى دا يەلەندى. قازاقستاننىڭ اگروونەركاسىپ كەشەنى جەتىستىكتەرىنىڭ ءداستۇرلى «قاراوتكەل» كورمەسىنىڭ «التىن بەلگىسىن» ءبىر ەمەس, ءۇش قايتارا جەڭىپ الدى. «نە ءۇشىن؟» دەۋدىڭ ءوزى ارتىقتاۋ سياقتى. مىناعان قاراڭىز. كوكورىمگە بولەنگەن رودينا اۋىلىنىڭ ۇيلەرى ورتالىقتان جىلىتىلادى. سۋ جۇيەلەرىنىڭ ءوزى 25,5 شاقىرىمدى, ەلەكتر شامى تارتىلعان اسفالتتى كوشەلەردىڭ اۋماعى 15 شاقىرىمدى, ورتالىقتان جىلىتۋ جەلىلەرى 42,7 شاقىرىمدى الىپ جاتىر. ۇيلەنۋ تويى مەن ءسابي تۋعانداعى ءداستۇرلى بازارلىق 150 000 تەڭگەدەن. ۇجىم مۇشەلەرى جىلدىق سىياقىنى بىلاي قويعاندا, كوپ جەردە ۇمىتىلا باستاعان 13-ءشى جالاقى الادى. «جىل وقۋشىسى» مەن «التىن بەلگى» يەگەرلەرى 150 000 تەڭگەنى يەمدەنەدى. الدىڭعى جىلدارى, ۇلى جەڭىس مەيرامىندا سوعىس ارداگەرلەرى س.گلۋشكو مەن پ.بوگاتىرەۆقا جەڭىل اۆتوكولىكتەر مىنگىزىلگەنىن بىلەمىز. سەرىكتەستىكتىڭ كەڭسەسىنە, وندىرىستىك بۋىندارىنا, الەۋمەتتىك نىساندارعا باس سۇعا قالساڭىز, «العىس حاتتار» كورمەسىنە تاپ بولعانداي كۇي كەشەتىنىڭىز انىق. رودينا اۋىلىنىڭ ءوزى وبلىستىڭ «ۇزدىك ەلدى مەكەنى», ال ونىڭ مادەني وشاعى رەسپۋبليكانىڭ «ۇزدىك كلۋبى» اتاندى. «جىلدىڭ ۇزدىك الەۋمەتتىك جوباسى» اتالىمى بويىنشا رەسپۋبليكالىق «پارىز» بايقاۋىنىڭ ەكى دۇركىن جەڭىمپازى بولۋ دا وڭاي شارۋا ەمەستىگىن ايتىپ جاتۋدىڭ ءوزى ارتىق شىعار.
وسىلايشا جالعاستىرا بەرۋگە بولار ەدى. بىراق, مەنىڭ ايتپاعىم باسقا جىر. ەلباسىنىڭ «روديناعا» ساپارلارىندا بايقاعانىم, نۇرسۇلتان ءابىش ۇلى ء«وزىمىزدىڭ يۆان اداموۆيچ» دەگەندى كىشكەنە وزگەرتىڭكىرەپ, اڭگىمەسىن «ەسىڭدە مە, يۆان…» دەپ باستايدى ەكەن…
ويىمنان كەتپەي جۇرگەن تاقىرىپتى اشا ءتۇسۋدىڭ ورايى كەلگەنى قويىن داپتەرىمدە جازىلىپ قالىپتى. شارۋاشىلىق 60 مىڭ گەكتار ەگىستىكتىڭ رەكوردتى ىرىزدىعىن قۇت قامباعا قۇيىپ, كوڭىلى جايلانعان تۇس. «ەسىڭدە مە, يۆان…» تەكتەن-تەك ايتىلمايدى عوي, ەلباسىمەن كەزدەسۋلەرىڭىزدىڭ كەيبىر ساتتەرىن اڭگىمەلەسەڭىز», دەيمىن وعان. وسى جولى يۆان اداموۆيچ كادىمگىدەي اشىلدى. بۇل ەلباسىنىڭ جىلدىڭ سوڭىندا «روديناعا» جۇمىس ساپارىنان كەيىن ىلە-شالا جاسالعان جەدەل سۇحبات ەدى.
– جاڭا ءوزىڭىز كوردىڭىز, مەملەكەت باسشىسى اۋىلىمىزدان ريزا كوڭىلمەن اتتاندى. نۇرسۇلتان ءابىش ۇلىنىڭ «تۇڭعىش پرەزيدەنت كۇنى» مەرەكەسىنەن كەيىنگى العاشقى ساپارى بىزگە تۇسكەنى ايتىپ جەتكىزگىسىز ابىروي, – دەيدى ي.ساۋەر. – پرەزيدەنتپەن كەزدەسۋ كوپ بولعانىمەن, ەركىنسىپ كەتۋ مۇمكىن ەمەس, ءار كەزدەسۋدىڭ جاۋاپكەرشىلىك جۇگى اۋىرلاي بەرەدى ەكەن. نۇرسۇلتان ابىش ۇلىمەن العاشقى كەزدەسۋىم 1989 جىلدىڭ تامىزىندا, ءبىزدىڭ استىقتى القابىمىزدى ارالاعان شاعىندا بولىپ ەدى. ول كىسى سول جىلعى جازدا قازاقستان كومپارتياسى ورتالىق كوميتەتىنىڭ ءبىرىنشى حاتشىسى بولىپ سايلانعان. ال مەنىڭ ديرەكتورلىق قىزمەتىمە ەكى جىل ەندى تولعان. مەنى تاڭعالدىرعانى, بىرىنشىدەن, ول كىسىنىڭ اڭعارىمپازدىعى, ەش نارسەنى قالت جىبەرمەيتىن قاسيەتى. قولىمدى جەڭ ىشىنە جاسىرىپ, ءوزىمدى بارىنشا سەرگەك ۇستاۋعا تىرىسقانىممەن, جول اپاتىنان كەيىن اۋرۋحانادان ەرتەرەك شىققانىما ەسكەرتۋ جاسادى. ەكىنشىدەن, ءوزىنىڭ نەگىزگى ماماندىعى مەتاللۋرگ ەكەندىگىنە قاراماستان, ءبىزدىڭ كەڭشاردىڭ جەر وڭدەۋ ەرەكشەلىگى, ەگىنشىلىك تەحنولوگياسى, تۇقىم سۇرىپتاۋ ماسەلەلەرى تۋرالى بىلىكتى عالىم-اگرونوم دەڭگەيىندە پىكىر ءبىلدىرۋى.
– ودان كەيىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆپەن بىرنەشە رەت جۇزدەستىم, – دەيدى ءارى قاراي اڭگىمە ساباقتاعان يۆان ساۋەر. – اسىرەسە, 1993 جىلعى جاڭبىرلى قىركۇيەكتەگى شارۋا-شىلىعىمىزعا ساپارى ايرىقشا ەسىمدە قالدى. كۇن جارىقتىق شايداي اشىلدى. پرەزيدەنت: «مەن سىزدەرگە قولايلى اۋا رايى مەن جىلىلىق الىپ كەلدىم, ەندى استىقتى جيناپ الاسىزدار», دەدى ك ۇلىمسىرەپ ء(دال سولاي بولدى دا). ودان كەيىن ءىس بارىسىنا اۋىسىپ: «سەن جاس ديرەكتورسىڭ, جەكەشەلەندىرۋدى نەگە قولدامايسىڭ, رەفورمالاردى جاقتاماعانىڭ با؟», دەپ ماعان سىناي قارادى. مەن باتىلدانىپ, مەنشىك ءتۇرىنىڭ مۇنداي فورماسى سونشالىقتى وزگەرىس اكەلمەيتىنىن ايتىپ, جەكە پىكىرلەرىمدى ورتاعا سالدىم. ول مۇقيات تىڭداپ, جانىنداعى رەسمي ادامدارىنا مەنىڭ ايتقاندارىم بويىنشا ۇسىنىس جاساۋعا نۇسقاۋ بەردى. پرەزيدەنت كىسىنى تىڭداي بىلۋىمەن قاتار, قاراپايىم پىكىردىڭ ءوزىن نازاردان تىس قالدىرمايتىنىن, وسى ارقىلى ادامداردى قاناتتاندىرىپ وتىراتىنىن قوعام دامۋىنداعى ناقتى ىستەرىمەن ۇنەمى دالەلدەي بىلەتىنىنە ءتانتى بولدىم.
ي.ساۋەر ءارى قاراي اڭگىمەسىن تومەندەگىشە جالعاستىردى: ء«بىزدىڭ 1994 جىلعى 5 ماۋسىمداعى كەزدەسۋىمىز ۇمىتىلماس اسەر قالدىردى. اۋىلىمىزداعى ارداگەرلەر اللەياسىندا نۇرسۇلتان ءابىش ۇلى جەرگىلىكتى قاريالارمەن بىرگە ءوزىنىڭ اققايىڭىن وتىرعىزدى. بۇل قازىر كوركەيىپ ءوسىپ تۇر. ال تاۋەلسىزدىگىمىزدىڭ بەس جىلدىق مەرەكەسىندەگى سالتاناتتا ەلباسى قولىنان العاشقى ناگرادام, №3 «دوستىق» وردەنىن العانىم ماڭگى ەستە ساقتالادى. ماراپاتتاۋ راسىمىنەن كەيىن نۇرسۇلتان ءابىش ۇلىنىڭ قابىلداۋىندا بولىپ, 40 مينۋتتاي اڭگىمەلەستىك. ول ماعان جوعارى لاۋازىمدى قىزمەت ۇسىندى. «مەن ءوز ورنىمدا ەلىمە كوبىرەك پايدا كەلتىرەمىن», دەگەندەي ۋاجبەن باس تارتتىم. قاتتى قينالدىم. بىراق, رەنجىگەن جوق. ودان كەيىنگى كەزدەسۋلەردە ماعان دەگەن نيەتى مەن ىقىلاسىن وزگەرتكەن ەمەس».
يۆان ءاداموۆيچتىڭ ايتۋىنشا, مەملەكەت باسشىسى 2001 جىلعى 18 ناۋرىزداعى ساپارىندا دا رودينا اۋىلىنا كوتەرىڭكى كوڭىل كۇيمەن كەلىپتى. ەۋروستيلمەن كۇردەلى جوندەۋ جۇرگىزىلگەن مەكتەپكە ريزا بولۋمەن قاتار, كوپ بالالى وتباسىنان ءدام تاتىپ, تەلەديدار سىيلاپتى. ماشينا-تراكتور شەبەرحاناسىندا وڭىردەگى شارۋاشىلىق باسشىلارىمەن كەڭەس وتكىزگەن. ال 2008 جىلدىڭ 3 قىركۇيەگىندە گەرمانيا پرەزيدەنتى حورست كەلەرمەن بىرگە تىكۇشاقپەن كەلۋى اۋىلى ءۇشىن ناعىز مەيرامعا اينالعان.
– مەن مىناداي سوزدەردى ۇلكەن قۇرمەتپەن ۇنەمى قايتالاپ جۇرەمىن: «قۇرمەتتى پرەزيدەنت مىرزا, ارينە ەسىمدە جانە مۇنداي كەزدەسۋلەر ءالى تالاي بولادى دەپ ۇمىتتەنەمىن. ءسىز ءبىزدىڭ «رودينامىزدىڭ» اسا قۇرمەتتى ازاماتىسىز, ءاردايىم تورىمىزدەن ورىن الاسىز!» – دەيدى ءسوزىنىڭ سوڭىندا ي.ساۋەر.
ءبىز بۇعان ءسوز قوسىپ, تولعانىس تولقىندارىن بۇزعىمىز كەلمەيدى.
وسى ورايدا مىناداي ماسەلەگە نازار سالعاننىڭ استارىندا كوپ دۇنيە جاتقانى انىق. تالعامپاز وقىرماننىڭ مۇنى دا بىلگەنىن ءجون كوردىك. يۆان ساۋەر – ينجەنەر-مەحانيك, ەكونوميكا عىلىمدارىنىڭ كانديداتى, اۋىل شارۋاشىلىعى عىلىمدارىنىڭ قۇرمەتتى اكادەميگى, س.سەيفۋللين اتىنداعى قازاق اگرارلىق ۋنيۆەرسيتەتىنىڭ قۇرمەتتى پروفەسسورى, ا.باراەۆ اتىنداعى سىيلىقتىڭ لاۋرەاتى, «نۇر وتان» پارتياسى ساياسي كەڭەسىنىڭ, ۇلتتىق كاسىپكەرلەر پالاتاسى تورالقاسىنىڭ, «قازاگرويننوۆاتسيا» اق ديرەكتورلار كەڭەسىنىڭ, اۋىل شارۋاشىلىعى مينيسترلىگى ساراپشىلار كەڭەسىنىڭ مۇشەسى, «قازاقستاننىڭ ەت-ءسۇت وداعىنىڭ» باسقارما توراعاسى, «ازىق-ت ۇلىك كەلىسىمشارت كورپوراتسياسى» ۇلتتىق كومپانياسى» اق-تىڭ تاۋەلسىز ديرەكتورى. مۇنى دا تولىق سۋرەت دەمەگەنىمىزبەن, ادام بالاسىنىڭ باقىت باسپالداقتارىن اشىپ كورسەتەرلىك تاعىلىمدى دۇنيە دەپ بىلەمىز.
سوناۋ وتىزىنشى جىلداردان بەرى شارۋاشىلىق قۇرىلىمدىق بىرنەشە رەت وزگەرىسكە تۇسكەنىمەن, «رودينا» اتاۋىنان اينىعان ەمەس. ويتكەنى وتان – قاسيەتتى ءارى قىمبات ۇعىم. ول – ادام بالاسىنىڭ اسىل ارماندارىن, جارقىن بولاشاعىن بىرىكتىرەتىن قۇدىرەتتى ءسوز. سوندىقتان «رودينادا» ناشار جۇمىس ىستەۋ مۇمكىن ەمەس, ار الدىنداعى ادالدىق, ورتاق جاۋاپكەرشىلىك اسقاق تۇرادى.
سەرىكتەستىكتە 700 ادام جىل بويى جۇمىسپەن قامتىلعان. مۇندا جىلىنا 6 ميلليارد تەڭگەنىڭ ءونىمى شىعارىلادى. ياعني ءار جۇمىسشىعا شاققانداعى ەڭبەك ونىمدىلىگى 11 ميلليون تەڭگەنى قۇرايدى دەگەن ءسوز. بولەكتەپ ايتارىمىز, وسى ءونىمنىڭ تەڭ جارتىسى مال شارۋاشىلىعىنىڭ ۇلەسىندە ەكەن. وسىنداعى ەكى بىردەي تاۋارلى-ءسۇت كەشەنىندە 1300 اسىل تۇقىمدى ءىرى قارا زاماناۋي «گلوبال-90» جانە «يولوچكا» اينالمالى قوندىرعىلارىمەن ساۋىلادى. كەشەندە 2017 جىلى 12 000 توننا ءسۇت ءوندىرىلىپ ء(ار سيىردان 7300 كەلى), قايتا وڭدەۋ زاۋىتىندا 12 ءتۇرلى ونىمگە اينالىپ, استانا نارىعىنا شىعارىلادى. سونداي-اق ءوندىرىستى ارزان ەلەكتر قۋاتىمەن قامتاماسىز ەتۋ ءۇشىن جۇرتتان بۇرىن ورناتىلعان قۋاتى 750 كۆت بولاتىن بالامالى جەل قوندىرعىسى ىستەپ تۇرعانى, جەكە اۆياپاركىنىڭ بارى, جۇمىستىڭ بارلىعى وزىق ادىستەرگە نەگىزدەلگەنى, تسيفرلى تەحنولوگيانىڭ قانات جايا باستاعانى قاناعات سەزىمىنە بولەيدى.
ءداۋىر مەن ساۋەردىڭ «روديناسىندا» يۆان ءاداموۆيچتىڭ 60 جىلدىق اسۋى ەشقانداي نۇسقاۋ, تاپسىرما بولماسا دا مەرەكە رەتىندە اتالىپ ءوتىپ جاتقانىن شاتتىق كوڭىلمەن جەتكىزگىمىز كەلەدى. مۇندايدا كوركەم ءسوزدى توگىلدىرىپ, اسپەتتەپ سۋرەتتەۋدىڭ قاجەتى دە بولماي قالعانداي. مۇندا يگى ىستەر كادۋىلگى داستۇرگە اينالعان. مۇنىڭ حرونولوگيالىق تىزبەسىنە كوز سالۋدىڭ ءوزى تاۋەلسىزدىك مۇراتتارىنىڭ اسقاقتىعىن اڭعارتادى. مارتەبەسى بيىك ەڭبەكتىڭ جەمىستەرىنە قول سوعايىق ەندەشە.
كوپ سالالى اگروفيرما 2016 جىلى حالىقارالىق «سالا كوشباسشىسى» اتانىپ, «ۇزدىك مال شارۋاشىلىعى كاسىپورنى» التىن مەدالىن جەڭىپ الدى. رودينالىقتار بيىل اۋداندىق «اق بيداي» سپارتاكياداسىنىڭ 15 دۇركىن جەڭىمپازى بولىپ وتىر. ءوندىرىستى دامىتۋ ماقساتىندا 2 ميللارد 584 ميلليون تەڭگەنىڭ ينۆەستيتسيالىق جوباسى جۇزەگە اسىرىلىپ, تاۋارلى-ءسۇت كەشەنى, شەتەلدەن اكەلىنگەن 400 باس قۇناجىنعا ارنالعان قورا, استىق تەرمينالى, تاعى باسقا نىساندار پايدالانۋعا بەرىلدى. جىل ىشىندە ورتا مەكتەپكە, مادەنيەت ۇيىنە, دارىگەرلىك-مەديتسينالىق امبۋلاتورياعا, بالالار باقشاسىنا كۇردەلى جوندەۋ جۇرگىزىلىپ, جاڭا دەمالىس باعى, جاستار كافەسى, كىتاپحانا, «جاستار» شاعىن اۋدانى, جابىق حوككەي كورتى بوي كوتەردى. سونداي-اق شارۋاشىلىق ەسەبىنەن مەكتەپكە اۆتوبۋس, ەمحانا مەن پوليتسيانىڭ ۋچاسكەلىك بولىمىنە ارنايى اۆتوكولىكتەر ساتىپ الىندى.
بولاشاققا قىزمەت ىستەيتىن «رودينا» اگروفيرماسى» جشس وقۋشىلاردىڭ ءبىلىم الۋىنا قولايلى جاعدايلار جاساۋىمەن دە ەرەكشەلەنەدى. ءۇش تۇلەكتىڭ «التىن بەلگى» يەگەرى اتانىپ, ءتورت ستۋدەنتتىڭ «بولاشاق» ستيپەندياسىمەن وقيتىنى قايتارىمنىڭ ءبىر پاراسى عانا. جالپى, شارۋاشىلىق ەسەبىنەن 250 ادامنىڭ جوعارى ءبىلىم الۋى نەكەن-ساياق جاعداي دەپ ويلايمىز.
تاۋەلسىزدىك مۇراتتارىنىڭ جۇزەگە اسا بەرەتىن سالتاناتىنىڭ عاجايىپ كورىنىسى جالعاسا بەرەتىنى انىق!
باقبەرگەن امالبەك,
جۋرناليست
اقمولا وبلىسى,
تسەلينوگراد اۋدانى